ភរិយាលោក នេត្រ ភក្ត្រា ជួបសំណេះសំណាលចែកអំណោយប្រចាំខែជូន មន្ត្រីរាជការ និងមន្ត្រីជាប់កិច្ចសន្យា នៃក្រសួងព័ត៌មានប្រមាណ ៣០០ នាក់

លោកស្រី ទុយ សិរីរតនៈ នេត្រ ភក្ត្រា ប្រធាន​កិត្តិយស​សាខា​សមាគម​នារី​កម្ពុជា ដើម្បី​សន្តិភាព និង​អភិវឌ្ឍន៍ ក្រសួង​ព័ត៌មាន តំណាង លោក នេត្រ ភក្ត្រា រដ្ឋមន្ត្រី​ក្រសួង​ព័ត៌មាន កាលពី​ព្រឹក​ថ្ងៃ​ទី ៨ ខែ​ឧសភា ឆ្នាំ ២០២៥ នេះ បាន​អញ្ជើញ​ជួប​សំណេះសំណាល និង​ចែក​អំណោយ​ប្រចាំ​ខែ​ជូន​មន្ត្រី​រាជការ និង​មន្ត្រី​ជាប់​កិច្ចសន្យា នៃ​ក្រសួង​ព័ត៌មាន ចំនួន ៣០៣ នាក់ ជាប្រចាំ​ខែ ដែល​មាន​ការ​លំបាក​ក្នុង​ជីវភាព ស្ថិត​ក្នុង​ក្របខណ្ឌ​កម្មវិធី​គាំពារ​មន្ត្រីរាជការ។ អំណោយ​ទាំងនេះ​រួមមាន អង្ករ​ទម្ងន់ ២០ គីឡូក្រាម និង ត្រី​ខ​កំប៉ុង ១ យួរ។

ចាប់​តាំង​ពី​ដើម​អាណត្តិ​ទី ៧ នៃ​រាជរដ្ឋាភិបាល​កម្ពុជា ដែល​ដឹកនាំ​ដោយ សម្តេច​មហា​បវរ​ធិបតី ហ៊ុន ម៉ាណែត , លោក​រដ្ឋមន្ត្រី នេត្រ ភក្ត្រា បាន​យកចិត្តទុកដាក់ និង​គិតគូរ​ពី​ជីវភាព​របស់​មន្ត្រី ដោយ​ខិតខំ​កៀរគរ​រក​ជំនួយ​ផ្សេងៗ ដើម្បី​ឧបត្ថម្ភ​ជាប្រចាំ​ខែ​នូវ​អង្ករ និង​ត្រីខ​កំប៉ុង ជូន​ដល់​មន្ត្រី​មាន​ការ​លំបាក​ជីវភាព ដោយ​ក្នុង​មួយ​ខែៗ ផ្តល់​ជូន​របប​អង្ករ​ដល់​មន្ត្រី​ប្រមាណ ៣០០ នាក់។

នា​ឱកាស​នោះ​ដែរ លោកស្រី ទុយ សិរី​រតនៈ នេត្រ ភក្ត្រា បាន​ពាំនាំ​នូវ​ប្រសាសន៍​ផ្ដាំផ្ញើ​សាកសួរ​សុខ​ទុក្ខ​ពី​សំណាក់ លោក នេត្រ ភក្ត្រា ដែល​ជានិច្ចកាល​លោក​តែងតែ​គិតគូរ​ពី​សុខទុក្ខ ការ​លំបាក​របស់​រាជការ​ក្រោម​ឱវាទ​នៅ​គ្រប់​កាលៈទេសៈ​ទាំងអស់។ ជាពិសេស​ជាមួយ​នឹង​កិច្ច​ការងារ​មនុស្សធម៌​នេះ លោក​រដ្ឋមន្ត្រី បាន​ខិតខំ​ព្យាយាម​ស្វែងរក​អំណោយ​ផ្សេងៗ ពី​សំណាក់​បណ្ដា​សប្បុរសជន​នានា ដើម្បី​បរិច្ចាគ​នូវ​ធនធាន​ផ្ទាល់​ចូលរួម​ចំណែក​ជាមួយ​ក្រសួង​ព័ត៌មាន ក្នុង​ការ​សម្រួល​ដោះស្រាយ​ការ​លំបាក​ដល់​មន្ត្រីរាជការ​មាន​ជីវភាព​ខ្វះខាត និង​សំដៅ​ធ្វើ​យ៉ាងណា​ឲ្យ​មន្ត្រី​ទទួល​បាន​ភាព​កក់ក្ដៅ ចូលរួម​បំពេញ​ការងារ​បាន​ដោយ​រលូន​ជូន​ក្រសួង​ព័ត៌មាន ក៏ដូចជា​ការ​ចូល​រួម​បម្រើ​ជាតិ​មាតុភូមិ​កម្ពុជា ក្រោម​ម្លប់ នៃ​ដំបូល​សុខ​សន្តិភាព។

