ម៉ានិត ទម្លាយរឿងរ៉ាវនៅពីក្រោយការគាំទ្ររបស់ ទេព បូព្រឹក្ស ចំពោះខ្លួន ខណៈគ្រោងទម្លាក់ចម្រៀងរួមគ្នាលើកដំបូង

ក្រោយប្រកាសស្នាដៃចម្រៀងរួមគ្នាជាលើកដំបូង ដែលត្រៀមនឹងដាក់ផ្សាយឱ្យមហាជនដែលជាអ្នកគាំទ្របានស្តាប់នាវេលាយប់នេះនោះ តារាចម្រៀងឯករាជ្យ ម៉ុង ម៉ានិត បានបង្ហាញក្តីរំភើបនិងទម្លាយការគាំទ្រពុំអាចបំភ្លេចបានរបស់តារាចម្រៀងរ៉េបល្បីឈ្មោះ ទេព បូព្រឹក្ស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសំណេរលើទំព័រហ្វេសប៊ុក ម៉ានិត បានរៀបរាប់ថា ទេព បូព្រឹក្ស ជាមិត្តរួមអាជីពតាំងពីក្មេង ហើយគាំទ្រខ្លួនគ្រប់យ៉ាង។ លោកបញ្ជាក់ទៀតថា កន្លងមកបើទោះបីជាលោកច្រៀងបទអី ក៏អ្នកនាង ទេព បូព្រឹក្ស ថាពីរោះដែរ។

លោកថា “ខ្ញុំឈប់ច្រៀងមកនិពន្ធសៀវភៅ ក៏មកគាំទ្រទៀត ជួយផុស ជួយថត។ ជួបគ្នានៅណា ក៏បបួល feat ជាមួយគ្នាដែរ តាំងពីនៅក្រុមហ៊ុនជាមួយគ្នា ដល់ក្លាយជាតារាឯករាជ្យ ក៏នៅតែគាំទ្រគ្នា។ ឥឡូវនេះ បានសម្រេចហើយមិត្ត បានច្រៀងរួមគ្នាហើយ”។

ទន្ទឹមនេះ លោក ម៉ុង ម៉ានិត ក៏សម្តែងការអរគុណដល់មិត្តល្អរូបនេះ ដែលមិនត្រឹមតែតែងតែគាំទ្រ និងស្រលាញ់រាន់អាន ថែមទាំង ជួយចាត់ចែង ជាមនុស្សមិនប្រកាន់ខ្លួន តស៊ូ លំបាក ។ លោកថា “ខ្ញុំឃើញផ្ទាល់ភ្នែកតាំងពីចូលច្រៀងដំបូង។ យំក្រោយឆាកមិនតិចដងទេ”។

គួរឱ្យដឹងដែរថា តារាចម្រៀងដ៏មានប្រជាប្រិយទាំង ២ដួងនេះ បានចាប់ដៃគ្នាជាលើកដំបូង ក្នុងការនាំយកភាពភ្ញាក់ផ្អើលជូនអ្នកគាំទ្ររបស់ខ្លួន តាមរយៈបទចម្រៀងរួមគ្នា «Never Be Yours» នៅស្អែកនេះ ។ ជាមួយគ្នានេះ លោកក៏បង្ហើបដែរថា លោកក៏នៅមានបទមួយទៀត ដែលលោកនិពន្ធរួចជិត១០ឆ្នាំហើយ ដើម្បីច្រៀងជាមួយអ្នកនាង ទេព បូព្រឹក្ស ខណៈឥឡូវនេះអ្នកទាំងពីរក៏បានថតចប់រួចរាល់ហើយដែរ៕