ក្រុមប្រឹក្សាខណ្ឌដូនពេញ ជំរុញអាជ្ញាធរសង្កាត់ទាំង១១ត្រូវយកចិត្តទុកដាក់ដោះស្រាយបញ្ហាសណ្ដាប់ធ្នាប់សាធារណៈ និងសន្តិសុខ

លោក ហែម អាន ប្រធានក្រុមប្រឹក្សាខណ្ឌដូនពេញ បានជំរុញឲ្យមន្រ្តីអាជ្ញាធរទាំង១១សង្កាត់ ត្រូវយកចិត្តទុកដាក់ ដោះស្រាយបញ្ហាសណ្ដាប់ធ្នាប់សាធារណៈ និងបញ្ហសន្តិសុខសុវត្ថិភាព ជូនប្រជាពលរដ្ឋក្នុងមូលដ្ឋាន​ ដើម្បីឆ្លើយតបបានទាន់ពេលវេលាពីទុក្ខកង្វល់របស់ប្រជាពលរដ្ឋ។

ការជំរុញបែបនេះ ធ្វើឡើងនៅក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខណ្ឌ ក្រោមអធិបតីភាពលោក គឹម សេតារា ទីប្រឹក្សាផ្ទាល់សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា រដ្ឋលេខាធិការនៃទីស្តីការគណៈរដ្ឋមន្ត្រី និងជាអនុប្រធានក្រុមការងារថ្នាក់ជាតិចុះមូលដ្ឋានខណ្ឌដូនពេញ កាលពៅរសៀលថ្ងៃទី២៦មិថុនា នៅសាលប្រជុំសាលាខណ្ឌដូនពេញ។

លោក ហែម អាន បានលើកឡើងថា មន្រ្តីអាជ្ញាធរទាំង១១សង្កាត់ ត្រូវបន្តយកចិត្តទុកដាក់ដោះស្រាយបញ្ហាសណ្ដាប់​ធ្នាប់សាធារណៈ បញ្ហសន្តិសុខសុវត្ថិភាព ជូនប្រជាពលរដ្ឋ និងត្រូវមានមន្រ្តីប្រចាំការជាប់ជាប្រចាំ ២៤ម៉ោងលើ២៤ម៉ោង ដើម្បីឆ្លើយតបជាមួយប្រជាពលរដ្ឋបានទាន់ពេលវេលា ពីការងារសេវាសាធារណៈ ទុក្ខកង្វល់របស់ប្រជាពលរដ្ឋ អាជ្ញាធរត្រូវទទួលដោះស្រាយជូនស្របតាមសំណូមពររបស់ប្រជាពលរដ្ឋ និងការងារអភិវឌ្ឍមូលដ្ឋាន។

ប្រធានក្រុមប្រឹក្សាខណ្ឌដូនពេញ បានលើកឡើងបន្តថា អាជ្ញាធរមូលដ្ឋានត្រូវកៀរគរប្រជាពលរដ្ឋមកចូលរួមក្នុងវេទិការសាធារណៈ ដើម្បីបានលើកឡើងពីបញ្ហាដែលខ្លួនមាន បញ្ហាសំណូមពរដល់អាជ្ញាធរជួយដោះស្រាយ និងសូមឲ្យអាជ្ញាធរយកចិត្តទុកដាក់ពីបញ្ហាទុក្ឋកង្វល់របស់ប្រជាពលរដ្ឋ កុំឲ្យកើតមាននូវរឿងដដែលៗ ត្រូវរកដំណោះស្រាយ ថាបញ្ហាណាមួយត្រូវដោះស្រាយបាន និងបញ្ហាណាមួយដោះស្រាយមិនបាន ហើយត្រូវបញ្ជូនទៅថ្នាក់លើដើម្បីចូលរួមដោះស្រាយជូនប្រជាពលរដ្ឋ។

លោក ជា ខេមា អភិបាលនៃគណៈអភិបាលខណ្ឌដូនពេញ បានទទួលយកនៅសំណូមពរ ប្រជាពលរដ្ឋទាំងអស់ចូលរួមក្នុងវេទិការជាមួយអាជ្ញាធរមានសមត្ថកិច្ច ដើម្បីឲ្យខាងជំនាញនីមួយៗ ដោះស្រាយជូន និងការរីកចំរើនក្នុងមូលដ្ឋានខណ្ឌទាំងមូល។ លោក អភិបាលខណ្ឌបានសង្កត់ធ្ងន់ថា ជាពិសេសអាជ្ញាធរថ្នាក់ប៉ុស្តិ៍រដ្ឋបាល និងសង្កាត់ ដែលជាអាណាព្យាបាលរបស់ពលរដ្ឋផ្ទាល់ ត្រូវយកចិត្តទុកដាក់ពីទុក្ខលំបាករបស់ពលរដ្ឋ។ ប៉ុស្តិ៍រដ្ឋបាលត្រូវមើលពីសន្តិសុខសុវត្ថិភាព សណ្ដាប់ធ្នាប់សាធារណៈ បញ្ហាគ្រឿងញៀន ក្មេងទំន្មើង និងសង្កាត់ត្រូវបម្រើពលរដ្ឋពីសេវាសាធារណៈឲ្យបានលឿនជូនពលរដ្ឋ៕

អត្ថបទ៖ សុភា