លោក ជាម យៀប៖ អ្វីដែលមិនល្អសូមបោះចោលហើយរក្សាទុកអនុស្សាវរីយ៍ដែលល្អធ្លាប់សាងជាមួយគ្នាក្នុងវិស័យការងារ

អនុប្រធានទី១ រដ្ឋសភាលោកកិត្តិសេដ្ឋបណ្ឌិត ជាម យៀប បានថ្លែងអំណរគុណដល់មន្ត្រីអគ្គលេខាធិការដ្ឋារដ្ឋសភាដែលបានចូលនិវត្តន៍ទាំងអស់ ដែលធ្លាប់បានខិតខំបំពេញការងារកាលពីកន្លងមក និងសូមឱ្យពួកគេចងចាំនូវអនុស្សាវរីយ៍ការងារដែលល្អៗធ្វើជា​ក្ដីសុខផ្លូវចិត្តបន្ទាប់ពីចំណាយពេលដើម្បីជាតិមាតុភូមិអស់ជាច្រើនឆ្នាំមក។

ថ្លែងក្នុងពិធីសំណេះសំណាល និងសួរសុខទុក្ខជាមួយអតីតមន្រ្តីអគ្គលេខាធិការដ្ឋានរដ្ឋសភាដែលជានិវត្តជនកាលពីរសៀលថ្ងៃទី៧ ខែមករា ឆ្នាំ២០២៥ នៅវិមានរដ្ឋសភា លោកកិត្តិសេដ្ឋាបណ្ឌិត ជាម យៀប បានលើកឡើថាក្នុងជីវិតការងារជាមន្ត្រីរាជការមានទាំងល្អ និងមិនសូវល្អ ទោះជា​យ៉ាងណាសូមបោះចោលនូវអនុស្សាវរីយ៍ដែលមិនល្អហើយរក្សាអនុស្សាវរីយ៍ដែលល្អៗ ដែលមន្ត្រីធ្លាប់សាងជាមួយគ្នាដើម្បីជួយឱ្យយើងមានសេចក្ដីសុខ។

លោកក៏សង្ឃឹមថាមន្ត្រីដែលបានចូលនិវត្តន៍បន្ទាប់ពីទម្លាក់បន្ទុកការងារហើយមានវេលាច្រើនថែរក្សាសុខភាព ធ្វើលំហាត់ប្រាណដើម្បីសុខភាពល្អរឹងមាំនឹងបានជួបមុខគ្នារាល់ពិធីជួបជុំមន្ត្រីចូលនិវត្តន៍រាល់ឆ្នាំផងដែរ។

គួរឱ្យដឹងដែរថា អគ្គលេខាធិការដ្ឋានរដ្ឋសភា តែងតែរៀបចំកម្មវិធីជួបជុំមន្រ្តីរាជការនៃអគ្គលេខាធិការដ្ឋានរដ្ឋសភា ដែលបានចូលនិវត្តន៍ នៅរៀងរាល់ពិធីបុណ្យចូលឆ្នាំថ្មី ប្រពៃណីជាតិខ្មែរ។ ការជួបជុំនេះ ដើម្បីរឹតចំណងមិត្តភាព សាមគ្គីភាព ការតភ្ជាប់មនោសញ្ចេតនារវាងមន្រ្តីជំនាន់មុន ជាមួយមន្រ្តីរាជការបច្ចុប្បន្ន ប្រកបដោយសេចក្តីនឹករលឹក ភាពកក់ក្តៅ និងការគិតគូរដល់ អតីតមន្រ្តីរាជការដែលធ្លាប់មានគុណបំណាច់ ជាច្រើន ក្នុងការបម្រើអគ្គលេខាធិការដ្ឋានរដ្ឋសភា ក៏ដូចជាសង្គមជាតិទំាងមូលនាពេលកន្លងមក៕

អត្ថបទដោយ ហ៊ុន សិរីវឌ្ឍន៍