យោធាថៃនៅតែបន្តឈ្លានពានកម្ពុជា ដោយការចល័តទ័ព និងសព្វាវុធតាមផ្លូវគោក និងផ្លូវទឹក

អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា បានអះអាងថា យោធាថៃនៅតែបន្តទន្ទ្រានឈ្លានពានមកលើកម្ពុជា តាមរយៈការចល័តទ័ព និងសព្វាវុធធន់ធ្ងន់ ទាំងតាមផ្លូវគោក និងផ្លូវទឹក នៅតំបន់ប៉ែកនិរតី។

ឧត្តមសេនីយ៍ឯក ម៉ាលី សុជាតា បាននិយាយនៅថ្ងៃទី២៦ ខែកក្កដានេះ ថា មកដល់ពេលនេះ សកម្មភាពឈ្លានពានរបស់ភាគីថៃមកលើទឹកដីកម្ពុជា តាំងពីម៉ោង៥:០០នាទីព្រឹក ដោយថៃបានចាប់ផ្តើមវាយប្រហារទីតាំងកម្ពុជា រួមមាន៖ ចាក់ច្រែង វាលឥន្ទ្រីយ៍ តាថាវ ភ្នំខ្មោច ជាំតែ និងនិងអានសេះ។

ទន្ទឹមនេះ ថៃក៏បានពង្រីកការឈ្លានពានរបស់ខ្លួនចំពោះទិសថ្មី ដោយភាគីថៃបានបើកការបាញ់ប្រហារមកលើកម្ពុជាមុននៅព្រំដែនខេត្តពោធិ៍សាត់ ដែលមកទល់ពេលនេះភាគីថៃនៅតែបន្តផ្លោងចូលឈ្លានពានទឹកដីកម្ពុជា។ លោកស្រីអ្នកនាំពាក្យក្រសួងការពារជាតិ ប្រាប់ឱ្យដឹងដូច្នេះ ក្នុងសន្និសីទសារព័ត៌មាននាថ្ងៃទី២៦ ខែកក្កដានេះ។

បើតាមលោកស្រី ម៉ាលី សុជាតា ចំពោះនៅខេត្តបន្ទាយមានជ័យ មិនទាន់មានការផ្ទុះអាវុធនៅឡើយទេ ប៉ុន្តែកងទ័ពថៃបានដាក់សម្ភាធ និងគំរាមកំហែងមកលើកងកម្លាំងកម្ពុជា និងបណ្តេញចេញពីទឹកដីកម្ពុជា បើមិនចេញនឹងមានការប្រើប្រាស់អាវុធបាញ់ប្រហារមកលើកងទ័ពកម្ពុជា។

ខណៈនៅខេត្តកោះកុង លោកស្រី ថា ថៃបានដាក់សម្ពាធ និងបង្ខិតបង្ខំលើកម្ពុជាលើកម្ពុជា តាមរយៈការត្រៀមចល័តនាវាចូលចន្លោះកោះគុត និងកោះឆាង ដែលមានសរុបចំនួន៨គ្រឿង។ ប៉ុន្តែកងកម្លាំងកម្ពុជារក្សាការឈរជើងតាមទីតាំងដដែល ដោយមិនមានការប្រែប្រួល ឬផ្ទុះអាវុធឡើយ។

គិតមកដល់រសៀលថ្ងៃទី២៦ ខែកក្កដានេះ ស្ថានភាពជារួមក្នុងខេត្តកោះកុង គឺមានប្រក្រតីភាពជាធម្មតា។ អភិបាលរងខេត្តកោះកុង លោក ឈិត រតនៈ បញ្ជាក់ដូច្នេះ ហើយលោកបានអំពាវនាវដល់ប្រជាពលរដ្ឋកុំមានភាពច្របូកច្របល់៕

ដោយ៖ ធឿន វ៉ាន់សុង