មន្ទីរទេសចរណ៍ខេត្តក្រចេះ រៀបចំ​កម្មវិធី​ ១ យប់ ២ថ្ងៃ នាំ​ទេសចរ​​ដើរកម្សាន្ត​គោលដៅ​ទេសចរណ៍​ល្បីៗរដូវកាល​បៃតង

មន្ទីរទេសចរណ៍ខេត្តក្រចេះ បានរៀបចំកម្មវិធីដំណើរកម្សាន្ត​ថ្មីមួយសម្រាប់ជូនភ្ញៀវទេសចរជាតិ និងអន្តរជាតិ ដែលមានបំណងចង់មកលេងកម្សាន្ត​ខេត្ត​ក្រចេះ នារដូវបៃតង ដែលមានរយៈពេល ១យប់ ២ថ្ងៃ ឆ្ពោះទៅកាន់តំបន់អេកូរទេសចរណ៍​ល្បីៗក្នុងខេត្តក្រចេះ។

លោក ចាន់ សុគន្ធី ប្រធានមន្ទីរទេសចរណ៍ខេត្តបានឲ្យដឹងថា ការ​រៀបចំឲ្យមានកម្មវិធីដំណើរកំសាន្ត ១យប់ ២ថ្ងៃ ក្នុងគោលបំណង ជម្រុញផ្សព្វផ្សាយសក្តានុពលទេសចរណ៍ថ្មីៗ ចូលរួមបំផុសចលនា ទេសចរណ៍ក្នុងស្រុក និងចូលរួមកិច្ចការពារធនធានធម្មជាតិទន្លេមេគង្គ។

លោក បានបន្តថា សម្រាប់ថ្ងៃទី០១ នៃដំណើរកម្សាន្ត ភ្ញៀវទេសចរជាតិ និងអន្តរជាតិ ទៅទស្សនាវត្តវិហារបុរាណ រកាកណ្ដាល និងផ្ទះសសរ ១០០ នៅក្នុងក្រចេះ ដើម្បីសិក្សាស្វែងយល់ពីប្រវត្តិវិហារបុរាណ ប្រវត្តិផ្ទះសសរ ១០០ គយគន់មើលរចនាបថខ្មែរដ៏ស្រស់ស្អាតនៃវិហារបុរាណ និងផ្ទះសសរ ១០០។ ភ្ញៀវទេសចរ​ក៏​បាន​​ធ្វើ​ដំណើរទៅកាន់សហគមន៍ ទេសចរធម្មជាតិកោះទ្រង់ ដែលមានទីតាំងនៅទល់មុខទីរួមខេត្តក្រចេះ ដោយធ្វើដំណើរឆ្លងទឹកទន្លេមេគង្គតាមរយៈដចម្លង ដើម្បីស្វែងយល់ពីប្រវត្តិនៃការកកើតសហគមន៍ កោះទ្រង់ និងការធ្វើដំណើរកំសាន្តជុំវិញកោះដោយប្រើមធ្យោបាយ ជិះកង់ ម៉ូតូ រទេះសេះ រទេះគោ និងរ៉ឺម៉កកង់បី មើលទេសភាពលើកោះ សួនបន្លែ និងដើមរការដ៏ធំ ដែលមានអាយុ កាលរាប់រយឆ្នាំ រៀនធ្វើម្ហូបបែបសហគមន៍ ជាពិសេស គឺបានស្វែងយល់ពី ជីវភាព ការរស់នៅរបស់ប្រជាពលរដ្ឋនៅលើកោះទ្រង់នោះតែម្តង។

នៅពេលរសៀល ភ្ញៀវទេសចរបានបន្ត​ទៅ​ទស្សនាសម្រស់ដ៏ស្រស់ត្រកាលនៃក្រុងក្រចេះ ថ្ងៃលិច និងអគាររចនាបថបារាំង និងការស្នាក់នៅមួយយប់នៅទីរួមខេត្តតែម្តង។

លោកបន្ត​ថា សម្រាប់ថ្ងៃទី០២ ភ្ញៀវ​ទេសចរ​ក៏​បាន​បន្តទៅទស្សនាសត្វផ្សោតទន្លេមេគង្គ នៅអន្លង់ផ្សោតកាំពី ក្នុងស្រុកចិត្របុរី តាមផ្លូវខេត្តលេខ ៣៧៧ តាមមាត់ទន្លេមានចម្ងាយប្រមាណជា ១៥ គីឡូម៉ែត្រពីទីរួមខេត្ត ដែល​ទើបនឹងស្ថាបនាក្រាលកៅស៊ូរួចរាល់ទាំងស្រុង។ បន្ទាប់ពីទស្សនាសត្វផ្សោតរួច ភ្ញៀវទេសចរបានបន្តដំណើរឆ្ពោះទៅកាន់រមណីយដ្ឋានប្រវត្តិសាស្ត្រ វិមានរណសិរ្ស ២ធ្នូ នៅស្រុកស្នួល ដោយ​ធ្វើដំណើរតាមផ្លូវជាតិលេខ៧ មានចម្ងាយប្រមាណជា ៨៦ គីឡូម៉ែត្រ រួមទាំងបានទៅទស្សនាសកម្មភាពចរាចរណ៍របស់ភ្ញៀវចេញ ចូលតាមច្រកទ្វារ អន្តរជាតិត្រពាំងស្រែ បង្គោលព្រំដែន​លេខ​៦៩ និងផ្លូវក្រវាត់ព្រំដែនប្រវែង ១០៣,៧ គីឡូម៉ែត្រ៕

អត្ថបទ៖ ប្រុញ វិធិន