ជីវិតកម្សាន្ដ

Jessie J វះកាត់មហារីកសុដន់ដោយជោគជ័យ និងលើកទឹកចិត្តអ្នកជំងឺដូចនាងឲ្យរឹងមាំ

បានផុស

១ year មុន

នៅ

ថ្ងៃពុធ ២៥ មិថុនា ២០២៥

ដោយ

អ្នកគាំទ្រជុំវិញពិភពលោក កំពុងផ្ញើការគាំទ្រដល់តារាចម្រៀង Jessie J បន្ទាប់ពីនាងបានបង្ហោះនៅលើបណ្តាញសង្គមជាលើកដំបូងពាកព័ន្ធ រូបថតនិងវីដេអូឃ្លិបដែលបង្ហាញពីការវះកាត់មហារីកសុដន់រយៈពេល ៤៨ ម៉ោង ។ បើទោះបីជារូបភាពបង្ហាញពីភាពនឿយហត់ និងរាងស្គមស្គាំងក៏ដោយ ប៉ុន្តែស្មារតីដ៏រឹងមាំ និងការលេងសើចរបស់តារាស្រី គឺជាការបំផុសគំនិតមិនគួរឲ្យជឿទៅដល់អ្នកគំាទ្រជាច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី២៤ ខែមិថុនា ឆ្នាំ ២០២៥ តារាចម្រៀងវ័យ៣៧ឆ្នាំ បានបង្ហោះសារទៅកាន់អ្នកគាំទ្រនៅលើ Instagram ផ្ទាល់ខ្លួនជាភាសាអង់គ្លេសថា «ពេលវេលាល្អ និងពេលវេលាអាក្រក់ក្នុងរយៈពេល ៤៨ ម៉ោងកន្លងមកនេះ»។ ក្នុងរូបភាពនោះ នាងចងបញ្ចាក់ទាំងផ្នែកល្អ និងផ្នែកលំបាក នៃរាល់ការធ្វើដំណើរដែលត្រូវឆ្លងកាត់ ខណៈពេលដែលកំពុងរង់ចាំលទ្ធផលនៃការធ្វើកោសល្យវិច័យ។

នៅក្នុងការបង្ហោះ Jessie J បានចែករំលែករឿងរ៉ាវជាច្រើនដែលបង្ហាញពីស្មារតីរឹងមាំផ្ទាល់ខ្លួន ទោះបីជាជួបស្ថានភាពលំបាកក៏ដោយ នាងបានចែករំលែកវីដេអូឃ្លីបដែលខ្លួនបានច្រៀងនៅលើគ្រែមន្ទីរពេទ្យ ដើម្បីបង្កើនភាពក្លាហាន មុនពេលចូលបន្ទប់វះកាត់។ ឃ្លិបមួយទៀតដែលអ្នកគាំទ្រសរសើរ គឺរូបថតនាងកាន់សេរ៉ូមឈាមពីបន្ទប់វះកាត់ រួមជាមួយនឹងការសរសេរចំណងជើងកំប្លែងថាវាជា «Goji Berry Smoothie»។

Jessie J ធ្លាប់បង្ហើបថា ខ្លួនត្រូវគេធ្វើរោគវិនិច្ឆ័យថា មានជំងឺមហារីកសុដន់ដំណាក់កាលដំបូងនៅដើមខែមិថុនា។ ប៉ុន្តែជាមួយនឹងស្មារតីនៃសិល្បករ នាងបានបន្តការសម្តែងរបស់នាងនៅឯ Capital’s Summertime Ball នៅកីឡដ្ឋាន Wembley ក្នុងទីក្រុងឡុងដ៍កាលពីថ្ងៃទី ១៥ ខែមិថុនា មុនពេលទទួលការវះកាត់ដែលបានគ្រោងទុក។

ទោះជាយ៉ាងណាក៏ដោយ តារាចម្រៀងរូបនេះទទួលបានការគាំទ្រយ៉ាងច្រើនលើសលប់ពីមិត្តភ័ក្តិ និងអ្នកគាំទ្រជុំវិញពិភពលោក ជាពិសេសលោក Marvin Humes បានបញ្ចេញមតិថា នាងគឺជាអ្នកចម្បាំងពិតប្រាកដ ដូចដែលពិធីករទូរទស្សន៍ Gaby Roslin ធ្លាបបានលើកឡើងនាពេលកន្លងមក។

ជាចុងក្រោយនេះ Jessie J បានបញ្ចប់ការបង្ហោះរបស់នាង ដោយផ្ញើពាក្យលើកទឹកចិត្តទៅកាន់អ្នកដ៏ទៃដែលកំពុងឆ្លងកាត់ការលំបាកដោយនិយាយថា «ខ្ញុំចង់ឱបអ្នកគ្រប់គ្នាដែលឆ្លងកាត់ពេលវេលាដ៏លំបាកនេះ ពួកយើងនឹងឆ្លងកាត់រឿងមួយនេះទាំងអស់គ្នា»៕