ព័ត៌មានជាតិ

អាជ្ញាធរសង្កាត់ចោមចៅទី ១ ដាក់គ្រឿងចក្រស្តារប្រឡាយទួលពង្រ សម្រួលចរន្តទឹកហូរ

បានផុស

១ year មុន

នៅ

ថ្ងៃព្រហស្បតិ៍ ២០ មីនា ២០២៥

ដោយ

កាលពីព្រឹកថ្ងៃទី ២០ ខែមីនា ឆ្នាំ ២០២៥ នេះ រដ្ឋបាលសង្កាត់ចោមចៅទី ១ បានដាក់គ្រឿងចក្រស្តារប្រឡាយទួលពង្រ យកកាកសំណល់ និងសំរាមចេញពីក្នុងប្រឡាយ ដើម្បីបញ្ចៀសការជន់លិចនារដូវវស្សា និងសម្រួលដល់ចរន្តទឹកហូរលឿន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កង វង ចៅសង្កាត់ចោមចៅទី ១ បានឲ្យដឹងថា ដោយឃើញប្រឡាយធំទួលពង្រជាប្រឡាយមួយសម្រាប់រំដោះទឹកចេញពីទីក្រុង ជាពិសេសក្នុងមូលដ្ឋានខណ្ឌពោធិ៍សែនជ័យពោរពេញទៅដោយកាកសំណល់ ត្រកៀត និងល្បាប់ភក់ច្រើន លោក សក់ ច័ន្ទកញ្ញារិទ្ធ អភិបាល នៃគណៈអភិបាលខណ្ឌពោធិ៍សែនជ័យ បានបញ្ជាឲ្យរដ្ឋបាលសង្កាត់ចោមចៅទី ១ ដឹកនាំដោយលោកផ្ទាល់ជាចៅសង្កាត់ ដាក់គ្រឿងចក្រស្តារប្រឡាយខាងលើយកកាកសំណល់ចេញ។

លោក កង វង បានបន្តថា ការស្តារប្រឡាយខាងលើនេះ គឺចាប់ពីក្រោយបុរីពិភពថ្មី ភូមិត្រពាំងថ្លឹង ៤ សង្កាត់ចោមចៅទី១ ខណ្ឌពោធិ៍សែនជ័យ រហូតដល់ប្រឡាយបឹងហា ទល់នឹងសង្កាត់ដង្កោ ខណ្ឌដង្កោ រាជធានីភ្នំពេញ។

ជាមួយគ្នានេះដែរ អាជ្ញាធរ ក៏បានសំណូមពរដល់ប្រជាពលរដ្ឋទាំងអស់ សូមជួយថែរក្សាបរិស្ថាន អនាម័យ ឲ្យបានល្អ ជៀសវាងបោះសំរាមចោល ឬ ចាក់ចូលក្នុងប្រឡាយទឹក បង្កផលប៉ះពាល់ចរន្តទឹកហូរ៕

អត្ថបទ ៖ សុខា