ព័ត៌មានជាតិ

លោកស្រី មិថុនា ភូថង វាយគង និងទូងស្គរ ក្រើនរំលឹកពលរដ្ឋពីជំងឺកូវីដ១៩

បានផុស

៥ years មុន

នៅ

ថ្ងៃចន្ទ ២៩ មីនា ២០២១

ដោយ

អភិបាលខេត្តកោះកុង លោកស្រី មិថុនា ភូថង យប់ថ្ងៃទី២៨ មីនា បានចូលរួមកម្មវិធីសូត្រមន្ត និងទូងស្គរ វាយគងជាមួយព្រះសង្ឃ ដើម្បីជាសាររំលឹកប្រជាពលរដ្ឋ ក្នុងការចូលរួមបង្ការ និងទប់ស្កាត់ការឆ្លងរីករាលដាលនៃជំងឺកូវីដ១៩។

តបតាមអនុសាសន៍ណែនាំសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានស្នើឲ្យគ្រប់វត្តអារាមទាំងអស់នៅទូទាំងប្រទេស ទូងស្គរ វាយជួង ព្រមៗគ្នា ក្នុង១ថ្ងៃ ៥ដង គោរពតាមវិធានការណ៍ «៣ ការពារ និង ៣កុំ»។

លោកស្រី មិថុនា ភូថង អភិបាលខេត្តកោះកុង និងព្រះលក្ខណ៍មុនី វង្ស ពិជ័យ ព្រះមេគណ គណៈធម្មយុត្តខេត្តកោះកុង អញ្ជីញសូត្រធម៌ វាយគង ទូងស្គរ ព្រមគ្នា ជាសញ្ញាផ្សព្វផ្សាយព័ត៌មានដល់ប្រជាពលរដ្ឋ ពុទ្ធបរិស័ទ នៅវត្តទេពនិមិត្ត ហៅវត្តថ្មី ស្ថិតនៅភូមិ៣ សង្កាត់ស្មាច់មានជ័យ ក្រុងខេមរភូមិន្ទ ក្នុងគោលបំណងបង្កើនការប្រុងប្រយ័ត្នខ្ពស់ ដោយអនុវត្តនូវវិធានការ ៣ការពារ និង ៣កុំ របស់ប្រមុខរាជរដ្ឋាភិបាល។

លោកស្រី ក៏បានបួងសួងដល់បារមីវត្ថុសក្ដិសិទ្ធិ ទាំងឡាយទាំងពួងលើលោកនេះ សូមជួយថែរក្សាដល់ប្រជាពលរដ្ឋរក្នុងខេត្តកោះកុង ព្រមទាំងប្រជាពលរដ្ឋ នៅទូទាំងប្រទេស សូមឲ្យជួបសេចក្តីសុខ សន្តិភាព និងសេចក្តីចម្រើនគ្រប់ៗគ្នាជារៀងរហូត។

ចំណែកឯពុទ្ធបរិស័ទ និងប្រជាពលរដ្ឋ ថ្លែងអំណរព្រះគុណយ៉ាងជ្រាលជ្រៅប្រគេនចំពោះព្រះលក្ខណ៍មុនី វង្ស ពិជ័យ ព្រះមេគណ គណៈធម្មយុត្តខេត្តកោះកុង ដែលបានយកព្រះទ័យទុកដាក់រៀបចំពិធីនេះ និងសូមអរគុណ យ៉ាងជ្រាលជ្រៅជាទីបំផុតចំពោះលោកស្រី មិថុនា ភូថង អភិបាល នៃគណ:អភិបាលខេត្តកោះកុង ដែលបានឆ្លៀតឱកាសផ្តល់កិត្តិយសចូលរួមពិធីដ៏មានសារៈសំខាន់នេះ៕

អត្ថបទ៖ សិរីវឌ្ឍនៈ

សូមចុចអាន៖ ទូងស្គរ ក្នុងវត្ត ឧណ្ណាលោម ដើម្បីក្រើនរំលឹកដល់ពលរដ្ឋនូវវិធានការ«៣កុំ៣ការពារ»ខណៈកូវីដ១៩កំពុងរីករាលដាលគួរបារម្ភបំផុត