ព័ត៌មានជាតិ

Boonsin Padklang បង្ហាញការសោកស្ដាយចំពោះការខូតខាតនៃសង្គ្រាម

បានផុស

២ នាទីutes មុន

នៅ

ថ្ងៃអង្គារ ២៩ កក្កដា ២០២៥

ដោយ

មេភូមិភាគ២របស់ថៃ Boonsin Padklang បានបង្ហាញការសោកស្ដាយពីការខូចខាតនៃសង្គ្រាមបន្ទាប់ពីបានប្រយុទ្ធគ្នា៥ថ្ងៃមកនេះ។ ការលើកឡើងនេះក្នុងពេលដែលលោកជួបចរចាជាមេភូមិភាគ៤របស់កម្ពុជានៅព្រឹកថ្ងៃទី២៩ ខែកក្កដា ឆ្នាំ២០២៥នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្នីសិទសារព័ត៌មាននៅរសៀលថ្ងៃទី២៩ ខែកក្កដា ឆ្នាំ២០២៥ អ្នកនាំពាក្យក្រសួងការពារជាតិលោកស្រីឧត្តមសេនីយ៍ឯក ម៉ាលី សុជាតា បានលើកឡើងថាក្នុងជំនួបនោះលោក Boonsin Padklang បានថ្លែងថា លោកមានការសោកស្ដាយក្រោយសង្គ្រាម៥ថ្ងៃនេះ ដែលបានបង្កការខូចខាតជាខ្លាំងប៉ះពាល់ដល់អាយុជីវិត និងទ្រព្យសម្បត្តិ បង្កផលវិបាកដល់ពលរដ្ឋទាំងសងខាង។

ជាការឆ្លើយតបមេភូមិភាគ៤ ឧត្តមសេនីយ៍ឯក ពៅ ហេង របស់កម្ពុជាបានបញ្ជាក់ឱ្យលោក Boonsin ត្រូវអនុវត្តន៍បទឈប់បាញ់ឱ្យបាន មិនត្រូវធ្វើការចល័តទ័ពនិងសព្វាវុធ និងមិនត្រូវបាញ់មកលើទ័ពកម្ពុជាដែលបញ្ជូនទៅព្យាបាលរបួស ត្រូវសួរបញ្ជាក់និងជូនដំណឹងគ្នាជាមុន។ ជាពិសេសទៀតនោះគឺហាមទ័ពរបស់ខ្លួនកុំឱ្យដើរចូលដីកម្ពុជា ហើយកម្ពុជាបានប្រកាសថានឹងគោរពនូវបទឈប់បាញ់យ៉ាងម៉ឺងម៉ាត់រួចហើយបន្ទាប់ពីបទឈប់បាញ់បានចូលជាធរមានរួចមក។

ជាការកត់សម្គាល់ខុសពីលើកមុនៗដែលបង្ហាញឬកពារក្រអើតក្រទមពេលនេះលោក Boosin ហាក់មានភាពស្លូតបូតជាងមុនដែលអាចមើលឃើញតាមរយៈរូបថតដែលត្រូវបានគេបង្ហោះជាច្រើនលើបណ្ដាញសង្គម។

គួរឱ្យដឹងផងដែរថាយោធាថៃបានបើកការបាញ់ប្រហារមកលើទាហានខ្មែរនៅព្រឹកថ្ងៃទី២៤ ខែកក្កដា បន្ទាប់ពីបានរាយបន្លាលួសព័ទ្ធយកប្រាសាទតាមាន់ធំ។ ក្រោយហេតុការណ៍នោះការប៉ះទង្គិចដោយប្រដាប់អាវុធរវាងប្រទេសទាំងពីរបានផ្ទុះឡើងទ្រង់ទ្រាយធំ រហូតដល់មានការអន្តរាគមន៍ពីប្រធានអាស៊ាន និងប្រធានាធិបតីអាមេរិកផងដែរ។ បទឈប់បាញ់មួយបានធ្វើឡើងនៅម៉ោង១២យប់ថ្ងៃទី២៨ ខែកក្កដា ៥ថ្ងៃបន្ទាប់ពីការផ្ទុះអាវុធ។

ប្រធានាធិបតីអាមេរិកលោកដូណាល់ត្រាំ បានលើកឡើងថា ការសម្រេចបានជោគជ័យនៃបទឈប់បាញ់នេះបានសង្គ្រោះអាយុជីវិតមនុស្សរាប់ពាន់នាក់ ហើយលោកក៏បានបញ្ជាឱ្យក្រុមការងារពាណិជ្ជកម្មរបស់លោកធ្វើការចចារពាណិជ្ជកម្មឡើងវិញជាមួយប្រទេសកម្ពុជា និងថៃផងដែរ។

លោក ដូណាល់ត្រាំ សរសេរថា៖ «ពេលនេះខ្ញុំបានបញ្ចប់សង្គ្រាមជាច្រើនក្នុងរយៈពេល៦ខែមកនេះ ខ្ញុំមានមោទនភាពដែលក្លាយជាប្រធានាធិបតីនៃសន្ដិភាព»៕