បារាំង សន្យាពង្រីកថែមទៀតនូវការធ្វើពាណិជ្ជកម្មទ្វេភាគីជាមួយកម្ពុជា

បរិបទសង្គ្រាមពាណិជ្ជកម្មជាសកល បារាំង សន្យានឹងពង្រីកបន្ថែមទៀតនូវការធ្វើពាណិជ្ជកម្មជាមួយកម្ពុជា ពិសេសការពិនិត្យលទ្ធភាពនាំផលិតផលកម្ពុជាទៅកាន់ទីផ្សាបារាំងឱ្យកាន់តែច្រើន ខណៈឆ្នាំ២០២៤ កន្លងទៅ ពាណិជ្ជកម្មទ្វេភាគីកម្ពុជា-បារាំង កើនជាង៨%។ នេះជាការអះអាងរបស់ឯកអគ្គរដ្ឋទូតបារាំងប្រចាំកម្ពុជា លោក ហ្សាក់ ប៉ឺឡេ។

បើតាមលោកឯកអគ្គរដ្ឋទូត ក្នុងឆ្នាំ២០២៤កន្លងទៅ ការផ្លាស់ប្ដូរពាណិជ្ជកម្មទ្វេភាគីរវាងកម្ពុជា-បារាំង មានទំហំទឹកប្រាក់ខ្ទង់១,៤៨ពាន់លានអឺរ៉ូ (ស្មើប្រមាណ ១,៦៧ពាន់លានដុល្លារ) ពោលគឺបានកើនឡើង ​៨,៣​ភាគ​រយ ហើយក្នុងនោះ ភាគច្រើនជាការចេញផលិតផលរបស់កម្ពុជាទៅកាន់ប្រទេសបារាំង។

លើកឡើងនៅក្នុងកិច្ចពិភាក្សា ដែលរៀបចំឡើងដោយក្លិបអ្នកកាសែតកម្ពុជា នាព្រឹកថ្ងៃទី៥ ខែឧសភា ឆ្នាំ​២០២៥​ ក្រោមប្រធានបទ «ទំនាក់ទំនងការទូតកម្ពុជា-បារាំង និង​ការ​អភិវឌ្ឍ​នៅក​ម្ពុជា» លោក ហ្សាក់ ប៉ឺឡេ បានបញ្ជាក់ថា បារាំង ​​ជា​ប្រទេស​មុន​គេ​បង្អស់​ក្នុង​ចំណោម​ប្រទេសនៅសហគមន៍អឺរ៉ុប ដែលបានអនុញ្ញាត​ឱ្យ​នាំ​អង្ករ​កម្ពុជា​ទៅ​កា​ន់​ទីផ្សារ​បារាំង ជាមួយនឹងការនាំចូលផលិតផលវាយនភណ្ឌ។

«យើងនឹងព្យាយាមធ្វើយ៉ាងណាឱ្យមានពិពិធកម្មនាំផលិតផលកម្ពុជាបន្ថែមទៀតទៅកាន់ប្រទេសបារាំង»។ ជាការបន្ថែមរបស់លោកឯកអគ្គរដ្ឋទូត តាមរយៈអ្នកបកប្រែ។ ក្នុងជំនួបកាលពីដើមឆ្នាំ២០២៤ ក្នុងទីក្រុងប៉ារីស ប្រធានាធិបតីបារាំង លោក អេម៉ានុយអ៊ែល ម៉ាក្រុង និងនាយករដ្ឋមន្ត្រីកម្ពុជា សម្ដេចធិបតី ហ៊ុន ម៉ាណែត បានឯកភាពជំរុញបង្កើននូវទំហំពាណិជ្ជកម្ម​ទ្វេភាគីកើន​ទ្វេ​ដង ក្នុងឆ្នាំ២០៣០ខាងមុខ ដែលការណ៍នេះ លោកឯកអគ្គរដ្ឋទូត ហ្សាក់ ប៉ឺឡេ ជឿជាក់ថា កម្ពុជា-បារាំង នឹងអាចធ្វើបាន ដើម្បីសម្រេចតាមបំណងរបស់ខ្លួន។

បើតាមឯកអគ្គរដ្ឋទូតបារាំងរូបនេះ ក្រុមហ៊ុនបារាំងជាច្រើនទៀត បាននិងកំពុងស្វែងរកឱកាសបោះទុនវិនិយោគនៅក្នុងប្រទេសកម្ពុជាបន្ថែមទៀត ខណៈដែលបច្ចុប្បន្នវត្តមានក្រុមហ៊ុនប្រមាណ៤០០ក្រុមហ៊ុន កំពុងកាន់​កាប់ និង​គ្រប់​គ្រង​ដោយសហគ្រិនបារាំង និងសហគ្រិនបារាំង-កម្ពុជា៕

ដោយ៖ ធឿន វ៉ាន់សុង