កាហ្វេមណ្ឌលគិរី កំពុងមានទីផ្សារខ្ពស់ ខណៈកសិករនឹងប្រមូលទិន្នផលនៅខែវិច្ឆិកា

ដោយសារប្រជាជនកម្ពុជាងាកមកគាំទ្រផលិតផលក្នុងស្រុកកាន់តែខ្លាំង កាហ្វេមណ្ឌលគិរីកំពុងទទួលបានចំណែកទីផ្សារយ៉ាងសំខាន់ ខណៈកសិករកំពុងរៀបចំប្រមូលផលដំណាំរបស់ពួកគេក្នុងខែវិច្ឆិកាខាងមុខនេះ។ ការដាំដុះកាហ្វេកំពុងមានតម្រូវការការកើនឡើងជាលំដាប់នៅលើទីផ្សារ ដែលជំរុញដោយតម្លៃកើនឡើង ហើយកសិករក្នុងស្រុកមួយចំនួនចាប់ផ្តើមងាកទៅរកការដាំដុះកាហ្វេ។ ការដាំដំណាំកាហ្វេនេះ ក៏ស្របពេលជាមួយនឹងការកើនឡើងនៃការពេញនិយម​ពិសារកាហ្វេក្នុងចំណោមប្រជាជនក្នុងស្រុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ចេះ ភា អាយុ៤២ឆ្នាំ បច្ចុប្បន្នស្នាក់នៅភូមិពូចា ឃុំប៊ូស្រា ស្រុកពេជ្រាដា ខេត្តមណ្ឌលគិរី និងជាសមាជិក ជនជាតិដើមភាគតិចព្នង បានប្រាប់ “កម្ពុជាថ្មី” ថា គាត់មានចម្ការកាហ្វេមួយកន្លែង ដែលមានផ្ទៃដី ៤ ហិកតា។
គាត់​ប្រមូល​ផល​កាហ្វេ​ស្រស់​ចន្លោះ​ពី ៧ ទៅ ៨ តោន​ក្នុង​មួយ​ហិកតា ហើយ​លក់​ផលិតផល​ក្នុង​តម្លៃ ១.០៧៥ ដុល្លារ​ក្នុង​មួយ​តោន។ កាហ្វេ​ដែល​គាត់​ដាំ​គឺ​ជា​ប្រភេទ Robusta ហើយរាល់ពេលប្រមូលផល កាហ្វេទាំងអស់ត្រូវបានលក់ទៅឱ្យឈ្មួញគ្មានសល់។

កសិកររូបនេះបានគូសបញ្ជាក់ថា ការដាំដុះដំណាំកាហ្វេមួយប្រភេទនេះមិនលំបាកក្នុងការដាំដុះនោះទេ ពោលគឺ គ្រាន់តែយើងស្រោចទឹកឱ្យបានត្រឹមត្រូវគ្រប់គ្រាន់ សម្អាតស្មៅ និងដាក់ជីបន្តិចបន្តួចតែប៉ុណ្ណោះ។ បន្ទាប់ពីប្រកបដាំដុះដំណាំកាហ្វេរយៈពេលជាង៦ឆ្នាំកន្លងមកនេះ ធ្វើឱ្យលោកមានជីវភាពកាន់តែធូធាពីមួយឆ្នាំទៅមួយឆ្នាំ។ កាហ្វេប្រភេទ Robusta របស់លោក នឹងត្រូវប្រមូលផលទិន្នផលខែវិច្ឆិកាខាងមុខនេះ ហើយរំពឹងថាតម្លៃទីផ្សារកាហ្វេនឹងមានការកើនឡើងជាបន្តបន្ទាប់ដែលអាចលើកស្ទួយជីវភាពរបស់កសិករឱ្យមានភាពធូរធា។

បន្ថែមពីលើនេះ គេសង្កេតឃើញថា ប្រជាពលរដ្ឋនៅស្រុកពេជ្រាដា បានចាប់ផ្តើមដាំកាហ្វេប្រភេទនេះក្នុងបរិមាណច្រើន ហើយតម្រូវការនៅលើទីផ្សារនាពេលបច្ចុប្បន្ននេះ នៅតែមានសន្ទុះខ្លាំង ដោយតម្លៃបានហក់ឡើងគួរសម្យ។ ក្នុងនាមលោក​ជាកសិករដាំកាហ្វេ លើកទឹកចិត្តដល់កសិករផ្សេងទៀត ឱ្យសាកល្បងដាំកាហ្វេប្រភេទនេះ ព្រោះវាងាយស្រួលដាំដុះ ត្រូវការការថែទាំតិចតួច ធន់នឹងអាកាសធាតុ និងសមស្របខ្លាំងសម្រាប់ខេត្តមណ្ឌលគិរី។

លោក សុង ឃាង ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តមណ្ឌលគិរី ក៏បានឱ្យដឹងផងដែរថា ការដាំដុះដំណាំកាហ្វេ អនុវត្តបានចំនួន ៥២៩ហិកតាក្នុងឆ្នាំ(២០២៤)។ លោកបញ្ជាក់ថា កសិករដាំកាហ្វេក្នុងខេត្តភាគច្រើនជាប្រភេទពូជរ៉ូប៊ូស្តា (Robusta)មានឈ្មោះTR4, TR9, TR5,  TRS1 (ពូជថ្មីចុងក្រោយ ) ផងដែរ៕

អត្ថបទ៖រៀម សុខហេង