សម្តេច ម៉ែន សំអន បួងសួងសុំសេចក្តីសុខសេចក្តីចម្រើនជូនជាតិ និងប្រជាពលរដ្ឋ

សម្តេច​កិត្តិ​សង្គហ​បណ្ឌិត ម៉ែន សំអន ឧ​ត្ត​ម​ប្រឹក្សា​ផ្ទាល់​ព្រះមហាក្សត្រ កម្ពុជា​បានធ្វើការ​បួងសួង​សុំ​សេចក្តីសុខ សេចក្តីចម្រើន​ជូន​ជាតិ និង​ប្រជាពលរដ្ឋ នៅ​ប្រាសាទសំបូរព្រៃគុក ស្ថិតនៅ​ស្រុក​ប្រាសាទ​សំបូរ ខេត្ត​កំពង់ធំ នា​ព្រឹក​ថ្ងៃអាទិត្យ ៨​រោច ខែ​ស្រាពណ៍ ឆ្នាំម្សាញ់ សប្តស័ក ព​.​ស​. ២៥៦៩ ត្រូវ​នឹង​ថ្ងៃទី​១៧ ខែសីហា ឆ្នាំ​២០២៥។

ក្នុង​ពិធី​នោះ​ផងដែរ​ក៏មាន​ការ​យាង និង​អញ្ជើញ​ចូលរួម​ពី​សំណាក់ សម្តេច​រាជបុត្រី​ព្រះអនុជ នរោត្តម អរុណរស្មី​, លោក​ទេសរដ្ឋមន្ត្រី លោក ដៀប ពី​រី លោក នួន ផា​រ័ត្ន អភិបាល នៃ​គណៈ​អភិបាល​ខេត្ត​កំពង់ធំ សមាជិក​ព្រឹទ្ធសភា តំណាងរាស្ត្រ​មណ្ឌល​កំពង់ស្ពឺ តំណាងរាស្ត្រ​មណ្ឌល​ត្បូងឃ្មុំ តំណាងរាស្ត្រ​មណ្ឌល​កំពង់ធំ ភរិយា​ថ្នាក់ដឹកនាំ ឯកឧត្តម អ្នកឧកញ៉ា ឧកញ៉ា លោក លោកស្រី មន្ដ្រីរាជការ សិស្សានុសិស្ស និង​ប្រជាពលរដ្ឋ​យ៉ាងច្រើន​កុះករ។

សម្តេច​កិត្តិ​សង្គហ​បណ្ឌិត​ ក៏បាន​ឧទ្ទិស​បួងសួង​ដល់​ដួង​ព្រះ​វិញ្ញាណក្ខន្ធ​អតីត​ព្រះមហាក្សត្រ​គ្រប់​ជំនាន់ បុព្វបុរស​កសាង​ប្រាសាទសំបូរព្រៃគុក សូម​តាម​ជួយ​បីបាច់​ថែរក្សា និង​ប្រទាន ពរជ័យ​ប្រគេន​ពរ​ដល់ ព្រះសង្ឃ​គ្រប់​ព្រះអង្គ និង​គោរព​ជូនពរ​សម្តេច​តេ​ជោ និង​សម្តេច​កិត្តិ​ព្រឹទ្ធ​បណ្ឌិត សម្តេច​មហា​បវរ​ធិបតី ហ៊ុន ម៉ា​ណែ​ត នាយករដ្ឋមន្ត្រី​កម្ពុជា និង​លោកជំទាវ​បណ្ឌិត ពេ​ជ ច័ន្ទ​មុន្នី ពិសេសវីរ​កងទ័ព​ជួរមុខ​ទាំងអស់ ព្រមទាំង​ប្រជាពលរដ្ឋ​នៅ​ទូទាំងប្រទេស សូមឱ្យ​ជួបតែសេចក្តី​សុខ​សេចក្តីចម្រើន​គ្រប់ៗ ​គ្នា និង ឈ្នះអស់​មារ​សត្រូវ។ សូមឱ្យ​ប្រទេសជាតិ រួច​ផុតពីជំងឺ​ដង្កាត់ គ្រោះ​កាច​ចង្រៃ មាន​ទឹកភ្លៀង​គ្រប់គ្រាន់ តាម​រដូវ​កាល ទទួលបាន​ទេសចរ និង​អ្នកវិនិយោគទុន​កាន់តែ​កើន​ឡើង កសិផល​ទទួលបាន​ទិន្នផល​ខ្ពស់ ដើម្បី​ជា​កត្តា​ចូលរួម​ចំណែក​ដល់​កិច្ច​អភិវឌ្ឍន៍​ជាតិ៕

អត្ថបទ ៖ វិមាន