អនាគតអគ្គលេខាធិការអាស៊ាន រំពឹងថា បញ្ហាសង្គ្រាមនៅរុស្ស៊ី និងអ៊ុយក្រែន អាចយកមកជជែកពិភាក្សាក្នុងកិច្ចប្រជុំនៅកម្ពុជា

ក្នុងនាមជាអគ្គរដ្ឋលេខាធិកាអាស៊ានថ្មីឆ្នាំ២០២៣ លោក កៅ គឹមហួន បានថ្លែងប្រាប់មក “កម្ពុជាថ្មី” ថា លោកសង្ឃឹមថា បញ្ហារវាងរុស្ស៊ី និងអ៊ុយក្រែន នឹងអាចត្រូវយកមកដាក់លើតុពិភាក្សាក្នុងកិច្ចប្រជុំនៅកម្ពុជា ជាពិសេស កិច្ចប្រជុំអាស៊ីបូព៌ា ដែលមានប្រមុខរដ្ឋកំពូលៗមកពីប្រទេសជាច្រើនចូលរួម។

លោក កៅ គឹមហួន បានលើកឡើងថា ជុំវិញនឹងបញ្ហារវាងរុស្ស៊ី និងអ៊ុយក្រែន គឺមានសមាជិកជាច្រើនជំរុញឱ្យមានការចរចារ មិនថាភាគីកម្ពុជា ភាគីទួកគី ឬ ឥណ្ឌូនេស៊ីឡើយ។ ក្នុងឱកាសដែលកម្ពុជាជាប្រធានអាស៊ានខាងមុខ នឹងមានកិច្ចប្រជុំផ្ទៃក្នុងអាស៊ាននៅកម្ពុជា ដែលលើកយកនូវបញ្ហាជាច្រើនមកដោះស្រាយ។

ឆ្លៀតឱកាសនោះ បន្ទាប់ពីមានការប្រជុំផ្ទៃក្នុងអាស៊ានរួច នឹងមានកិច្ចប្រជុំកំពូលអាស៊ីបូព៌ាម្តង ដែលជាកិច្ចប្រជុំមួយដែលមានសារៈសំខាន់បំផុត ព្រមទាំងមានប្រមុខរដ្ឋមកពីបណ្តាប្រទេសធំៗ ជាសមាជិកអាស៊ីបូព៌ាចូលរួមទៀតផង។ កិច្ចប្រជុំនេះ អាចនឹងមានការជជែកវែកញែកពីបញ្ហាផ្សេងៗ ដែលកំពុងតែកើតមានឡើងបច្ចុប្បន្ន មិនថា វិបត្តិសេដ្ឋកិច្ច បញ្ហាវិបត្តិកូវីដ-១៩ បញ្ហានៅមីយ៉ាន់ម៉ា ឬ បញ្ហារវាងរុស្ស៊ី និងអ៊ុយក្រែននោះទេ។ លោកសង្ឃឹមថា នឹងមានការចរចារ និងដំណោះស្រាយក្នុងកិច្ចប្រជុំនៅកម្ពុជានាពេលខាងមុខ។

យ៉ាងណាមិញ បញ្ហារវាងប្រទេសទាំងពីរនេះ គឺជាបញ្ហាសកលលោកមួយដែលមិនទាន់មានភាពធូរស្រាលនៅឡើយទេ បើគីតតាំងពីដើមឆ្នាំ២០២២ មកដល់បច្ចុប្បន្ននេះ។​ ក្នុងនោះ ក៏មានភាគីជាច្រើន រួមទាំងកម្ពុជាផងនោះ ជំរុញឱ្យប្រទេសទាំងពីរ មានកិច្ចចរចាររវាងគ្នា ដើម្បីស្វែងរកនូវសន្តិភាពរបស់ប្រទេសទាំងពីរ ក៏ដូចជា ពិភពលោកទាំងមូល៕

ដោយ៖ អុន ស្រីមាន