ការ​កំណត់​បេីក​ទ្រូង​ផ្លូវ​លើ​កំណាត់ផ្លូវជាតិលេខ​៧ ស្គន់-កំពង់ចាម គឺ​ត្រូវ​បាន​បញ្ចប់

កំពង់ចាម ៖ លោក​លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគ្រប់គ្រងគម្រោងស្ថាបនាផ្លូវជាតិលេខ៧ជាបួនគន្លង ចាប់ពីរង្វង់មូលស្គន់ ដល់ រង្វង់មូលស្ពានគីហ្សូណា ខេត្តកំពង់ចាម និង​លោក​ អ៊ុន ចាន់ដា អភិបាលខេត្តកំពង់ចាម នៅព្រឹកថ្ងៃទី ២ ខែឧសភា ឆ្នាំ២០២៥ នេះ នៅសាលាខេត្តកំពង់ចាម បានដឹកនាំកិច្ចប្រជុំ ពិភាក្សាអំពីទីតាំងបើកទ្រូងផ្លូវ កំណាត់ផ្លូវជាតិលេខ ៧ ស្គន់-កំពង់ចាម ដើម្បីសុវត្ថិភាពចរាចរណ៍ និងសោភ័ណភាព បរិស្ថានបៃតងតាមដងផ្លូវ។

លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន និង​ជា​នាយក​គ្រប់​គ្រង​គម្រោង​ស្ថាបនា​ផ្លូវជាតិ​លេខ៧​ជា​បួនគន្លង ចាប់ពីរង្វង់មូលស្គន់ ដល់ រង្វង់មូលស្ពានគីហ្សូណា ខេត្តកំពង់ចាម បានមានប្រសាសន៍​ថា កិច្ច​ប្រជុំពិភាក្សា អំពីការធ្វើសួនចែកទ្រូងផ្លូវ និងការបើកទ្រូងផ្លូវ កំណាត់ផ្លូវជាតិលេខ ៧ ស្គន់-កំពង់ចាម នេះ គឺ​មាន​គោលបំណង​ឱ្យការធ្វើចរាចរណ៍តាមដងផ្លូវធានាឲ្យបាននូវសុវត្ថិភាពខ្ពស់ និង​បង្កើន​សោភ័ណភាព​បរិស្ថាន​បៃតង់​តាមដងផ្លូវ។

លោក​រដ្ឋលេខាធិការបានបញ្ជាក់ទៀតថា ដើមឡើយការបែងចែកទ្រូងផ្លូវ គឺលាបថ្នាំជាគំនូស បទឆ្វេង ឬបទស្ដាំ ប៉ុន្តែការធ្វើបែបនោះ មានករណីគ្រោះថ្នាក់ចរាចរណ៍កើតឡើងច្រើន។ ដូច្នេះហើយទើបមានការកែប្រែធ្វើជាសួនចែកទ្រូងផ្លូវវិញ ដោយមានបើកទ្រូងផ្លូវ ក្នុងកម្រិតណាមួយដើម្បីឲ្យចរាចរណ៍រលូន បញ្ជៀស​ការ​គ្រោះថ្នាក់បាត់បង់ជីវិត ដោយសារការធ្វើចរាចរណ៍នេះ។

លោក​រដ្ឋលេខាធិការបានសង្កត់ធ្ងន់ថា បេីសិនជាយេីងបេីកទ្រូងផ្លូវច្រេីនកន្លែងពេក អាចធ្វេី​ឱ្យសួនច្បារទ្រូងពុំមានប្រសិទ្ធិភាព ហេីយអាចបង្កការស្ទះចរាចរ គ្មានសោភណ្ឌភាព និងអត្រាគ្រោះថ្នាក់ តាមដងផ្លូវមួយនេះក៏ខ្ពស់ដែរ៕

អត្ថបទនិងរូបភាព ៖​ ឡេក​ ចាន់ពេជ្រ