ប្រធានច្រកព្រំដែន៖ មិនមាន​ទំនិញ​​ថៃកាត់​​ឡាវ ឆ្លងចូល​កម្ពុជា​តាម​​​ច្រក​ត្រពាំង​ក្រៀល ក្នុង​ខេត្ត​ស្ទឹង​ត្រែង​ទេ

លោក ឡាច ប៊ុនឡុង ប្រធានស្នាក់ការត្រួតពិនិត្យច្រកទ្វារព្រំដែនអន្តរជាតិត្រពាំងក្រៀល បានថ្លែងប្រាប់កម្ពុជាថ្មីថា គិតត្រឹមថ្ងៃទី ១០ ខែកក្កដា ឆ្នាំ ២០២៥ នេះ ពុំមានទំនិញរបស់ថៃឆ្លងកាត់ឡាវ ឆ្លងចូលទឹកដីកម្ពុជាតាមច្រកព្រំដែនត្រពាំងក្រៀល នាខេត្តស្ទឹងត្រែងនោះទេ។

លោកបានថ្លែងប្រាប់ថា៖«គឺទំនិញចេញ-ចូល តាមច្រកទ្វារអន្តរជាតិត្រពាំងក្រៀល អត់មានទំនិញ ឬផលិតផល កសិផលពីប្រទេសថៃទេ ។ ទោះបីជាមានអ្នកចង់នាំចូលទំនិញថៃតាមច្រកនេះ ក៏ឡាវអត់ឱ្យចូលដែរ ព្រោះឡាវដឹងថា មកដល់ច្រកព្រំដែនខ្មែរក៏អត់ឱ្យទំនិញថៃចូលដែរ»។ មិនមានទំនិញថៃ ប៉ុន្តែបច្ចុប្បន្ននៅតាមច្រកនេះ បានអនុញ្ញាតឱ្យនាំចូលទំនិញពីចិន រួមមានជីកសិកម្ម និងក្រដាសកាតុង តែភាគច្រើនគឺទំនិញជី។

លើសពីនេះ លោកប្រធានច្រកព្រំដែនកម្ពុជា ក៏បានពិភាក្សាជាមួយប្រធានច្រកឡាវជាបន្តបន្ទាប់ជុំវិញការផ្អាកទំនិញនាំចូលពីថៃផងដែរ។ លោក ឡាច ប៊ុនឡុង មានប្រសាសន៍ថា៖«ខាងខ្ញុំក៏ធ្វើការជាមួយភាគីឡាវដែរ ទំនិញណាដែលជាផលិតផលថៃយើងមិនអនុញ្ញាតឱ្យចូលទេ។ សូម្បីតែឡានចេញមកពីច្រកព្រំដែនថៃ-ឡាវ ក៏ដោយ ប៉ុន្តែពេលមកដល់ច្រកកម្ពុជាមិនអនុញ្ញាតឱ្យចូលឡើយ។ ខ្ញុំបានពិភាក្សាជាមួយឡាវ ឱ្យបោះដៃទៅមន្រ្តីគាត់ដែលប្រចាំការនៅច្រកព្រំដែនថៃផងដែរ»។

ជាធម្មតាមច្រកនេះ រៀងរាល់រដូវប្រមូលផល កម្ពុជាតែងនាំចេញផ្លែស្វាយទៅកាន់ប្រទេសឡាវ ប៉ុន្តែបច្ចុប្បន្ននេះ ពុំសូវនាំចេញនោះទេ ព្រោះហួសរដូវកាលប្រមូល។ ដោយឡែក ទាក់ទងភ្ញៀវទេសចេញ-ចូលតាមច្រកនេះវិញ លោក ឡាច ប៊ុនឡុង ឱ្យដឹងថា ចាប់ពីដើមឆ្នាំ ២០២៥ មកពោល ដើមខែមករា និងកុម្ភៈ មានភ្ញៀវទេសចរចេញចូលច្រើន ដោយក្នុងមួយថ្ងៃចន្លោះ ២០០នាក់ ប៉ុន្តែបច្ចុប្បន្ននេះ ភ្ញៀវទេសថយចុះបន្តិច ក្នុងមួយថ្ងៃចន្លោះ ១០០នាក់ ប៉ុណ្ណោះ។

គួររំលឹកបន្តិច ការផ្អាកទំនិញពីថៃចូលមកកម្ពុជានាពេលនេះ បន្ទាប់ពីក្រុមយោធាថៃ បានបិទច្រកព្រំដែនជាឯកតោភាគី ដោយពុំមានការជូនដំណឹងដល់កម្ពុជាឡើយ ដែលនេះជាសកម្មភាពរំលោភកិច្ចព្រមព្រៀង។

ច្រកព្រំដែនអន្តរជាតិត្រពាំងក្រៀល- ណងណុកខៀន រវាងកម្ពុជា-ឡាវ ត្រូវបានសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី១០ ខែមករា ឆ្នាំ ២០១៧។ ច្រកទ្វារព្រំដែនអន្តរជាតិនេះ ជាការតភ្ជាប់រវាងខេត្តស្ទឹងត្រែង និងខេត្តចំប៉ាសាក់ ដែលបានជំរុញដល់កំណើនសេដ្ឋលិច្ច ការផ្លាស់ប្តូរពាណិជ្ជកម្ម ទេសចរណ៍ និងជួយលើកកម្ពស់ជីវភាពប្រជាពលរដ្ឋដែលរស់នៅតាមបណ្តោយព្រំដែននៃប្រទេសទាំងពីរ៕