ទំហំទីផ្សារបុព្វលាភធានារ៉ាប់រងកើន​ដល់ប្រមាណ ៣៥៧ លានដុល្លារ ក្នុងឆ្នាំ២០២៤

ទំហំទីផ្សារធានារ៉ាប់រងកម្ពុជា បានកើនឡើងពីប្រមាណ ២៩៩ លានដុល្លារអាម៉េរិក ក្នុងឆ្នាំ ២០២១ ដល់ប្រមាណ ៣៥៧ លានដុល្លារអាម៉េរិកនៃបុព្វលាភធានារ៉ាប់រងដុលក្នុងឆ្នាំ២០២៤។ លោក ប៊ូ ច័ន្ទភីរូ អគ្គនាយក​នៃនិយ័តករធានារ៉ាប់រងកម្ពុជា ថ្លែង​នៅ​ក្នុងសិក្ខាសាលាស្ដីពី “ការធ្វើបច្ចុប្បន្នកម្មផែនការយុទ្ធសាស្ត្រអភិវឌ្ឍន៍​វិស័យធានារ៉ាប់រងកម្ពុជា ២០២១-២០៣០”។

ជាមួយនឹងទ្រព្យសកម្មសរុបប្រមាណជាង ១ ប៊ីលានដុល្លារអាម៉េរិក និងមូលនិធិភាគហ៊ុនិកសរុបប្រមាណជាង ៤៤៩ លានដុល្លារអាម៉េរិក ក្នុងឆ្នាំ២០២៤ បន្ទុកហិរញ្ញវត្ថុប្រមាណជាង ៨០ ប៊ីលានដុល្លារអាម៉េរិក ត្រូវបានការពារដោយកិច្ចសន្យាធានា-រ៉ាប់រង ដែលក្នុងនោះ សំណងធានារ៉ាប់រងប្រមាណជាង ១០៤ លានដុល្លារអាម៉េរិក ត្រូវបានផ្ដល់ជូនអ្នកត្រូវបានធានា និងអ្នកទទួលផល។

លោក ប៊ូ ច័ន្ទភីរូ អគ្គនាយក​នៃនិយ័តករធានារ៉ាប់រងកម្ពុជាបន្ថែមថា ទីផ្សារធានារ៉ាប់រងកម្ពុជា បានរួមចំណែកក្នុងសេដ្ឋកិច្ចក្នុងអត្រាប្រមាណ ១,១៣% និងដង់ស៊ីតេធានារ៉ាប់រង ២០,៦៥ ដុល្លារ​អាម៉េរិក ក្នុងមនុស្សម្នាក់។

ពាក់ព័ន្ធ “ការធ្វើបច្ចុប្បន្នកម្មផែនការយុទ្ធសាស្ត្រអភិវឌ្ឍន៍​វិស័យធានារ៉ាប់រងកម្ពុជា ២០២១-២០៣០” អគ្គនាយក​នៃនិយ័តករ​ធានារ៉ាប់រងកម្ពុជាបានអះអាង​ថា គឺ​ដើម្បីជំរុញកំណើនទីផ្សារធានារ៉ាប់រង និងសន្ទុះ​អភិវឌ្ឍន៍នៃវិស័យធានារ៉ាប់រងកម្ពុជា និងបង្កើតភាពធន់ទៅនឹងវិបត្តិនានា។

លោកជឿជាក់ថា តាមរយៈសិក្ខាសាលានេះ នឹងផ្តល់នូវវេទិកាមួយដល់​ក្រសួង-ស្ថាប័នពាក់ព័ន្ធ គ្រឹះស្ថានធានា-រ៉ាប់រង ដៃគូអភិវឌ្ឍន៍ អាច​ចូលរួមពិនិត្យពិភាក្សា និងផ្ដល់ធាតុចូលសម្រាប់ការធ្វើបច្ចុប្បន្នកម្មផែនការយុទ្ធសាស្ត្រនេះ ឱ្យមានភាពគ្រប់ជ្រុងជ្រោយ និងអាចអនុវត្តទៅបានប្រកបដោយភាពជោគជ័យ៕