ហ្វូងសត្វជ្រឹងរាប់ពាន់ក្បាលបង្ខំចិត្តប្ដូរទ្រនំ ក្រោយដើមឈើដែលធ្លាប់ទំរាប់ឆ្នាំត្រូវងាប់

ហ្វូងសត្វជ្រឹងរាប់ពាន់ក្បាលដែលធ្លាប់នៅលើដើមជ្រេសធំមួយខាងមុខវត្តបាយដំរាំ ឥឡូវបានផ្លាស់ប្ដូរទីជម្រកហើយ ក្រោយពីដើមជ្រេសដ៏ធំមួយនេះ បានងាប់ដោយមិនដឹងមូលហេតុ។

បើតាមការអះអាងពីប្រជាពលរដ្ឋដែលរស់នៅក្បែរវត្តបាយដំរាំ បាននិយាយថា ប្រមាណជាងមួយខែកន្លងទៅនេះ ដើមជ្រេសដ៏ធំមួយ ដែលនៅក្នុងភូមិបាយដំរាំ ក្នុងឃុំបាយដំរាំ ស្រុកបាណន់ ខេត្តបាត់ដំបង បានងាប់បាត់ទៅហើយ ដែលដើមជ្រេសនេះ គឺជាជម្រកស្នាក់អាស្រ័យរបស់ហ្វូងសត្វជ្រឹងរាប់ពាន់ក្បាល។

គួរបញ្ជាក់ថា កាលពីប៉ុន្មានឆ្នាំមុន ទីតាំងនេះគឺជាផ្ទះរបស់ប្រជាពលរដ្ឋ និងជាផ្សារក្រមួនមួយដែលអ្នកផងទាំងឡាយតែងតែនាំគ្នាមកលក់ និងទិញទំនិញសព្វបែបយ៉ាង ហើយផ្សារនេះក៏បានកើតឡើងតាំងពីសម័យសង្គមរាស្ត្រនិយមមកម្ល៉េះ គឺជាផ្សារគ្មានដំបូល គឺមានតែឆត្រ ដែលគេតែងហៅថា “ផ្សារវត្តបាយដំរាំ”។

លុះក្រោយមក លោកអភិបាលស្រុកបាណន់ បានស្នើសុំឲ្យមានការរុះរើទីតាំងនេះដើម្បីបង្កើតជាសួន ព្រមទាំងមានសាលាឆទានសម្រាប់ឲ្យភ្ញៀវទេសចរជាតិ និងអន្តរជាតិ មកកម្សាន្តគយគន់មើលហ្វូងសត្វជ្រឹង ដែលតោងមែកឈើ យ៉ាងពពាក់ពពូន គួរឱ្យចង់ទស្សនា។

ពលរដ្ឋនៅទីនោះបានលើកឡើងថា នៅសុខៗស្រាប់តែដើមជ្រេសនោះ ចាប់ផ្ដើមរុះស្លឹកជាបណ្ដើរៗរហូតងាប់ទាំងដើមតែម្ដង ដោយមិនដឹងមូលហេតុ រីឯហ្វូងសត្វជ្រឹងក៏បានប្ដូរទីតាំងទៅជ្រកនៅលើដើមគរដែលស្ថិតនៅក្បែរនោះទៅវិញដោយសារតែជម្រកចាស់គ្មានស្លឹកហើយមិនអាចឲ្យពួកវាជ្រកបាន។

បច្ចុប្បន្នទីតាំងសួនច្បារដែលលោកអភិបាលស្រុកបាណន់ បានរៀបចំកសាងឡើងនោះ បែរជាគ្មានអ្នកថែទាំទៅវិញ ធ្វើឱ្យទីតាំងនេះមានតែស្មៅដុះទ្រុបទ្រុល ដោយគ្មានសោភ័ណភាពអ្វីបន្តិចទាល់តែសោះហាក់បីដូចជាគ្រាន់តែដេញទីផ្សារចេញហើយទុកចោលដូចទីរហោស្ថាន នេះប្រហែលជាសត្វជ្រឹងដូរទីជម្រក ភ្ញៀវទេសចរក៏មិនបានចូលមកទស្សនា ដូច្នេះហើយបានជាសួនមានតែស្មៅយ៉ាងដូច្នេះ ដែលធ្វើឲ្យទីតាំងនេះបាត់អស់សោភណភាព៕

អត្ថបទ៖ សោ និយមរ័ត្ន