កម្ពុជាបដិសេធការផ្សព្វផ្សាយរបស់សារព័ត៌មាន​ថៃ ដែលថា កម្ពុជាស្នើសុំបើកច្រកដឹកទំនិញ

កនាំពាក្យក្រសួងការពារជាតិ លោកជំទាវ ឧត្តមសេនីយ៍ឯក ម៉ាលី សុជាតា បានចេញសេចក្តីប្រកាសព័ត៌មាន បញ្ជាក់បដិសេធយ៉ាងដាច់ខាតចំពោះព័ត៌មានដែលកំពុងផ្សព្វផ្សាយតាមបណ្តាញសង្គម និងសារព័ត៌មានមួយចំនួនរបស់ថៃ ដែលអះអាងថា កម្ពុជាបានស្នើឱ្យបើកច្រកដឹកជញ្ជូនទំនិញសង្គ្រោះបន្ទាន់។

អ្នកនាំពាក្យបានសម្តែងការខកចិត្តយ៉ាងខ្លាំងចំពោះការផ្សព្វផ្សាយព័ត៌មានមិនពិតនេះ ដោយបញ្ជាក់ថា វាជាព័ត៌មានក្លែងក្លាយ និងផ្ទុយពីការពិត ដែលមានចេតនាបង្កការបំភ័ន្តសាធារណមតិជាតិ និងអន្តរជាតិ។

សេចក្តីប្រកាសបានបន្ថែមថា ការបិទច្រកព្រំដែនកើតឡើងដោយភាគីថៃជាឯកតោភាគី ដូច្នេះ ប្រសិនបើមានការបើកឡើងវិញ ក៏ជាការទទួលខុសត្រូវរបស់ភាគីថៃក្នុងការសម្រេចចិត្តផងដែរ។ ទោះយ៉ាងណា ភាគីកម្ពុជាតែងតែមានការត្រៀមខ្លួនរួចជាស្រេច ដើម្បីឆ្លើយតបយ៉ាងសមស្រប និងត្រឹមត្រូវតាមស្ថានការណ៍។

ក្នុងន័យនេះ ក្រសួងការពារជាតិបានអំពាវនាវឱ្យសាធារណជន និងអ្នកសារព័ត៌មានទាំងអស់ ប្រុងប្រយ័ត្នចំពោះព័ត៌មានមិនពិត និងក្លែងក្លាយ ដោយគួរតែធ្វើការផ្ទៀងផ្ទាត់ប្រភពព័ត៌មានឱ្យបានច្បាស់លាស់ មុននឹងចែកចាយបន្ត៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត