ព័ត៌មានជាតិ

កម្លាំងគណៈបញ្ជាការឯកភាពខណ្ឌ ៧ មករា បន្តចុះរៀបចំសណ្ដាប់ធ្នាប់ នៅផ្លូវព្រះសីហនុ

បានផុស

១ year មុន

នៅ

ថ្ងៃចន្ទ ១២ ឧសភា ២០២៥

ដោយ

កម្លាំងគណៈបញ្ជាការឯកភាពខណ្ឌ ៧ មករា បន្តយកចិត្តទុកដាក់ចុះរៀបចំសណ្ដាប់ធ្នាប់នៅកំណាត់ផ្លូវព្រះសីហនុ ក្បែរនឹងស្តុបអគារ ៤២ ជាន់ មូលដ្ឋានខណ្ឌ ៧ មករា និងមិនអនុញ្ញាតឲ្យបន្តលក់នៅមុខអគារ ទូរគមនាគមន៍កម្ពុជា ទៀតឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយមានការណែនាំពីសំណាក់ លោក ថេង សុថុល អភិបាលខណ្ឌ ៧ មករា អនុញ្ញាតឲ្យ លោក ណុប ផា អភិបាលរង ដឹកនាំកម្លាំងគណៈបញ្ជាការឯកភាពខណ្ឌ ៧ មករា ចុះត្រួតពិនិត្យ និងមិនអនុញ្ញាតដល់អាជីវករលក់ទុរេននៅកំណាត់វិថីព្រះសីហនុបន្តការធ្វើអាជីវកម្មយ៉ាងអនាធិបតេយ្យ បង្កភាពរញ៉េរញ៉ៃ ធ្វើឲ្យខូចសណ្ដាប់ធ្នាប់សាធារណៈ និងប៉ះពាល់សោភ័ណភាពទីតាំងអគារទូរគមនាគមន៍កម្ពុជាទៀតទេ។

លោក ណុប ផា អភិបាលរងខណ្ឌ ៧ មករា បានឲ្យដឹងថា កម្លាំងគណៈបញ្ជាការឯកភាពខណ្ឌ នឹងចុះត្រួតពិនិត្យមើលជាប់ជាប្រចាំ តាមកំណាត់វិថីព្រះសីហនុ ទាំងអាជីវករលក់ទុរេន អាជីវករលក់គុយទាវ បាយឆា និងអាជីវករលក់ដូរម៉ូតូជាដើម ដើម្បីរក្សាសណ្ដាប់ធ្នាប់សាធារណៈ បរិស្ថានអនាម័យ ឲ្យមានភាពល្អប្រសើរ និងសូមឲ្យក្រុមអាជីវករទាំងអស់ប្រកបអាជីវកម្មតាមការអនុញ្ញាតរបស់អាជ្ញាធរ ជាពិសេសតាមការ៉ូឡាពណ៌លឿង កំណត់ព្រំ មានស្រាប់។

គួរជម្រាបថា កាលពីវេលាម៉ោង ៦ និង ៣០ នាទីល្ងាច ថ្ងៃទី ៧ ខែឧសភា ឆ្នាំ ២០២៥ រដ្ឋបាលខណ្ឌ ៧ មករា បានចុះអប់រំ និងធ្វើកិច្ចសន្យាដោយទុករយៈពេល ៣ ថ្ងៃ ដល់ក្រុមអាជីវករលក់ទុរេន ឲ្យបញ្ឈប់ការធ្វើអាជីវកម្មលក់នៅកំណាត់វិថីព្រះសីហនុនេះ។

សូមបញ្ជាក់ថា ទីតាំងដែលក្រុមអាជីវករលក់ទុរេននោះ ស្ថិតនៅមុខអគារទូរគមនាគមន៍កម្ពុជា ជាសហគ្រាសសាធារណៈរបស់រដ្ឋ មានអាសយដ្ឋានលេខ ៩៥-៩៧ វិថីព្រះសីហនុ កែងផ្លូវ ១០៥ ភូមិ ១ សង្កាត់បឹងព្រលឹត ខណ្ឌ ៧ មករា រាជធានីភ្នំពេញ។

លោកអភិបាលរងខណ្ឌ ៧ មករា បានបញ្ជាក់ថា ដោយមានការសំណូមពរពី អគ្គាធិការដ្ឋាន នៃទូរគមនាគមន៍កម្ពុជា ដល់អាជ្ញាធរមូលដ្ឋាន ពីបញ្ហាក្រុមអាជីវករលក់ទុរេនធ្វើអាជីវកម្មការចតរថយន្ត ឬរទេះ និងតាំងលក់ដូរ យ៉ាងអនាធិបតេយ្យ បង្កភាពរញ៉េរញ៉ៃ ធ្វើឲ្យខូចសណ្ដាប់ធ្នាប់សាធារណៈ និងប៉ះពាល់ដល់សោភ័ណភាពទីតាំងអគារ សុំឲ្យបញ្ឈប់ការលក់ដូរបែបនេះ និងសំណូមពរឲ្យទៅរកទីតាំងផ្សេង៕

អត្ថបទ ៖ ម៉េង