ជាងសំណង់ម្នាក់ ធ្លាក់ពីលើរន្ទា ខណៈកំពុងសាងសង់ផ្ទះ រងរបួសធ្ងន់

ជាងសំណង់ម្នាក់ ឡើងលើរន្ទា ដើម្បីសាងសង់ផ្ទះ តែមិនប្រយ័ត្ន ក៏ធ្លាក់ចុះក្រោម បណ្តាលឲ្យរងរបួសធ្ងន់ ត្រូវបានកងសង្គ្រោះបន្ទាន់ ៧១១ កងពលតូចលេខ ៧០ ដឹកយកទៅមន្ទីរពេទ្យភ្លាមៗ។

ហេតុការណ៍នេះបានកើតឡើងកាលពីវេលាម៉ោង ៨ និង ៥៨ នាទី ថ្ងៃទី ២០ ខែកក្កដា ឆ្នាំ ២០២៦ ស្ថិតនៅផ្លូវបេតុង ភូមិស្រែជម្រៅ សង្កាត់ចោមចៅទី ២ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះឈ្មោះ ភាន់ សុផាត ភេទប្រុស អាយុ ៤២ ឆ្នាំ រងរបួសត្រង់ចង្កេះ និង បែកក្បាល មានអាសយដ្ឋាននៅភូមិកណ្ដាលត្បូង ឃុំគោកឃ្មុំ ស្រុកថ្មគោល  ខេត្តបាត់ដំបង។

តាមប្រភពព័ត៌មាន បានឲ្យដឹងថា មុនពេលកើតហេតុ ជនរងគ្រោះបានឡើងលើរន្ទា ទៅជាន់ទី ៣ ដើម្បីជួសជុលផ្ទះ ១ កន្លែង ដែលកំពុងសាងសង់។ ក្នុងនោះ ខណៈកំពុងធ្វើការ មិនប្រយ័ត្ន ស្រាប់តែរបូតដៃធ្លាក់ចុះមកក្រោម បណ្តាលឲ្យរងរបួសធ្ងន់ ហើយភ្លាមៗ នោះ ប្រជាពលរដ្ឋ ក៏បានស្នើសុំរថយន្តសង្គ្រោះរបស់អង្គភាព ៧១១ កងពលតូចលេខ ៧០ ដើម្បីមកជួយសង្គ្រោះ។

ក្រោយកើតហេតុ ជនរងគ្រោះ ត្រូវបានរថយន្តសង្គ្រោះរបស់អង្គភាព ៧១១ កងពលតូចលេខ ៧០ ដឹកបញ្ជូនទៅមន្ទីរពេទ្យព្រះកុសុមៈ៕
អត្ថបទ ៖ សុខា