ច្រកទ្វារព្រំដែនអានសេះ នឹងបើកដំណើរការជាធម្មតាឡើងវិញ

ច្រកទ្វារព្រំដែនអានសេះ នឹងបើកដំណើរការជាធម្មតាឡើងវិញ ក្រោយភាគីថៃបានបិទច្រកព្រំដែននេះដោយឯកតោភាគី កាលពីថ្ងៃទី០១ ខែឧសភា។ នេះបើតាមសេចក្ដីជូនដំណឹងរបស់ទីស្នាក់ការត្រួតពិនិត្យច្រកទ្វារព្រំដែនអន្តរជាតិអានសេះ នៅព្រឹកថ្ងៃទី០២ ខែឧសភានេះ។

កាលពីថ្ងៃទី០១ ខែឧសភា ឆ្នាំ២០២៥ ភាគីថៃបានបិទច្រកទ្វារព្រំដែនអានសេះ ស្ថិតក្នុងភូមិអានសេះ ឃុំជាំក្សាន្ត ស្រុកជាំក្សាន្ត ខេត្តព្រះវិហារ ដោយឯកតោភាគីពីសំណាក់កម្លាំងសុរៈណារីថៃ ប្រចាំការនៅច្រកទ្វារព្រំដែនអានម៉ា (ភាគីថៃ)។

តែយ៉ាងណា នៅថ្ងៃទី០២ ខែឧសភា ឆ្នាំ២០២៥នេះ អាជ្ញាធរកម្ពុជា បានបញ្ជាក់ពីស្ថានភាពប្រក្រតីធម្មតានៅច្រកទ្វារព្រំដែនអានសេះនេះ ហើយដែលនឹងបើកដំណើរការដោះដូរទំនិញតាមគោលការណ៍ដែលបានឯកភាពគ្នាកន្លងមកដូចសព្វដង គឺរយៈពេល២ថ្ងៃក្នុង១សប្តាហ៍ ពោលគឺនៅថ្ងៃអង្គារ និងថ្ងៃព្រហស្បតិ៍។

អាជ្ញាធរកម្ពុជា បានបន្តអះអាងពីការរក្សាទំនាក់ទំនងយ៉ាងជិតស្និទ្ធជាមួយអាជ្ញាធរ និងកម្លាំងសមត្ថកិច្ចភាគីថៃ ដើម្បីរឹតចំណងកិច្ចសហប្រតិបត្តិការឱ្យកាន់តែល្អប្រសើរថែមទៀត។

ច្រកទ្វារព្រំដែនអានសេះ ជាច្រកដោះដូរទំនិញគ្នាបន្តិចបន្តួចរវាងប្រជាពលកម្ពុជា-ថៃ ដែលក្នុងនោះប្រជាពលរដ្ឋកម្ពុជានាំយកកសិផល និងអនុផលព្រៃឈើតាមរដូវកាលទៅលក់ឱ្យភាគីថៃ ជាអាទិ៍ ចុងផ្តៅ ផ្សិត ផ្លែស្វាយ ល្ពៅ ហើយខណៈភាគីថៃ មានលក់ទឹកសុទ្ធ ដូង មាន់ និងអីវ៉ាន់ចាបហួយមួយចំនួន។

កម្ពុជា ចាត់ទុកការបិទច្រកនេះ ថា គឺមិនមានភាគីណាមួយចំណេញនោះទេ ប៉ុន្តែផ្ទុយទៅវិញធ្វើឲ្យអាជីវករទាំងសងខាងកម្ពុជា-ថៃ មានការខាតបង់ផលប្រយោជន៍ ដែលតាមការពិនិត្យជាក់ស្តែងឃើញថា អាជីវករថៃ មានការខាតបង់ច្រើនជាង៕