ព័ត៌មានអន្ដរជាតិ

យោធារបបសឹកមីយ៉ាន់ម៉ាវាយប្រហារតាមអាកាសបណ្តាលឱ្យជនស៊ីវិល៤នាក់ស្លាប់

បានផុស

១ year មុន

នៅ

ថ្ងៃពុធ ២១ ឧសភា ២០២៥

ដោយ

យោធារបស់របបសឹកមីយ៉ាន់ម៉ា បានវាយប្រហារតាមអាកាសទៅលើភូមិ Nwe Inn ក្នុងក្រុង Pale តំបន់ Sagaing ដែលបណ្តាលឲ្យជនស៊ីវិល៤នាក់ស្លាប់ ក្នុងនោះមានកុមារ២នាក់ និងរបួសជាច្រើននាក់ទៀត។ នេះបើយោងតាមការចេញផ្សាយរបស់ Mizzima នៅថ្ងៃទី២០ខែឧសភានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារនេះបានកើតឡើងនៅវេលាម៉ោងប្រហែល ១២ និង ៤០នាទីថ្ងៃត្រង់កាលពីថ្ងៃទី១៨ខែឧសភា ដោយយន្តហោះចម្បាំងយោធាពីរគ្រឿងបានទម្លាក់គ្រាប់បែកចំនួន ៣គ្រាប់លើផ្នែកផ្សេងៗនៃភូមិ។ ការបំផ្ទុះបានសម្លាប់សិស្សថ្នាក់ទី៦ម្នាក់និងសិស្សថ្នាក់ទី ១២ម្នាក់ ព្រមទាំងស្ត្រីពេញវ័យពីរនាក់។ កុមារអាយុ២ឆ្នាំម្នាក់ស្ថិតក្នុងចំណោមអ្នករងរបួស៦នាក់ ដែលរងរបួសធ្ងន់ធ្ងរ។

នៅថ្ងៃដដែលនោះ ការវាយប្រហារតាមផ្លូវអាកាសមួយទៀតក៏បានវាយប្រហារភូមិ Lake Kya តំបន់Thabeikkyin ទីក្រុង Mandalay បណ្តាលឲ្យជនស៊ីវិលពីរនាក់ទៀតរងរបួស និងបំផ្លាញផ្ទះចំនួនបីផងដែរ។

ការវាយប្រហារដ៏ឃោរឃៅនេះគឺជាឧទាហរណ៍មួយនៃការកើនឡើងនៃអំពើហិង្សា និងការកំណត់គោលដៅជាប្រព័ន្ធនៃតំបន់ជនស៊ីវិលដោយរបបយោធា ទោះបីជាមិនមានជម្លោះសកម្មក៏ដោយ។

គួរបញ្ជាក់ថាចាប់ពីថ្ងៃទី ០១ដល់ថ្ងៃទី ១៥ខែឧសភា ការវាយប្រហារតាមអាកាសរបស់រដ្ឋាភិបាលត្រូវបានគេរាយការណ៍ថាបានសម្លាប់មនុស្សយ៉ាងហោចណាស់ ១២៦នាក់ និងរបួសជាង ៣០០ នាក់នៅទូទាំងប្រទេស។

របបយោធាមីយ៉ាន់ម៉ា នៅតែបន្តប្រើការវាយលុកតាមអាកាសជាយុទ្ធសាស្ត្រដ៏សំខាន់ប្រឆាំងនឹងជាមួយកងកម្លាំងតស៊ូ ដែលជារឿយៗបណ្តាលឱ្យមានជនស៊ីវិលបាត់បង់ជីវិត។ ទោះបីជាមានការថ្កោលទោសអន្តរជាតិ និងការចោទប្រកាន់កាន់តែខ្លាំងឡើងពីការបំពានច្បាប់មនុស្សធម៌អន្តរជាតិក៏ដោយ ក៏របបយោធាមិនបង្ហាញសញ្ញានៃការអត់ធ្មត់ និងនៅតែបន្តធ្វើឲ្យប្រជាជនមីយ៉ាន់ម៉ាកាន់តែឈឺចាប់៕