កូនស្រីច្បងស្អាត​ដូចម្តាយ​របស់តួហុងកុង​នាង​ Chingmy ជួលអង្គរក្សតាមការពារតាំងពីក្មេង

នាង Ayla Sham Yuet ដែលជាកូនស្រីច្បងរបស់អតីតតារាសម្តែងជើងចាស់ Chingmy Yau មានរហស្សនាម «ទេវតាកម្សាន្តហុងកុង» នៃទសវត្សរ៍ទី ៨០ទៅ៩០ ខណៈដែលសម្រស់​ដ៏​ផូរផង់​របស់នាងបានបន្សល់ទុកតាំងពីម្តាយរហូតដល់កូនស្រី។ ​​​មិនតែប៉ុណ្ណោះ​ ក្មេងជំទង់រូបនេះ ត្រូវ​ឪពុកម្ដាយជួល​អង្គរក្ស​ឲ្យ​តាមមើលថែរ​តាំង​ពី​នៅ​ក្មេង ដើម្បីទប់ទល់នឹងការយកចិត្តទុកដាក់ហួសហេតុពីសាធារណជន។

Ayla Sham Yuet កើតនៅឆ្នាំ១៩៩៩ នាងគឺជាកូនស្រីច្បងរបស់អ្នកនាង Chingmy Yau និងមហាសេដ្ឋីម៉ូដលោក Sham Kar-wai ។ ថ្វីដ្បិតតែម្តាយរបស់នាង ឈប់ប្រឡូកក្នុងវិស័យសិល្បៈអស់រយៈពេលជាច្រើនឆ្នាំក៏ដោយ ប៉ុន្តែកេរ្តិ៍ឈ្មោះរបស់គាត់ក្នុងនាមជាអតីតតារាភាពយន្តដ៏ល្បីម្នាក់ និងជាបេក្ខភាពចុងក្រោយទាំង ១២ នាក់ក្នុងកម្មវិធីប្រកួតបវរកញ្ញាហុងកុង នៅតែត្រូវបានមហាជនចងចាំជានិច្ច។

កូន​ស្រី​ច្បងរូបនេះត្រូវ​បាន​គេ​ដាក់​ឈ្មោះ​ថា​ជា តារា​ម៉ូដែល​ទទួលសម្រស់ពី​ម្ដាយ ជាមួយ​នឹង​មុខ​មាត់ដ៏​ផ្អែម​ល្ហែម ស្បែក​ស​ភ្លឺ​ថ្លា ភ្នែក​មូល​ធំ រោមភ្នែក​វែង ច្រមុះ​ខ្ពស់ និង​ស្នាម​ញញឹម​ដ៏​ល្អ​ឥត​ខ្ចោះ ដែលទស្សនិកជនជាច្រើនសុទ្ធតែនិយាយដូចៗគ្នាថា ស្លឹកឈើជ្រុះមិនឆ្ងាយពីគល់ទេ។

ទោះបីជាកើតក្នុងគ្រួសារដ៏ល្បីមួយ ប៉ុន្តែក្មេងជំទង់បានបង្ហើបថា កុមារភាពរបស់នាងមិនងាយស្រួលដូចមនុស្សជាច្រើនគិតនោះទេ។ Sham Yuet បានប្រាប់ទស្សនាវដ្តី Prestige ថា «នៅសាលាបឋមសិក្សា ខ្ញុំត្រូវបានអ្នកថតរូប paparazzi ថតរូបជារៀងរាល់ថ្ងៃ។ មានបុរសចម្លែកម្នាក់កាន់កាមេរ៉ាធំរង់ចាំនៅមុខសាលា វាគួរឲ្យខ្លាចណាស់។ ខ្ញុំគ្រាន់តែចង់ក្លាយជាក្មេងធម្មតាម្នាក់ប៉ុណ្ណោះ»។

កេរ្តិ៍​ឈ្មោះ​ដែល​មិន​មាន​ការ​ចង់​បាន ​ធ្វើ​ឲ្យឪពុក​ម្តាយត្រូវបង្ខំចិត្តជួល​អង្គរក្ស​ផ្ទាល់​ខ្លួន​ ដើម្បី​ការពារ​កូន​ស្រី​របស់​ពួក​គេ ប៉ុន្តែ​វា​បាន​ធ្វើ​ឲ្យនាង​កាន់​តែ​ក្លាយ​ជា​គោលដៅ​នៃ​ការ​យក​ចិត្ត​ទុក​ដាក់​និង​ការ​សម្លុត​ពី​មិត្ត​រួម​សាលា​​ថែម​ទៀត។ នៅទីបំផុតនាងត្រូវផ្ទេរសាលារៀនដើម្បីគេចពីសម្ពាធដ៏ធ្ងន់មួយនោះ។

