កម្លាំងនគរបាលចម្រុះខេត្តមណ្ឌលគិរី រឹបអូសបានឈើប្រណិតខុសច្បាប់ជិត ២០ កំណាត់

ខេត្តមណ្ឌលគិរី៖ កម្លាំងនគរបាលចម្រុះនៃស្រុកអូររាំង បានបើកប្រតិបត្តិការចុះបង្រ្កាបករណីបទល្មើសធនធានធម្មជាតិមួយកន្លែង ដោយរឹបអូសបានឈើប្រណិតប្រភេទស្រឡៅលេខ១ ចំនួន ១៨ កំណាត់ កាលពីថ្ងៃទី ៧ខែតុលា ឆ្នាំ ២០២៥។

ប្រតិបត្តិការបង្រ្កាបនេះដឹកនាំដោយលោក ឃន់ អូន អភិបាលរងស្រុកអូររាំង សហការជាមួយកម្លាំងស្នាក់ការបរិស្ថានរងស្រុកអូររាំង បានចុះទប់ស្កាត់ និងបង្ក្រាបបទល្មើសធនធានធម្មជាតិនៅត្រង់ចំណុចផ្លូវក្រោយខ្ទមអ្នកតា ស្ថិតនៅភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរី។ ឈើ​ដែល​រឹបអូស​បាន​ត្រូវ​ឈ្មួញ​រក្សាទុក​ដោយ​ខុសច្បាប់​នៅ​ទីតាំង​នេះ​។ សកម្មភាពនេះគឺជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់ក្នុងការទប់ស្កាត់ និងបង្ក្រាបសកម្មភាពធនធានធម្មជាតិខុសច្បាប់នៅក្នុងខេត្ត។

ក្នុងប្រតិបត្តិការបង្ក្រាបនេះ ឈើដែលបានរឹបអូសនោះជាឈើ ស្រឡៅ ប្រភេទលេខ១ មានចំនួន១៨ ដុំ ដែលជនមិនស្គាល់អត្តសញ្ញាណយកលាក់ទុកចោលក្នុងព្រៃ។ ក្រោយពីការបង្រ្កាបនោះ ក្រុមការងារជំនាញបានដឹកជញ្ជូនវត្ថុតាងជាឈើខាងលើយកមករក្សាទុកនៅស្នាក់ការរងអូររាំង ដើម្បីចាត់ការទៅតាមនីតិវីធីច្បាប់។

នៅក្នុងខេត្តមណ្ឌលគិរី ដែលសម្បូរទៅដោយធនធានធម្មជាតិ និងព្រៃឈើ ត្រូវបានមន្រ្តីជំនាញនៃមន្ទីរបរិស្ថានខេត្ត និងអាជ្ញាធរពាក់ព័ន្ធបានធ្វើការអប់រំពលរដ្ឋជារឿយៗ និងព្រមានចាត់វិធានការមិនចំពោះមុខ ទៅលើបុគ្គលណាដែលប្រព្រឹត្តបទល្មើសធនធានធម្មជាតិ និងកាប់ព្រៃឈើដោយខុសច្បាប់។ ជាមួយនឹងការព្រមាននេះ មន្រ្តីបន្តអំពាវនាវដល់ប្រជាពលរដ្ឋ និងឈ្មួញ ត្រូវបញ្ឈប់ជាបន្ទាន់រាល់សកម្មភាពប្រព្រឹត្តបទល្មើសព្រៃឈើផ្សេងៗ ដែលប៉ះពាល់ទៅដល់សម្បត្តិធនធានធម្មជាតិ។

ទោះបីជាមានការរឹតបន្តឹងច្បាប់ និងការព្រមានក្តី ក៏បទល្មើសព្រៃឈើបានបន្តកើតមាននៅក្នុងតំបន់មួយចំនួនក្នុងខេត្តមណ្ឌលគិរីនាពេលថ្មីៗនេះ។ សកម្មភាពខុសច្បាប់ដែលកំពុងបន្តទាំងនេះត្រូវបានជំរុញដោយក្រុមឈ្មួញ និងបុគ្គលមួយចំនួនគប់គិតគ្នាប្រើមធ្យោបាយផ្សេងៗ និងរថយន្តក្នុងការដឹកជញ្ជូនឈើខុសច្បាប់៕

អត្ថបទ៖ រៀម សុខហេង