ស.ស.យ.ក នឹងរៀបចំការប្រកួតបាល់ទាត់នៅថ្ងៃទី១៩ ខែកក្កដា ដើម្បីកៀរគរមូលនិធិគាំទ្រវីរកងទ័ពជួរមុខ

សហភាពសហព័ន្ធយុវជនកម្ពុជា (ស.ស.យ.ក) នឹងរៀបចំការប្រកួតបាល់ទាត់នៅពហុកីឡដ្ឋានអូឡាំពិក នាថ្ងៃសៅរ៍ ទី១៩ ខែកក្កដា ឆ្នាំ២០២៥ ដើម្បីកៀរគរមូលនិធិគាំទ្រវីរកងទ័ពជួរមុខកំពុងឈរជើងយ៉ាងអង់អាចក្លាហានពីការឈ្លានរបស់កងទ័ពថៃ ដែលការប្រកួតនេះ នឹងបើកឱ្យទស្សនិកជនចូលទស្សនាដោយសេរី។

 លោក គួច វែងស៊្រុន តំណាងក្រុមបាល់ទាត់ស.ស.យ.ក All Star ឱ្យដឹងថា មូលហេតុដែលនាំឈានដល់ការរៀបចំការប្រកួតបាល់ទាត់នេះឡើង គឺ បន្ទាប់មើលឃើញពីទឹកចិត្ត និងស្មារតីស្នេហាជាតិ និងជាតិនិយមរបស់ពលរដ្ឋខ្មែរ ក្រោយថៃបាញ់សម្លាប់ទាហាន និងគំរាមកំហែងកម្ពុជាបន្តបន្ទាប់, ឯកឧត្តម ហ៊ុន ម៉ានី និងជាប្រធាន សហភាពសហព័ន្ធយុវជនកម្ពុជា, ក្រុមកីឡាករបាត់ទាត់ ចំនួន៨ ក្រុម ក៏បានផ្ដួចផ្ដើមគំនិត ក្នុងការរៀបចំការប្រកួតកីឡាបាល់ទាត់កៀរគរមូលនិធិគាំទ្រវីរកងទ័ពជួរមុខ ។

លោក គួច វែងស្រុង ឱ្យដឹងទៀតថា កម្មវិធីប្រកួតបាល់ទាត់កៀរគរមូលនិធិគាំទ្រវីរកងទ័ពជួរមុខ រៀបចំឡើងដើម្បី បង្ហាញអំពីស្មារតីសាមគ្គីភាពជាតិខ្មែរ ដោយមានប្រជាជនជាខឿនការពារជួរក្រោយដើម្បីជួយ ដល់កងទ័ពជួរមុខ ព្រមទាំងរំលេចនូវស្មារតីជាតិនិយមរបស់ប្រជាជនកម្ពុជាស្ថិតនៅជាអមតៈ ។

លោក បន្ថែមថា កម្មវិធីប្រកួតកីឡាបាល់ទាត់នេះ នឹងរៀបចំឱ្យមានកម្មវិធីអមមួយចំនួនដើម្បីជួយជំរុញ ឱ្យមានការកៀរគមូលនិធិឱ្យបានច្រើនទៅតាមលទ្ធភាពដែលអាចធ្វើទៅបាន ។ ជាមួយគ្នានេះ កម្មវិធីប្រកួតនេះ នឹងរៀបចំឱ្យមានការច្រៀងចម្រៀងដែលបង្ហាញពីស្មារតីជាតិនិយម ដែលមាន ដូចជា បទពង្សាវតាខ្មែរ, បទដែនដីខ្មែរ និងបទគន់មើលទៅមេឃ (ចម្រៀងកងទ័ព) ក្នុងពេល ប្រកួតកីឡាបាល់ទាត់នេះ ។ បន្ថែមពីនេះ ក្រុមការងារក៏បានរៀបចំអាវយឺតចំនួន ១ម៉ឺនអាវ សម្រាប់លក់ដើម្បីប្រមូលមូលនិធិផងដែរ ដោយអាវយឺត១ តម្លៃ២ម៉ឺនរៀល ។រាល់ថវិកាដែលបានទទួលតាមរយៈមូលនិធិនេះ ក្រុមការងារមិនបានយកមកចំណាយ ក្នុងការរៀបចំកម្មវិធីនេះឡើយ ។ ក្រោយពេលបានទទួល និងសរុបនូវចំនួនថវិកា ក្រុមការងារ នឹងធ្វើការផ្សព្វផ្សាយជាសាធារណៈ ហើយក្រុមការងារនឹងរៀបចំដើម្បីយកទៅ ប្រគល់ជូន ដល់វីរកងទ័ពជួរមុខនៅទិសប្រាសាទព្រះវិហារ ។

សម្រាប់សមាសភាពក្រុមបាល់បាត់ទាល់ទាំង៨ក្រុម ដែលចូលរួមប្រកួតរួមមាន៖ ក្រុមបាល់ទាត់សម្ព័ន្ធយុវជនស្រឡាញ់សន្តិភាព ក្រុមបាល់ទាត់នៃសមាគមគ្រូពេទ្យស្ម័គ្រចិត្តសម្តេចតេជោ (TYDA) ក្រុមបាល់ទាត់ Vlogger All Star ក្រុមបាល់ទាត់សហព័ន្ធយុវជនបូជាការពារយុត្តិធម៌  ក្រុមបាល់ទាត់ពិធីករកីឡាកម្ពុជា ក្រុមបាល់ទាត់ផ្ការីកគ្រប់រដូវ ក្រុមបាល់ទាត់ ស.ស.យ.ក. អលស្តារ និង ក្រុមបាល់ទាត់តារាកម្ពុជា។

បើតាមលោក គួច វែងស៊ុន មុននឹងកម្មវិធីប្រកួតបាល់ទាត់ចាប់ផ្ដើមនៅសប្ដាហ៍ក្រោយ នៅល្ងាចថ្ងៃទី១២ ខែកក្កដា នេះ នឹងការប្រគុំតន្ត្រី ខ្នាតតូច ដែលមានការចូលរួមពីលោក ខេម នៅទីតាំងផ្លូវថ្មើរជើងចតុមុខ ដើម្បីបើកឱ្យពលរដ្ឋកម្ពុជាបរិច្ចាគថវិកាទៅតាមធនធាន។

សប្បុរសជនដែលមានបំណងចូលរួមជាមួយមូលនិធិ អាចចូលរួមតាមរយៈ  QR CODE ធនាគារចំនួន២  ឬចូលរួមជាថវិកាផ្ទាល់នៅផ្លូវថ្មើរជើងនាល្ងាចថ្ងៃទី១២ ខែកក្កដា និងល្ងាចថ្ងៃទី២០ ខែកក្កដា ឆ្នាំ២០២៥ ឬចូលរួមទិញអាវយឺត១ ក្នុងតម្លៃ២ម៉ឺនរៀល ឬ ៥ដុល្លារ អាមេរិក៕

ដោយ៖ ង៉ិល ណារ៉ាត់