ព័ត៌មានជាតិ

រថយន្តដឹកទំនិញ បុករថយន្ត គយរដ្ឋាករពីក្រោយបណ្តាលឲ្យរងរបួសធ្ងន់ស្រាល៤នាក់

បានផុស

៥ years មុន

នៅ

ថ្ងៃអង្គារ ២៣ មីនា ២០២១

ដោយ

សៀមរាប ៖ សមត្ថកិច្ចបានឲ្យដឹងថា រថយន្តដឹកទំនិញ បានបុករថយន្តរបស់មន្ត្រីសាខាគយនិងរដ្ឋាករខេត្តសៀមរាប បណ្ដាលឲ្យរងរបួសធ្ងន់និងស្រាលចំនួន៤នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះកើតឡើងនៅ វេលាម៉ោង ១៤និង ៣០នាទី ថ្ងៃទី២៣ ខែ មីនា ឆ្នាំ២០២១ នៅត្រង់ចំណុច ចន្លោះបង្គោលគីឡូម៉ែត្រលេខ ១៥-១៦ស្ថិតនៅក្នុងភូមិតានី ឃុំរុនតាឯក ស្រុកបន្ទាយស្រី ខេត្តសៀមរាប។

លោកវរសេនីយ៍ឯក ឡុង សំណាង អធិការនៃអធិការដ្ឋាននគរបាលស្រុកបន្ទាយស្រី បានឲ្យដឹងថា មានករណីគ្រោះថ្នាក់ចរាចរណ៍រវាងរថយន្តមួយគ្រឿងម៉ាក HYUNDAI TRACTOR ពណ៌ស ពាក់ស្លាកលេខ កំពង់ចាម3A- 6255 បើកបរដោយឈ្មោះ នី គន្ធា ភេទប្រុស អាយុ២៧ឆ្នាំ រស់នៅភូមិ ប្រស្រែលើ ឃុំវិហាលួង ក្រុងសួង ខេត្តត្បូងឃ្មុំ មានអ្នករួមដំណើរម្នាក់បើកបរមានទិសដៅពីត្បូង ទៅ ជើងបានបុក នឹងរថយន្ត មួយគ្រឿង ម៉ាក TOYOTA CAMRY 2007 ពណ៌ទឹកប្រាក់ ពាក់ស្លាកលេខ រដ្ឋ 10 2-0285 បើកបរដោយឈ្មោះ លិញ លោ ភេទប្រុស អាយុ៣៤ឆ្នាំ រស់នៅភូមិ ឪឡោក ឃុំបាគង ស្រុកប្រាសាទបាគង ខេត្តសៀមរាប មានអ្នករួមដំណើរចំនួន០៣ នាក់ បើកបរមានទិសដៅពីត្បូងទៅជើង។

លោកអធិការបានបន្តទៀតថា គ្រោះថ្នាក់នេះបង្កឡើងដោយអ្នកបើកបររថយន្តពាក់ស្លាកលេខ កំពង់ចាម 3A-6255 បើកបរក្នុងល្បឿនលឿន និងខ្វះការប្រុងប្រយ័ត្ន បណ្តាលឲ្យបុករថយន្ត ពាក់ស្លាកលេខ រដ្ឋ 10 -2-0285 ពីក្រោយបណ្តាលឲ្យរងរបួសមនុស្សចំនួន០៤នាក់ (ស្រាល០៣នាក់ ធ្ងន់ម្នាក់ )និងខូចខាតរថយន្តចំនួន ០២គ្រឿង (ស្រាល០១គ្រឿង ធ្ងន់០១គ្រឿង )។

ក្រោយកើតហេតុ សមត្ថកិច្ចជំនាញបានបញ្ជូនជនរងគ្រោះទៅសង្គ្រោះនៅមន្ទីរពេទ្យបង្អែក ហើយប្រមូលវត្ថុតាងមករក្សាទុកនៅអធិការដ្ឋាននគរបាលស្រុកបន្ទាយស្រី ដើម្បីចាត់ការតាមនីតិវិធីបន្ត៕

ដោយ ៖ កុសល