អ៊ីស្រាអែល ចំណាយអស់ជិត១០ពាន់លានដុល្លារ ក្នុងសង្គ្រាម១២ថ្ងៃ ជាមួយអ៊ីរ៉ង់

ទិន្នន័យពីគេហទំព័រ Financial Express បានបង្ហាញថា អ៊ីស្រាអែល ចំណាយអស់ជិត១០ពាន់លានដុល្លារអាមេរិក ក្នុងសង្គ្រាមរយៈពេល១២ថ្ងៃជាមួយអ៊ីរ៉ង់។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យ, គ្រាន់តែមួយសប្តាហ៍ដំបូងនៃសង្គ្រាមនោះ អ៊ីស្រាអែលបានចំណាយអស់ប្រហែល៥ពាន់លានដុល្លារទៅហើយ ដើម្បីវាយអ៊ីរ៉ង់។

អ្វីដែលគួរឲ្យកត់សម្គាល់គឺថា មួយថ្ងៃអ៊ីស្រាអែលចំណាយ ៧២៤លានដុល្លារ ក្នុងនោះ ៥៩៣លានដុល្លារគឺចំណាយលើការបាញ់សត្រូវ និង១៣២លានដុល្លារសម្រាប់វិធានការការពារនិងចល័តទ័ព។

បើនិយាយត្រឹមតែប្រព័ន្ធការពារមីស៊ីល, សារព័ត៌មាន Wall Street Journal ផ្សាយថា មួយថ្ងៃអ៊ីស្រាអែលចាយលើប្រព័ន្ធនេះ អាចចន្លោះពី១០-២០០លានដុល្លារ។

ទន្ទឹមនោះ យោងតាមវិទ្យាស្ថាន Aaron Institute for Economic Policy ដែលមានមូលដ្ឋាននៅប្រទេសអ៊ីស្រាអែល, ការចំណាយសរុបអាចឈានដល់ជាង១២ពាន់លានដុល្លារឯណោះ ប្រសិនបើសមរភូមិប្រយុទ្ធបន្តពេញមួយខែ។

ទោះបីជាយ៉ាងណាក៏ដោយ មិនមានការបញ្ចេញព័ត៌មានទាក់ទិននឹងការចំណាយលើសង្គ្រាមនេះ ពីភាគីខាងអ៊ីរ៉ង់នោះទេ។

សូមជម្រាបជាថ្មី សង្គ្រាមផ្ទុះឡើងនៅពេលអ៊ីស្រាអែល បើកប្រតិបត្តិការ «Risisng Lion» កាលពីថ្ងៃសុក្រទី១៣ខែមិថុនាឆ្នាំ២០២៥ ដោយបាញ់មីស៊ីលលើទីក្រុងតេហេរ៉ង់។ ជុំវិញប្រតិបត្តិការនេះ ប្រធានាធិបតី​អ៊ីស្រាអែល Isaac Herzog បានបញ្ជាក់​ថា ប្រទេសរបស់លោកគ្មាន​ជម្រើស​ផ្សេងក្រៅ​ពី​វាយ​អ៊ីរ៉ង់ឡើយ ព្រោះអ៊ីរ៉ង់កំពុង​ស្ថិតនៅលើផ្លូវឈានឆ្ពោះទៅរកការផលិតបាន​គ្រាប់បែក​នុយក្លេអ៊ែរហើយ៕

អត្ថបទ៖ សុខ សុវណ្ណ

ចុចអាន៖ រដ្ឋមន្ត្រីការពារជាតិអ៊ីរ៉ង់ ទៅដល់ ចិន ក្រោយមានបទឈប់បាញ់ក្នុងសង្គ្រាមជាមួយ អ៊ីស្រាអែល