ទៅចូលរួមបុណ្យឯករាជ្យជាតិវៀតណាមនៅហាណូយ សម្ដេច ហ៊ុន សែន គ្រោងជួបមេដឹកនាំបរទេសជាច្រើន

នាព្រឹកថ្ងៃទី១ ខែកញ្ញា ឆ្នាំ២០២៥ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជា បានចាកចេញពីភ្នំពេញហើយ ដើម្បីដឹកនាំគណៈប្រតិភូជាន់ខ្ពស់កម្ពុជាអញ្ជើញបំពេញទស្សនកិច្ច និងចូលរួមពិធីអបអរសាទរខួប៨០ឆ្នាំ ទិវាបុណ្យឯករាជ្យជាតិវៀតណាម នៅរដ្ឋហាណូយ។

ដំណើររបស់សម្ដេចតេជោ ទៅកាន់ប្រទេសវៀតណាមថ្ងៃនេះ គឺតបតាមការអញ្ជើញរបស់លោក តូ ឡឹម អគ្គលេខាធិការនៃគណៈកម្មាធិការ​មជ្ឈិមបក្សកុម្មុយនីស្តវៀតណាម។

សមាសភាពគណៈប្រតិភូអមដំណើរសម្តេចតេជោក្នុងទស្សនកិច្ចនេះ រួមមានសម្តេចពិជ័យសេនា​ ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធាន​គណបក្ស សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ អនុប្រធាន​គណបក្ស និងជាប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា រួមទាំងថ្នាក់​ដឹកនាំជាន់ខ្ពស់មកពីក្រសួងស្ថាប័ននានារបស់រាជរដ្ឋាភិបាល និងស្ថាប័ននីតិប្បញ្ញត្តិ។

តាមការគ្រោងទុក ស្របពេលនៃការអញ្ជើញចូលរួមព្រឹត្តិការណ៍ជាប្រវត្តិសាស្ត្រខាងលើ សម្តេចតេជោ ​ប្រធានព្រឹទ្ធសភា នឹងមានជំនួបពិភាក្សាការងារដាច់ដោយឡែកពីគ្នាជាមួយថ្នាក់ដឹកនាំវៀតណាម ដូចជា លោក តូ ឡឹម អគ្គលេខាធិការបក្សកុម្មុយនីស្តវៀតណាម លោក ជិន ថាញ់មិន ប្រធានរដ្ឋសភា និងលោក ផាម មិញជិញ នាយករដ្ឋមន្ត្រីវៀតណាម។

សម្តេចតេជោក៏គ្រោងជួបពិភាក្សាការងារជាមួយថ្នាក់ដឹកនាំបរទេស​ដទៃ​ទៀតដែលអញ្ជើញចូលរួមពិធីរំលឹកខួបនេះដែរ។

ជាមួយនឹងវត្តមានគណៈប្រតិភូជាន់ខ្ពស់កម្ពុជា កងទ័ពនៃកងយោធពលខេមរភូមិន្ទកម្ពុជាចំនួន១២០នាក់ ក៏បានត្រៀមចូលរួមដង្ហែក្បួនព្យុហយាត្រាដើម្បីអបអរសាទរខួប៨០ទិវាបុណ្យឯករាជ្យជាតិនេះ រួមជាមួយនឹងកងទ័ពមកពីប្រទេសចិន រុស្ស៊ី និងឡាវ ផងដែរ។

នេះជាទស្សនកិច្ចលើកទី៣ហើយ ក្នុងឆ្នាំ២០២៥ ដែលសម្តេចតេជោ ហ៊ុន សែន ក្នុងនាមជាប្រធានព្រឹទ្ធសភា និងជាប្រធានគណបក្សប្រជាជនកម្ពុជា ទៅកាន់ប្រទេសវៀតណាម ដែលជាការឆ្លុះបញ្ចាំងពីការយកចិត្តទុកដាក់ និងការប្តេជ្ញា​ចិត្ត​ខ្ពស់បំផុតពីថ្នាក់ដឹកនាំកម្ពុជាចំពោះសារៈសំខាន់ការកសាងភាពជឿទុកចិត្តគ្នា និង​ការពង្រឹងទំនាក់ទំនង មិត្តភាពដ៏ល្អប្រសើរជាមួយប្រទេសជិតខាង នៅគ្រប់កម្រិត និង​គ្រប់វិស័យ ស្របតាមស្មារតី «ភាពជាអ្នកជិត​ខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ ស្ថិរភាពយូរ​អង្វែង»៕