សម្ដេច ហ៊ុន សែន ប្រាប់ជប៉ុនឱ្យជួយទាញភាគីថៃ ទៅដោះស្រាយបញ្ហាព្រំដែននៅតុលាការ ICJ

ប្រធានព្រឹទ្ធសភា សម្ដេចតេជោ ហ៊ុន សែន បន្តប្រាប់មេដឹកនាំជប៉ុនឱ្យជួយទាញភាគីថៃ ដើម្បីនាំយកបញ្ហាព្រំដែនដែលកំពុងចម្រូងចម្រាសនៅតំបន់មុំបី ប្រាសាទតាមាន់តូច ប្រាសាទតាមាន់ធំ និងប្រាសាទតាក្របី ទៅដោះស្រាយដោយសន្តិវិធីតាមយន្តការតុលាការយុត្តិធម៌អន្តរជាតិ (ICJ)។

ការស្នើនេះ បានធ្វើឡើងក្នុងឱកាសដែលសម្ដេចតេជោ បានទទួលជួបពិភាក្សាការងារជាមួយសមាជិករដ្ឋសភា និងជាទីប្រឹក្សាពិសេសនាយករដ្ឋមន្ត្រីជប៉ុន លោក Nagashima Akihisa នៅវិមានព្រឹទ្ធសភា រាជធានីភ្នំពេញ នាព្រឹកថ្ងៃទី១ ខែកក្កដា ឆ្នាំ២០២៥។ ក្នុងជំនួបនេះ សម្ដេចតេជោ ហ៊ុន សែន បានប្រាប់ទីប្រឹក្សាពិសេសនាយករដ្ឋមន្ត្រីជប៉ុន ជុំវិញការពិតនៃបញ្ហាព្រំដែនកម្ពុជា និងថៃ ដែលបានផ្ដើមចេញពីភាគីថៃជាអ្នកបង្កឡើង ដើម្បីយកទៅជម្រាបលោកនាយករដ្ឋមន្ត្រីជប៉ុន បន្តឱ្យបានដឹង។

លោក ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងនៅក្រោយជំនួប ថា សម្ដេចតេជោ ហ៊ុន សែន បានបញ្ជាក់ទៅកាន់ទីប្រឹក្សាពិសេសរបស់នាយករដ្ឋមន្ត្រីជប៉ុន ឱ្យបានយល់អំពីទិដ្ឋភាពជាក់ស្ដែងពីបញ្ហាព្រំដែនរវាងកម្ពុជា និងថៃ ដែលកំពុងកើតមាន គឺចាប់ផ្ដើមចេញពីការបាញ់ប្រហាររបស់ទាហានថៃមកលើទាហានកម្ពុជាដល់លេណដ្ឋានឈរជើងតែម្ដងរហូតទាហានកម្ពុជាម្នាក់ត្រូវពលីជីវិត កាលពីថ្ងៃទី២៨ ខែឧសភា ឆ្នាំ២០២៥កន្លងទៅ និងបន្តមកគឺការសម្រេចបិទព្រំដែនជាឯកតោភាគីពីភាគីថៃ ដែលធ្វើឱ្យស្ថានភាពព្រំដែនរវាងប្រទេសទាំងពីរកាន់តែតានតឹងដូចពេលបច្ចុប្បន្ននេះ។  

ទាក់ទងទៅនឹងបញ្ហាព្រំដែននេះ សម្ដេចតេជោ ក៏បានប្រាប់ទីប្រឹក្សាពិសេសរបស់ជប៉ុន ថា កម្ពុជាមកដល់ពេលនេះមិនទាន់ត្រូវការប្រទេសទី៣ ដើម្បីចូលរួមចំណែកដោះស្រាយបញ្ហាព្រំដែនរវាងកម្ពុជា និងថៃទេ។ អ្វីដែលកម្ពុជា ត្រូវការនោះ គឺការជំរុញការដោះស្រាយដោយសន្តិវិធី ពោលគឺតាមរយៈយន្តការច្បាប់អន្តរជាតិ ទៅតុលាការយុត្តិធម៌អន្តរជាតិ ICJ។

ក្នុងន័យនេះ សម្ដេចតេជោ បានបញ្ជាក់ថា ទោះបីពេលនេះ កម្ពុជាមិនទាន់ត្រូវការប្រទេសទី៣ ក្នុងការជួយដោះស្រាយបញ្ហាព្រំដែនកម្ពុជា និងថៃ ក៏ពិតមែន ប៉ុន្តែសម្ដេចបានប្រាប់ទៅកាន់ទីប្រឹក្សាពិសេស ឱ្យជួយប្រាប់ទៅលោកនាយករដ្ឋមន្ត្រីជប៉ុនបានដឹង ហើយអាចឱ្យជប៉ុនជួយជំរុញភាគីថៃ ឱ្យដោះស្រាយបញ្ហាដោយសន្តិវិធី និងឈរលើយន្តការនៃច្បាប់អន្តរជាតិ ពោលគឺទៅកាន់តុលាការយុត្តិធម៌អន្តរជាតិ (ICJ)៕

ដោយ៖ ធឿន វ៉ាន់សុង