ព័ត៌មានជាតិ

សាលាមត្តេយ្យធនធាន សម្តេច ជា ស៊ីម បើកថ្នាក់កម្រិត “គ”១ ឡើងវិញ ក្រោយផ្អាកមួយរយៈដោយសារខ្វះគ្រូ

បានផុស

៥២ នាទីutes មុន

នៅ

ថ្ងៃពុធ ២៣ មេសា ២០២៥

ដោយ

តាមរយៈប្រធានមន្ទីរអប់រំខេត្តបាត់ដំបងបានប្រាប់កម្ពុជាថ្មីថា សាលាមត្តេយ្យធនធាន សម្តេច ជា ស៊ីម នៅក្រុងបាត់ដំបងដែលខ្វះគ្រូបង្រៀន ហើយត្រូវបានគណៈគ្រប់គ្រងសាលាសម្រេចរំសាយចោលថ្នាក់កម្រិត “គ”១ មួយថ្នាក់ ឥលូវនេះដោយមានការសម្របសម្រួលពីមន្ទីរអប់រំខេត្ត គណៈគ្រប់គ្រងសាលាបានបន្តបើកថ្នាក់បង្រៀនឡើងវិញ ដោយបែងចែកថ្នាក់ដែលខ្វះគ្រូបង្រៀន ទៅរៀននៅថ្នាក់ផ្សេងជាបណ្តោះអាសន្ន ខណៈមាតាបិតាសិស្សក៏បានឯកភាពគ្នានឹងរៃអង្គាសថវិកាសម្រាប់ឧបត្ថម្ភគ្រូស្ម័គ្រចិត្តមកបង្រៀនមួយរយះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក យី ស៊ុងគី ប្រធានមន្ទីរអប់រំ យុវជននិងកីឡាខេត្តបាត់ដំបងបានឲ្យកម្ពុជាថ្មីដឹងនៅថ្ងៃទី ២៣ ខែមេសានេះថា ក្រោយមានការដោះស្រាយបឋម មាតាបិតាសិស្សបានសម្តែងក្តីត្រេកអរចំពោះការបើកថ្នាក់បង្រៀនឡើងវិញ ដែលនឹងផ្តល់ឱកាសកូនចៅរបស់ពូកគាត់បានបន្តការសិក្សាតទៅទៀត។

ពាក់ព័ន្ធការឈប់បង្រៀនរបស់គ្រូដែលនាំឲ្យមានការរំសាយថ្នាក់ចោលនោះ ប្រធានមន្ទីរអប់រំ យុវជននិងកីឡាខេត្តបាត់ដំបងបានលើកមូលហេតុ ដោយសារគ្រូបង្រៀនដែលបង្រៀនមុនមានជំងឺ និងកំពុងសម្រាកព្យាបាល ហើយនៅពេលជាសះស្បើយ នឹងវិលមកបង្រៀនជាធម្មតាវិញ។

គួរបញ្ជាក់ថា ស្ត្រីជាគ្រូបង្រៀនម្នាក់ដែលបង្រៀនថ្នាក់មត្តេយ្យកម្រិត “គ”១ នៅសាលាមត្តេយ្យធនធានសម្តេច ជា សុីម ក្រោយចូលកងតូចវិញបន្ទាប់ពីបញ្ចប់ពិធីបុណ្យចូលឆ្នាំខ្មែរ បានឈប់មកបង្រៀនបន្តទៀត។ ក្រោយការឈប់មកបង្រៀនហើយដោយសារខ្វះខាតគ្រូ គណៈអ្នកគ្រប់គ្រងសាលាក៏បានជូនដំណឹងភ្លាមៗដល់មាតាបិតាសិស្សពីការសម្រេចរំលាយចោលថ្នាក់បង្រៀនមួយថ្នាក់នៅសាលាមត្តេយ្យធនធានសម្តេច ជា សុីម ដែលធ្វើឲ្យមាតាបិតាសិស្សបារម្ភពីការបាត់បង់ការសិក្សារបស់កូនៗបន្តទៀត៕

អត្ថបទ÷សៅ សារិទ្ធ

Related Topics:ខេត្តបាត់ដំបង