ក្នុងនាម លោក នេត្រ ភក្ត្រា និង​ថ្នាក់ដឹកនាំ មន្ត្រីរាជការ​ក្រសួង​ព័ត៌មាន , លោកស្រី ទុយ សិរី​រតនៈ នេត្រ ភក្ត្រា សូម​ថ្លែង​នូវ​អំណរគុណ​យ៉ាង​ជ្រាលជ្រៅ​ចំពោះ​បណ្តា​សប្បុរសជន​នានា ដែល​បាន​ឧបត្ថម្ភ​អំណោយ​ជា​អង្ករ ត្រីខ​កំប៉ុង គ្រឿង​ឧបភោគ បរិភោគ និង​សម្ភារៈ​ផ្សេងៗ ទៀ មក​ក្រសួង​ព័ត៌មាន។ ទឹកចិត្ត​ដ៏​ថ្លៃថ្លា​នេះ បាន​បង្ហាញ​ពី​មនោសញ្ចេតនា សេចក្ដី​រាប់អាន និង​ការ​យក​ចិត្ត​ទុក​ដាក់​ដល់​ជីវភាព​របស់​មន្ត្រីរាជការ​ក្រសួង​ព័ត៌មាន​ក្នុង​ការ​បំពេញ​ការងារ ជាពិសេស​ក្នុង​សកម្មភាព​រួម​ចំណែក​ដ៏​សំខាន់​លើ​កិច្ច​គាំពារ និង​ការងារ​មនុស្សធម៌​របស់​ក្រសួង​ព័ត៌មាន។

លោកស្រី ទុយ សិរី​រតនៈ នេត្រ ភក្ត្រា ប្រធាន​កិត្តិយស​សមាគម​នារី​សាខា​ក្រសួង​ព័ត៌មាន បាន​ជម្រាប​ជូន​ថា នៅ​ក្នុង​អាណត្តិ​ទី ៧ នេះ ក្រសួង​ព័ត៌មាន ក្រោម​ការ​ដឹកនាំ​របស់ លោក​រដ្ឋមន្ត្រី នេត្រ ភក្ត្រា បាន​ផ្តល់​ការ​គាំពារ​ដល់​មន្ត្រី​ជា​ប្រចាំ​ប្រមាណ ៣០០ នាក់ ក្នុង​មួយ​ខែ ដោយ​បាន​ផ្តល់​គ្រឿង ឧបភោគ​បរិភោគ​រួមមាន អង្ករ និង​ត្រីខ ដើម្បី​ជួយ​សម្រាល​ជីវភាព។

ជាមួយ​នេះ ក្រសួង​ព័ត៌មាន ក៏បាន​គិតគូរ​ខ្ពស់​ចំពោះ​សុខុមាលភាព និង​ជីវភាព​រស់នៅ​របស់​មន្ត្រី​រាជការ និង​អ្នកសារព័ត៌មាន ដោយ​ក្រសួង​ព័ត៌មាន បាន​សហការ​ជាមួយ​មជ្ឈមណ្ឌល​រោគវិនិច្ឆ័យ ប៊ី​យ៉ូ​មេ​ឌី​ក ដើម្បី​ទទួល​បាន​ការ​បញ្ចុះ​តម្លៃ ៣០% លើ​សេវា​ពិនិត្យ​សុខភាព​សម្រាប់​មន្ត្រីរាជការ​ក្រសួង​ព័ត៌មាន និង​អ្នកសារព័ត៌មាន រួម​ទាំង​ក្រុម​គ្រួសារ​ថែមទៀត​ផង​ដែរ៕