មន្ត្រីជំនាញស្ទាក់ចាប់ពងមាន់១៨០០០គ្រាប់ នាំចូលពីប្រទេសវៀតណាមខុសច្បាប់

មន្ត្រីជំនាញនៃអគ្គដ្ឋានសុខភាពសត្វ និងផលិតកម្មសត្វ បានប្រដេញស្ទាក់ចាប់រថយន្ត១គ្រឿងដែលលួចនាំចូលពងមាន់ខុសច្បាប់ចំនួន១៨០០០គ្រាប់ពីប្រទេសវៀតណាម។

ប្រតិបត្តិការបង្រ្កាបនេះបានធ្វើឡើងកាលពីវេលាម៉ោង១១និង៣៥នាទីយប់ ថ្ងៃទី២១ ខែឧសភា ឆ្នាំ២០២៥ នៅចំណុចតាមបណ្តោយផ្លូវជាតិលេខ១ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ។

តាមការបញ្ជាក់ពីក្រុមអន្តរាគមន៍បង្ក្រាបបទល្មើសចលនាសត្វ បានអោយដឹងថា កំឡុងពេលល្បាតនៅតាមដងផ្លូវជាតិលេខ១ បានប្រទះឃើញរថយន្តមួយគ្រឿងម៉ាក SSANGYONG ISTANA ដោយមានការសង្ស័យកម្លាំងជំនាញបានបញ្ចេញរថយន្តប្រដេញស្ទាក់ចាប់បាននៅចំណុចសង្កាត់ព្រែកឯង ភ្លាមៗ។ កម្លាំងបានត្រួតពិនិត្យឆែកឆេររកឃើញស៊ុតមាន់ចំនួន ៦០ដុំ ស្មើនឹង១៨០០០គ្រាប់ ដោយដឹកចេញពីប្រទេសវៀតណាម តាមច្រករបៀង ស្រុកព្រះស្ដេច ខេត្តព្រៃវែង ដើម្បីយកមកលក់ និងចែកចាយនៅរាជធានីភ្នំពេញ ដោយគ្មានលិខិតអនុញ្ញាត។

ក្រោយពីឆែកឆេ កម្លាំងជំនាញបាននាំយកវត្ថុតាង ទៅរក្សាទុកនៅចត្តាឡីស័ក របស់អគ្គដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនីតិវិធីច្បាប់៕

អត្ថបទ៖ រដ្ឋា