ព័ត៌មានជាតិ

រយៈពេលថ្ងៃ៤សមត្ថកិច្ចឃាត់យានយន្តល្មើសនឹងតបម្រាមគោចរ១៧៤គ្រឿងយកទៅរក្សាទុក១៤ថ្ងៃ

បានផុស

៥ years មុន

នៅ

ថ្ងៃអង្គារ ៦ មេសា ២០២១

ដោយ

ភ្នំពេញ ៖ លោក វរសេនីយ៍ឯក សាន សុខសីហា អ្នកនាំពាក្យស្នងការនគរបាលរាជធានីភ្នំពេញបានមានប្រសាសន៍នៅថ្ងៃទី០៦ មេសានេះថា ក្នុងរយៈពេល៣ថ្ងៃនេះ ពោលគឺគិតចាប់ពីថ្ងៃទី ០២ ដល់ថ្ងៃទី០៥ មេសា ឆ្នាំ២០២១នេះ សមត្ថកិច្ចឃាត់យានយន្តដែលល្មើសនឹងបម្រាមគោចរចំនួន១៧៤គ្រឿងក្នុងនោះមានម៉ូតូចំនួន១៥៦គ្រឿងនិងរថយន្តចំនួន២៨គ្រឿង។

លោកបានបន្តថា ម៉ូតូនិងរថយន្តទាំង១១៧៣គ្រឿងនោះ ត្រូវបានសមត្ថកិច្ចយកទៅរក្សាទុកនៅតាមអធិការដ្ឋានខណ្ឌនីមួយៗរយៈពេល១៤ថ្ងៃទើបប្រគល់ជូនម្ចាស់វិញ។ ចំណែកអ្នកបើកបរល្មើសនឹងបម្រាមគោចរត្រូវអនុវត្តទៅតាមគោលការណ៍ណែនាំរបស់សាលារាជធានីភ្នំពេញដោយតម្រូវឲ្យធ្វើចត្តាឡីស័កនៅតាមផ្ទះរៀងៗខ្លួនរយៈពេល១៤ដោយមានការត្រួតពិនិត្យយ៉ាងតឹងរ៉ឹងពីអាជ្ញាធរមូលដ្ឋាន។

លោកបានបន្តទៀតថា ក្នុងចំណោម១៧៣គ្រឿងនោះសមត្ថកិច្ចបានឃាត់នៅថ្ងៃទី០២មេសាបានចំនួន៧៣គ្រឿងក្នុងនោះមានម៉ូតូចំនួន៦៥គ្រឿងនិងរថយន្តចំនួន៨គ្រឿង។ នៅថ្ងៃទី០៣មេសាចំនួន៨២គ្រឿងក្នុងនោះម៉ូតូ៦៩គ្រឿងនិងរថយន្តចំនួន១៣គ្រឿងនិងថ្ងៃទី០៤មេសាចំនួន១០គ្រឿងក្នុងនោះមានម៉ូតូចំនួន៤គ្រឿងនិងរថយន្តចំនួន៦គ្រឿង។ នៅថ្ងៃទី០៥ ខែមេសា ឆ្នាំ២០២១ ឃាត់យានយន្តបានចំនួន៩គ្រឿង ក្នុងនោះម៉ូតូបានចំនួន ០៨គ្រឿងនិងរថយន្តបានចំនួន ០១ គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក៏ដោយ អ្នកនាំពាក្យនោះបានបន្ថែមថា ប្រជាពលរដ្ឋភាគច្រើនបានដឹងអំពីបម្រាមគោចរនេះ ហើយបានចូលរួមគោរព និងសហការបានយ៉ាងល្អដោយមិនចេញពីផ្ទះបើមិនមានការចាំបាច់។ មានតែប្រជាពលរដ្ឋចំនួនតិចតួចបំផុតដែលល្មើសនឹងបម្រាមនេះ គោចរនេះ។

លោកសង្ឃឹមជឿជាក់ថា ចាប់ពីយប់នេះទៅនិងបន្តបន្ទាប់ទៀត បងប្អូនប្រជាពលរដ្ឋនឹងអនុវត្តតាមបម្រាមគោចរនេះ ជាពិសេសចំនួនអ្នកល្មើសនឹងថយចុះពីមួយថ្ងៃទៅមួយថ្ងៃដើម្បីចូលរួមបង្ការ និងទប់ស្កាត់ការឆ្លងរាលដាលវីរុសកូវី១៩។

គួរបញ្ជាក់ថា វិធានការរដ្ឋបាលបណ្តោះអាសន្នដើម្បីទប់ស្កាត់ការឆ្លងរាលដាលជំងឺកូវីដ-១៩ នៅក្នុងភូមិសាស្ត្ររាជធានីភ្នំពេញនេះមានរយៈពេល២សប្តាហ៍ គឺចាប់ពីថ្ងៃទី០១ ខែមេសានេះ រហូតដល់ថ្ងៃទី១៤ ខែមេសាឆ្នាំ២០២១៕

ដោយ ៖ សំអឿន