បុគ្គលដែលមិនសហការជាមួយមន្ត្រីសុខាភិ​បាលដើម្បីយកសំណាកត្រូវពិន័យចាប់ពី១​លាន​ដល់ ៥ លានរៀល

អ្នកនាំពាក្យក្រសួងយុត្តិធម៌ លោក គឹម សន្តិភាព បានបញ្ជាក់ជាថ្មីថា បុគ្គលដែលមិនព្រមសហការជាមួយមន្ត្រីសុខាភិបាលក្នុងការយកវត្ថុសំណាកទៅវិភាគរកមេរោគកូវីដ១៩ នឹងត្រូវផ្តន្ទាទោសពិន័យអន្តរការណ៍ចាប់ពី១​លានរៀល ទៅ៥លានរៀល។

បើតាមលោក គឹម សន្តិភាពបុគ្គលដែលប្រព្រឹត្តិអំពើល្មើសនេះ នឹងមិនរួចផុតពីកាតព្វកិច្ចបង់ប្រាក់ពិន័យអន្តរការណ៍នោះទេ។

ក្រសួងសុខាភិបាល បានប្រកាសរកឃើញអ្នកឆ្លងថ្មីចំនួន៦៣នាក់ទៀត ជាករណីឆ្លងសហគមន៍ទាំង៦៣នាក់ និងជាសះស្បើយ ៩៤នាក់។

ក្នុងនោះ នៅភ្នំពេញចំនួន៣០នាក់, នៅខេត្តស្វាយរៀងចំនួន២២នាក់, នៅខេត្តព្រះសីហនុចំនួន៦នាក់, នៅខេត្តកណ្ដាលចំនួន១នាក់, នៅខេត្តព្រៃវែងចំនួន១នាក់, នៅខេត្តកោះកុងចំនួន១នាក់ និងនៅខេត្តកំពង់ឆ្នាំងចំនួន១នាក់។

គិតត្រឹមព្រឹក ថ្ងៃទី០៥ ខែមេសា ឆ្នាំ២០២១ កម្ពុជារកឃើញអ្នកឆ្លង សរុបចំនួន២៧៥២ នាក់ អ្នកជាសះស្បើយសរុបចំនួន១៧៤៧ នាក់, កំពុងព្យាបាលចំនួន៩៧៩ នាក់ និងស្លាប់ចំនួន២១ នាក់៕

កោះកែវ