ទាហានកម្ពុជា២រូបដែលថៃបញ្ជូនមក គឺកំពុងទទួលបានការថែទាំ និងព្យាបាលទាំងផ្លូវកាយ និងផ្លូវចិត្ត

អ្នកនាំពាក្យក្រសួងការពារជាតិ លោកស្រីឧត្តមសេនីយ៍ឯក ម៉ាលី សុជាតា បានបញ្ជាក់ថា ទាហានកម្ពុជាចំនួន ២រូបដែលថៃចាប់យកទៅ ហើយទើបតែបញ្ជូនត្រលប់មកកម្ពុជាវិញនាព្រឹកថ្ងៃទី១ ខែសីហានេះ គឺកំពុងទទួលបានការថែទាំ និងព្យាបាលទាំងផ្លូវកាយ និងផ្លូវចិត្តដោយក្រុមគ្រូពេទ្យ។

បើតាមអ្នកនាំពាក្យក្រសួងការពារជាតិកម្ពុជា កាលពីវេលាម៉ោង១១ថ្ងៃត្រង់នេះ ភាគីថៃបានប្រគល់កងកម្លាំងចំនួន២រូបប៉ុណ្ណោះមកឱ្យកម្ពុជាវិញ ក្នុងចំណោមកងកម្លាំងសរុប២០រូប ដែលថៃចាប់យកទៅ កាលពីព្រឹកថ្ងៃទី២៩ ខែកក្កដាកន្លងទៅ ក្រោយបទឈប់បាញ់បានចូលជាធរមាន។

លើកឡើងក្នុងសន្និសីទសារព័ត៌មាន នារសៀលថ្ងៃនេះ លោកស្រី ម៉ាលី សុជាតា បានបញ្ជាក់ថា កងកម្លាំងទាំង២រូបរបស់កម្ពុជាកំពុងស្ថិតក្នុងការយកចិត្តទុកដាក់ខ្ពស់ក្នុងការមើលថែទាំ និងព្យាបាលនៅមន្ទីរពេទ្យ ទាំងសុខភាពផ្លូវកាយ និងសុខភាពផ្លូវចិត្ត។

រីឯកងកម្លាំងដែលនៅសេសសល់ផ្សេងក្រោមការគ្រប់គ្រងដោយយោធាថៃ អ្នកនាំពាក្យក្រសួងការពារជាតិកម្ពុជា បានបន្តអំពាវនាវម្ដងហើយម្ដងទៀតដល់ភាគីថៃ ដើម្បីធ្វើយ៉ាងណា បញ្ជូនកងកម្លាំងទាំងនោះឱ្យត្រឡប់មកកម្ពុជាវិញឱ្យបានឆាប់ ហើយលោកស្រី បញ្ជាក់ថា កម្ពុជានឹងបន្តចរចាឱ្យអស់លទ្ធភាពដើម្បីឱ្យពួកគាត់ត្រឡប់មកវិញឱ្យឆាប់បំផុត និងដោយសុវត្ថិភាព ស្របតាមច្បាប់មនុស្សធម៌អន្តរជាតិ។

គួរជម្រាបថា នៅព្រឹកម៉ោង១១ ថ្ងៃទី១ ខែសីហានេះ កម្ពុជាបានទទួលទាហានចំនួន២រូបរបស់ខ្លួន ដែលយោធាថៃបានចាប់យកទៅ ហើយត្រូវបញ្ជូនមកវិញនៅច្រកទ្វារព្រំដែនអន្ដរជាតិអូរស្មាច់ ខេត្តឧត្តរមានជ័យ ដែលរួមមាន អនុសេនីយ៍ត្រី អាង អឿង អាយុ៣៧ឆ្នាំ មានបញ្ហាសតិអារម្មណ៍ និងឈ្មោះព្រិន្ទបាលឯក ម៉ម វុទ្ធី អាយុ៥៣ឆ្នាំ រងរបួសធ្ងន់៕

ដោយ៖ ធឿន វ៉ាន់សុង