ពីរតនគិរី! ទារកមិនគ្រប់ខែមួយរូបបាត់បង់ជីវិត ដោយសារស្រ្តីជនជាតិដើមភាគតិចសម្រាលកូននៅផ្ទះខ្លួនឯង

ទារកមិនគ្រប់ខែមួយរូប ត្រូវបានបាត់បង់ជីវិ​ត ដោយសារស្រ្តីជនជាតិដើមភាគតិច ឈ្មោះ កាក់ ម៉ាន រស់នៅក្នុងខេត្តរតនគិរី បានជ្រើសយកវិធីសម្រាលកូននៅផ្ទះខ្លួនឯង ដោយពុំបានពិគ្រោះជាមួយគ្រូពេទ្យ ឬទៅសម្រាកនៅមន្ទីរពេទ្យ អំឡុងពេលមានផ្ទៃពោះ។ ហេតុការណ៍សម្រាលកូនមិនគ្រប់ខែនេះ បានកើតឡើងកាលពីថ្ងៃទី ១៦ ខែមិថុនា ឆ្នាំ ២០២៥ ដែលមានទីតាំងស្ថិតនៅភូមិកាឡឹម ឃុំកាចូន ស្រុកវើនសៃ ខេត្តរតនគិរី។

អ្នកស្រី កាក់ ម៉ាន ដែលជាម្តាយរបស់ទារក បានរៀបរាប់ថា ដោយសារឈឺពោះខ្លាំង ទើបសម្រេចចិត្តសម្រាលកូននៅផ្ទះខ្លួននៅឯចម្ការ។ ប៉ុន្តែដោយសារសម្រាលកូនមិនបានសម្រេច បែរជាមានធ្លាក់ឈាមខ្លាំង ទើបប្តីរបស់អ្នកស្រីបញ្ជូនទៅសម្រាកព្យាបាលនៅមណ្ឌលសុខភាពស្រុកវើនសៃ និងបន្តបញ្ចូនតាមឡានសង្គ្រោះបន្ទាន់ ទៅមន្ទីរពេទ្យបង្អែកខេត្ត។

ជាអកុសនៅពេលដល់មន្ទីរពេទ្យ ទោះបីជាក្រុមគ្រូពេទ្យព្យាយាមជួយសង្គ្រោះយ៉ាងណាក្តី ទារកក្នុងផ្ទះនោះបានបាត់បង់ជីវិតទៅហើយ។ បន្ទាប់មកទៀត ស្រ្តីជាម្តាយដែលកំពុងមានជំងឺ និងធ្លាក់ឈាមផងនោះ បានរត់ចេញពីមន្ទីរពេទ្យត្រឡប់ទៅផ្ទះវិញ បង្កការភ្ញាក់ផ្អើលជាខ្លាំង។ បើតាមអ្នកស្រី កាក់ ម៉ាន ៖« គ្រូពេទ្យមិនទាន់ឱ្យខ្ញុំត្រឡប់មកផ្ទះវិញទេ តែដោយសារទ្រាំមិនបានចំពោះការព្យាបាលរបស់ពេទ្យទើបត្រូវមកផ្ទះវិញ ដោយមិនបានប្រាប់គ្រូពេទ្យ»។

បើតាមលិខិតបញ្ជូនរបស់មន្ទីរសុខាភិបាលខេត្តរតនគិរី ស្រ្តីខាងលើចូលសម្រាកព្យាបាលនៅមន្ទីរពេទ្យថ្ងៃទី ១៦​ខែមិថុនា ឆ្នាំ ២០២៥ ករណី សម្រាលកូនមិនគ្រប់ខែ ធ្លាក់ឈាមច្រើន។ ក្នុងលិខិតបញ្ជាក់ថា ការសម្រាលកូនមិនគ្រប់ខែនៅផ្ទះខ្លួនឯងរហូតទៅដល់ ៦ ម៉ោង បណ្តាលឱ្យកូនស្លាប់។

ចំពោះរឿងនេះ លោក សាក់ ខាំលឿន មេភូមិកាឡឹម បានសម្តែងការសោកស្តាយ និងបានប្រាប់ថា រូបគាត់តែងតែក្រើនរំឭកក្រុមគ្រួសារស្ត្រីមានផ្ទះពោះ ទៅសម្រាក និងសម្រាលនៅមន្ទីរពេទ្យមុនពេលសម្រាល ដោយសារការធ្វើដំណើរមានចម្ងាយឆ្ងាយ និងផ្លូវមានភាពពិបាក។

ក្រោយស្រ្តីជនជាតិ គេចពីមន្ទីរពេទ្យត្រឡប់មកផ្ទះវិញ លោក ហ្វឿយ បុប្ផា ប្រធានមណ្ឌលសុខភាពស្រុកវើនសៃ បានជំរុញឱ្យមេភូមិ និងក្រុមគ្រួសារជួយបញ្ចុះបញ្ចូលឱ្យស្រ្តីត្រឡប់ទៅមន្ទីរពេទ្យវិញ ដោយបារម្ភពីការឆ្លងមេរោគផ្សេងៗ។ យ៉ាងណាមិញស្រ្តីជនជាតិដើមភាគតិច កាក់ ម៉ាន បញ្ជាក់ថា៖«ខ្ញុំមិនទៅពេទ្យ សុខចិត្តស្លាប់នៅផ្ទះវិញ»។

ខេត្តរតនគិរី មានជនជាតិដើមភាគតិចជាច្រើន រស់នៅប្រកាន់ខ្ជាប់នូវទំនៀមទម្លាប់ ជំនឿ ប្រពៃណី របស់ខ្លួននៅឡើយ។ ក្នុងនោះ ជនជាតិដើមភាគតិចមួយចំនួន ដែលរស់នៅតាមភូមិដាច់ស្រយាល ឆ្ងាយពីទីប្រជុំជន ពុំសូវបានចូលរួមប្រជុំ ឬ ទទួលបានការណែនាំពីការអប់រំសុខភាពនោះទេ ដោយសារជាប់រវល់មុខរបរធ្វើស្រែចម្ការ។ លើសពីនេះ ស្រ្តីជនជាតិដើមភាគតិចមួយចំនួន ជ្រើសរើសវិធីសម្រាលកូននៅផ្ទះ តាមរយៈការពឹងផ្អែកទៅលើឆ្មបភូមិជាដើម៕