លោក វង្ស ពិសេន ផ្តាំមន្ត្រីគណបក្សបន្តជួយឧបត្ថម្ភដល់ពលរដ្ឋដែលមានជីវភាពខ្វះខាត

ក្នុងឱកាសដឹកនាំនូវកិច្ចប្រជុំបូកសរុបសកម្មភាពការងារបស់គណៈកម្មាធិការគណបក្សស្រុកពារាំង លោក វង្ស ពិសេន សមាជិកអចិន្រ្តៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារចុះមូលដ្ឋានស្រុកពារាំង បានផ្ដាំដល់មន្ត្រីគណបក្សបន្តជួយឧបត្ថម្ភដល់ប្រជាពលរដ្ឋដែលមានជីវភាពខ្វះខាតនៅតាមមូលដ្ឋាន។

កិច្ចប្រជុំដែលបានប្រព្រឹត្តិទៅនៅព្រឹកថ្ងៃទី២៦ ខែមេសា ឆ្នាំ២០២៥ នៅទីស្នាក់ការគណបក្សឃុំព្រៃស្រឡិត របស់ស្រុកពារាំង ខេត្តព្រៃវែង ដោយមានការចូលរួមពីមន្រ្តីក្រុមការងារគណបក្សចុះមូលដ្ឋានឃុំទាំង៩ និងក្រុមការងារគណបក្សចុះមូលដ្ឋានភូមិទាំង៩៣ លោក វង្ស ពិសេន បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់មន្រ្តីគណបក្សមូលដ្ឋាន និងមន្ត្រីក្រុមការងារគណបក្សចុះមូលដ្ឋានគ្រប់ថ្នាក់ ក្នុងការអនុវត្តការងារកន្លងទៅប្រកបដោយការយកចិត្តទុកដាក់ និងការទទួលខុសត្រូវខ្ពស់។

លោក វង្ស ពិសេន បានផ្តាំផ្ញើឱ្យមន្ត្រីគណបក្សបន្តពង្រឹងសាមគ្គីភាព និងក្រមសីលធម៌ការងារ អនុវត្តគោលនយោបាយភូមិឃុំមានសុវត្ថិភាព លុបបំបាត់ល្បែងស៊ីសង និងបន្តធ្វើវេទិកាសាធារណៈដើម្បីក្តាប់ជាប់សំណូមពរចាំបាច់របស់ពលរដ្ឋ និងដោះស្រាយតាមលទ្ធភាពជាក់ស្ដែង។ ជាមួយគ្នានេះ មន្ត្រីគណបក្សត្រូវខិតខំដោះស្រាយបញ្ហាទំនាស់ផ្សេងៗក្រៅប្រព័ន្ធតុលាការឱ្យអស់លទ្ធភាព ហើយបន្តធ្វើបច្ចុប្បន្នភាពគ្រប់គ្រងស្ថានភាពពលរដ្ឋ និងកម្លាំងនយោបាយដើម្បីពង្រឹងពង្រីកសមាជិកបក្សជាប់ជាប្រចាំ។

បន្ថែមលើសនេះ លោកប្រធានក្រុមការងារ ក៏បានជំរុញឱ្យបន្តទប់ស្កាត់រាល់ការបំផុសបំផុលខុសពីការពិតរបស់ក្រុមជ្រុលនិយម ដែលប៉ុនប៉ងបំបែក ចលាចលក្នុងសង្គម និងបានជំរុញឱ្យពលរដ្ឋមិនទាន់ចុះឈ្មោះបោះឆ្នោត ឱ្យទៅចុះឈ្មោះបោះឆ្នោតនៅក្នុងខែឧសភា ឆ្នាំ២០២៥ ខាងមុខឱ្យបានគ្រប់គ្នា៕