ឆ្មក់បង្រ្កាបភោជនីយដ្ឋានយីហោ «ចំការស្នេហ៍» សង្ស័យលួចបង្កប់បម្រើសេវាកម្មផ្លូវភេទ

កម្លាំងនាយកដ្ឋានប្រឆាំងការជួញដូរមនុស្ស និងការពារអនិតិជន សហការជាមួយកម្លាំងសមត្ថកិច្ចជំនាញខណ្ឌសែនសុខ បានចុះបង្រ្កាបភោជនីយដ្ឋានមួយដែលមានយីហោ “ចំការស្នេហ៍” ស្ថិតនៅតាមបណ្តោយផ្លូវលំ ក្នុងសង្កាត់ភ្នំពេញថ្មី ខណ្ឌសែនសុខ សង្ស័យជាប់ពាក់ព័ន្ធបង្កប់បម្រើសេវាកម្មផ្លូវភេទ។

ការចុះត្រួតពិនិត្យ និងបង្ក្រាបនេះបានធ្វើឡើងកាលពីម៉ោង៨​និង៣០នាទីយប់ ថ្ងៃទី២៥ ខែមិថុនា ឆ្នាំ២០២៥ បន្ទាប់ពីសង្ស័យថា ទីតាំងនេះផ្តល់សេវាកម្មផ្លូវភេទខុសច្បាប់។ ក្នុងរង្វង់ប្រតិបត្តិការ កម្លាំងសមត្ថកិច្ចបានឃាត់ខ្លួនមនុស្សប្រុសស្រីជាច្រើននាក់ និងបានដកសម្ភារៈមួយចំនួន។

បើតាមការបញ្ជាក់ពីមន្រ្តីជំនាញនាយកដ្ឋាន បានឲ្យដឹងថា ទីតាំងភោជនីដ្ឋានមួយ «ចំការស្នេហ៍» ខាងលើ ជាទីតាំងជាប់ការសង្ស័យមានលួចបង្កប់នៅសេវាបម្រើសេវាផ្លូវភេទខុសច្បាប់ និង​ប្រើ​ក្មេង​ស្រី​មិន​ទាន់​គ្រប់​អាយុ​អោយ​បម្រើ​ភ្ញៀវ​ ទើបសមត្ថកិច្ចនាយកដ្ឋានប្រឆាំងការជួញដូរមនុស្ស និងការពារអនិកជន សហការជាមួយកម្លាំងសមត្ថកិច្ចនៃអធិការដ្ឋាននគបាលខណ្ឌសែនសុខធ្វើការចុះឆ្មក់បង្រ្កាបជាក់ស្តែងតែម្តង។

បើតាមសមត្ថកិច្ច​ ក្នុងរង្វង់ប្រតិបត្តិការនេះ​ មានមនុស្សមួយចំនួនដែលមិនពាក់ព័ន្ធបាន​អោយ​ត្រឡប់​ទៅ​វិញ​ភ្លាមៗ​ដូច​ជា​ក្រុម​តន្ត្រី​ នឹង​អ្នក​ចំរៀង​។

ក្រោយពីសមត្ថកិច្ចឃាត់ខ្លួនរួចក៏បានដឹកតាមរថយន្តប្រភេទសាំយ៉ុងចំនួន៤គ្រឿងបញ្ជូនយកទៅអគ្គស្នងការនគបាលជាតិដើម្បីសួរនាំបន្ត និងចាត់ការបន្តតាមនីតិវិធីច្បាប់៕

អត្ថបទ៖ សំណាង