ខ្យល់កន្ត្រាក់បំផ្លាញផ្ទះពលរដ្ឋ ១០៧ខ្នងក្នុងខេត្តបាត់ដំបង និងសម្លាប់មនុស្សម្នាក់

យ៉ាងហោចណាស់ក៏មានជនរងគ្រោះចំនួនពីរនាក់បានរងរបួស និងស្លាប់ ដោយសាររន្ទះបាញ់ស្របពេលមានភ្លៀងធ្លាក់មួយមេយ៉ាងខ្លាំង ហើយក៏មានខ្យល់កន្ត្រាក់បោកបំផ្លាញលើស្រុកចំនួន៧ បណ្ដាលឲ្យខូចខាតលំនៅឋានប្រជាពលរដ្ឋអស់ចំនួន ១០៧ខ្នង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍របស់សមត្ថកិច្ចបានបញ្ជាក់ថា កាលពីល្ងាចថ្ងៃទី១៦ ខែមីនា ឆ្នាំ២០២៥ គឺមានភ្លៀងធ្លាក់គ្របដណ្ដប់លើទូទាំងខេត្តបាត់ដំបង ដែលក្នុងនោះក៏មានខ្យល់កន្ត្រាក់ព្រមទាំងរន្ទះ បានបោកបក់ចូលទៅលើស្រុកចំនួន៧  ក្នុងនោះគឺមាន ១.ស្រុកបាណន់ នៅភូមិស្លាបប៉ាង ឃុំតាគ្រាម មានករណីរន្ទះបាញ់ប្រជាពលរដ្ឋឈ្មោះ ថ្លាន់ សុខាន ភេទប្រុស អាយុ២៨ឆ្នាំ បណ្ដាលឱ្យស្លាប់ នៅចំណុចដីថ្មី។ ២.ស្រុកសំឡូត នៅចំណុចក្រុមទី១ ភូមិដូនត្រឹត ឃុំតាសាញ មានករណីរន្ទះបាញ់ប្រជាពលរដ្ឋឈ្មោះ ហៀន ហាំ ភេទស្រី អាយុ៤១ឆ្នាំ បណ្ដាលឲ្យរងរបួស និងបានបញ្ជូនទៅសង្គ្រោះនៅមន្ទីរពេទ្យ។ ៣.ស្រុកសំពៅលូន មានករណីខ្យល់កន្ត្រាក់ បណ្ដាលឲ្យប៉ះពាល់ផ្ទះប្រជាពលរដ្ឋនៅឃុំជ្រៃសីមា និងឃុំសិរីមានជ័យ អស់ចំនួន២៥ខ្នងផ្ទះ។ ៤.ស្រុកសង្កែ មានករណីខ្យល់កន្រ្តាក់ បណ្ដាលឲ្យប៉ះពាល់ផ្ទះប្រជាពលរដ្ឋនៅឃុំកំពង់ព្រៀង ចំនួន៣ខ្នងផ្ទះ។ ៥.ស្រុកគាស់ក្រឡ មានករណីខ្យល់កន្រ្តាក់ បណ្ដាលឲ្យប៉ះពាល់ផ្ទះប្រជាពលរដ្ឋនៅភូមិព្រៃទទឹង ឃុំឆ្នាល់មាន់ ចំនួន០១ខ្នង។ ៦.ស្រុកបវេល មានករណីខ្យល់កន្ត្រាក់ បណ្ដាលឲ្យប៉ះពាល់ផ្ទះប្រជាពលរដ្ឋនៅភូមិបឹងអារក្ស ឃុំអំពិលប្រាំដើម ចំនួន ២៤ខ្នង។ និង ៧. មានភ្លៀងធ្លាក់ និងខ្យល់កន្រ្កាក់ បណ្ដាលអោយខូចខាតផ្ទះប្រជាពលរដ្ឋ នៅក្នុងឃុំពាមឯកសរុប៥៤ខ្នង ក្នុងនោះភូមិចុងឆ្ដោ ខូចខាតចំនួន ៥១ខ្នង ភូមិករហា ខូចខាតចំនួន ២ខ្នង ភូមិគោកដូងខូចខាតចំនួន១ខ្នង។ ទាំងនេះគឺជាបាតុភូតធម្មជាតិ ដែលបានកើតឡើងព្រមៗគ្នានៅក្នុងខេត្តបាត់ដំបង៕

អត្ថបទ៖ សោ និយមរ័ត្ន