សភាពការណ៍នៅព្រំដែនកម្ពុជា-ថៃ សម្តេចតេជោ ស្នើឱ្យពលរដ្ឋជឿជាក់លើសមត្ថភាពរដ្ឋាភិបាល

ពាក់ព័ន្ធសភាពការណ៍នៅតាមព្រំដែនកម្ពុជា-ថៃ សម្តេចតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភា បានស្នើសុំឱ្យប្រជាពលរដ្ឋមានការស្ងប់ចិត្ត ជឿជាក់ទៅលើសមត្ថភាពរបស់រាជរដ្ឋាភិបាល និងកងកម្លាំងប្រដាប់អាវុធរបស់យើង ក៏ដូចជាជឿជាក់ទៅលើលទ្ធភាពនៃការដោះស្រាយបញ្ហានេះ តាមរយៈនៃការចរចា ជាជាងការដោះស្រាយនៃកម្លាំងប្រដាប់អាវុធ ។

អញ្ជើញថ្លែងសារពិសេស នៅព្រឹកថ្ងៃទី ២៩ ខែឧសភានេះ សម្តេចតេជោ បានសម្តែងការព្រួយបារម្ភថា អ្វីដែលគួរឱ្យខ្លាចបំផុតគឺព័ត៌មានក្លែងក្លាយ អុជអាល ដែលនាំទៅដល់សង្គ្រាមរវាងប្រទេសទាំងពីរ ក៏ដូចជាការសំអុកជាតិសាសន៍ ដែលធ្វើឱ្យប្រទេសទាំងពីរបាត់បង់នូវផលប្រយោជន៍ដែលទាញយកទំនាក់ទំនងសហប្រតិបត្តិការល្អ។

សម្តេចបញ្ជាក់ថា៖«ពិតមែនហើយព្រឹត្តិការណ៍ដែលគួរឱ្យសោកស្តាយ ដែលបានកើតឡើងនៅក្នុងពេលវេលាដែលមានយុទ្ធជនយើងមរណភាព ពលីកម្មដោយសារការបាញ់ប្រហារក្នុងការវាយឆ្មក់ ដោយសារទាហានម្ខាងទៀត វាជារឿងដែលគួរត្រូវចៀសវាង។ ប៉ុន្តេរឿងនេះ ខ្ញុំគួរតែត្រូវបញ្ជាក់បន្តិច ការចល័តកម្លាំងទៅតាមព្រំដែន ការចល័តកម្លាំងទ័ព និងអាវុធធន់ធ្ងន់ទៅកាន់ព្រំដែន មិនមែនទៅដើម្បីធ្វើសង្គ្រាមទេ ប៉ុន្តែគឺជាត្រៀមបម្រុងទុកនូវយថាហេតុអាក្រក់ ក្នុងករណីដែលភាគីម្ខាងទៀតបំពានតែប៉ុណ្ណោះ» ។

«គឺយើងមានសិទ្ធិការពារខ្លួន យើងមិនយកអាវុធយុទ្ធភណ្ឌដែលកំពុងតែបញ្ជូនឡើង ដែលបានទៅដល់គោលដៅ និងជិតដល់គោលដៅ ដើម្បីទៅវៃប្រហារទៅកាន់ប្រទេសថៃនោះទេ ប៉ុន្តែសូមបញ្ជាក់ថា យើងត្រូវតែត្រៀមបម្រុងទុកនូវយថាហេតុអាក្រក់បំផុត។ ព្រោះថារឿងនេះ វាជាបទពិសោធដែលបានកើតឡើងឆ្នាំ ២០០៨​ ដល់ឆ្នាំ ២០២១  ដែលខ្ញុំចង់យកបញ្ហានេះ ជម្រាបជូនបងប្អូននៅទីនេះ ក៏ដូចជាជនរួមជាតិ ហើយក៏ជាការជូនសារទៅដល់សមភាគីរបស់យើង គឺព្រះរាជាណាចក្រថៃ»។

បើតាមសម្តេចតេជោ ប៉ាន់ស្មានថា ការវាយឆ្មក់ពីទាហានថៃវាយប្រហារមកលើទាហានកម្ពុជាលើកនេះ មិនមែនជាបន្ទាត់នយោបាយរបស់រាជរដ្ឋាភិបាលថៃ ឬនាយករដ្ឋមន្រ្តីថៃ ឬក្រសួងការពារជាតិថៃ នោះទេ គឺអាចជាទង្វើរបស់បុគ្គល ឬអង្គភាពណាមួយ ។

សម្តេចថ្លែងថា៖«អ្វីដែលជាការកត់សម្គាល់របស់ខ្ញុំគឺ វាហាក់ដូចជាបានកើតឡើងដោយបុគ្គល ឬអង្គភាពនៅខាងក្រោម ដែលធ្វើរឿងនេះ។ បើសិនរឿងនេះជាគោលការណ៍របស់រដ្ឋាភិបាល ប្រហែលជាកម្លាំងនេះមិនត្រូវបានដកទេ។ អ៊ីចឹង វាច្បាស់ណាស់ថា មិនមែនជាបន្ទាត់នយោបាយរបស់រដ្ឋាភិបាលថៃ ឬក្រសួងការពារជាតិថៃ ឬកងទ័ពថៃទាំងមូលទេ ប៉ុន្តែអាចចេញមកពីអង្គភាពតែប៉ុណ្ណោះ នេះគ្រាន់តែជាការប៉ាន់ស្មានរបស់ខ្ញុំតែប៉ុណ្ណោះ វាខុសគ្នាទៅនឹងព្រឹត្តិការណ៍ឆ្នាំ ២០០៨៕