ឱកាសការងារជិត១ម៉ឺនកន្លែង NEA និងរដ្ឋបាលក្រុងសំពៅពូន បានរៀបចំកិច្ចសម្ភាសនៅមូលដ្ឋាន

ប្រជាពលរដ្ឋជាង១០០នាក់ រស់នៅក្រុងសំពៅពូន និងស្រុកកោះធំ ខេត្តកណ្តាល បានចូលរួមក្នុងវេទិកាការងារដែលសហការរៀបចំឡើងដោយ NEA,រដ្ឋបាលក្រុងសំពៅពូន និង ស.ស.យ.ក. វិស័យ ក.ស.ប. នាព្រឹកថ្ងៃទី៣០ ខែមិថុនា ឆ្នាំ២០២៥ ដោយនាំយកឱកាសការងារថ្មីៗប្រមាណ ៨២៩៤ កន្លែង។

លោកសាម៉េន សុខា អនុប្រធានទីភ្នាក់ងារជាតិមុខរបរ និងការងារលើកឡើងថា គោលបំណងនៃកិច្ចសម្ភាសន៍ការងារនេះគឺមានគោលបំណងផ្សព្វផ្សាយពីឱកាសការងារដែលកំពុងមានតម្រូវការពីបណ្តារោងចក្រ និងក្រុមហ៊ុនសហគ្រាសជាច្រើនដល់ប្រជាពលរដ្ឋនៅមូលដ្ឋាន មួយទៀតគឺដើម្បីបង្កើនកិច្ចសហប្រតិបត្តិការជាមួយអាជ្ញាធរមូលដ្ឋានឱ្យកាន់តែល្អរវាង NEA និងអជ្ញាធរមូលដ្ឋានផងដែរ។

សូមជម្រាបថា នៅខេត្តកណ្តាលទាំងមូលកំពុងមានតម្រូវការជ្រើសរើសកម្លាំងពលកម្មថ្មីៗបន្ថែម ជាង១ម៉ឺនកន្លែង។ ជាមួយគ្នានោះដែរ ក៏មានការចូលរួមពីបងប្អូនពលករជាច្រើនរូបនៃស្រុកទាំង២ ដែលបានត្រឡប់មកពីប្រទេសថៃចូលរួម ដើម្បីស្វែងរកឱកាសការងារក្នុងវេទិកាការងារ៕