បន្ទាប់មក រូបនាងបានបន្តការសិក្សានៅសាកលវិទ្យាល័យ British Columbia ក្នុងទីក្រុង Vancouver ប្រទេសកាណាដា ជំនាញផ្នែកចិត្តវិទ្យា និងភាសាជប៉ុន។ ប៉ុន្តែ​នៅ​តែ​មិន​អាច​គេច​ផុត​ពី​ការ​រិះគន់​ថា​ «​ពេល​ចូល​សកលវិទ្យាល័យ​ក៏​នៅ​មាន​អ្នក​ស្គាល់​ខ្ញុំ​ដែរ បើ​ទោះ​ជា​ខ្ញុំ​មិន​ដែល​និយាយ​ពី​ខ្លួន​ឯង​ក៏​ធ្វើ​ឲ្យ​ខ្ញុំ​មិន​សូវ​ហ៊ាន​ស្និទ្ធស្នាល​ជាមួយ​អ្នក​ណា​ដែរ ព្រោះ​ខ្ញុំ​មិន​ច្បាស់​ថា​ គាត់​ចាប់​អារម្មណ៍​ខ្ញុំ ​ឬ​ក៏​ដោយ​ខ្ញុំ​ជា​កូន​អ្នក​ផ្សេង»។

ទោះ​បី​ជា​មាន​អតីតកាល​ដែលពិបាកគេចភ្នែកពីមហាជន ប៉ុន្តែ តារាមូដែលវ័យក្មេងនៅតែអាច​ឈាន​ជើង​ទៅ​កាន់​ឆាក​ពិភព​ម៉ូដ​ពិភព​លោក​ដោយ​ជោគជ័យ។ នាង​បាន​ឡើង​លើ​ក្រប​ទស្សនាវដ្ដី​ដ៏​ល្បី​មួយ ហើយបានដើរម៉ូដនៅឯកម្មវិធី London Fashion Week រហូតដល់ត្រូវគេទទួលស្គាល់ថា ជាតារាម៉ូដែលថ្មីដែលលេចធ្លោជាងគេនៅអាស៊ី។

មិនតែប៉ុណ្ណោះ ជីវិតរបស់នាងគឺប្រណិតដូចតារាហូលីវូដ។ នាងរស់នៅក្នុងសំណង់ដ៏ល្បី K11 ARTUS ដែលជាខុនដូប្រណិតមួយនៅកណ្តាលទីក្រុងហុងកុង។ តម្លៃជួលគឺចន្លោះពី៥៧,០០០ ទៅ ៣២០,០០០ ក្នុងមួយខែ។

ថ្វី​បើ​ស្ថិត​ក្នុង​ត្រកូល​អ្នក​មាន​និង​ល្បី​ឈ្មោះ ប៉ុន្តែ Sham Yuet មាន​អាកប្បកិរិយា​គួរឲ្យសរសើរ។ នាងចាត់ទុកម្តាយរបស់នាងជាគំរូនៅក្នុងជីវិត។ នាងក៏រស់នៅក្នុង​រូបភាព​របស់​ក្មេង​ស្រី​ម្នាក់​ដែល​ត្រូវ​ធំ​ឡើង​ក្រោម​សម្ពាធ ភាពឯកា និងការរំពឹងទុក ប៉ុន្មានថ្ងៃនេះ នាងចាប់ផ្តើមបើកចំហកាន់តែច្រើន បង្កើតមិត្តថ្មីក្នុងពិភពម៉ូដ និងបង្ហាញភាពជឿជាក់ក្នុងកម្មវិធីសង្គម ដែលពីមុនមក នាងធ្លាប់ចង់លាក់ខ្លួនពីសង្គម ប៉ុន្តែឥឡូវនេះនាងកំពុងរៀនស្រឡាញ់ និងទទួលយកខ្លួនឯងថា ខ្លួនជានរណា។ មិនមែនជាអ្វីដែលអ្នកដទៃរំពឹងទុកនោះទេ។”

យ៉ាងណា តារាស្រីវ័យក្មេង Shen Yue គឺជាតំណាងរបស់យុវនារីជំនាន់ថ្មី ដែលមិនត្រឹមតែកើតមកមានសំណាង ប៉ុន្តែនាងបានជ្រើសរើសធំឡើងដោយកម្លាំង និងភាពទន់ភ្លន់ក្នុងពេលតែមួយ ដើម្បីជារូបតំណាងឲ្យឪពុកម្ដាយដែលមានរហស្សនាមថាទេវតាកម្សាន្តហុងកុង៕

អត្ថបទ៖ សាង ស្រីល័ក្ខ

ចុចអាន៖ត្រូវគេហាមមិនឲ្យរកលុយពីសិល្បៈ ៧ឆ្នាំ ប៉ុន្តែ​នាង Fan Bingbing នៅតែរស់យ៉ាងរំភើយ ពីចំណូលខ្ទង់​លានដុល្លារ