លោក ញឹក ប៊ុនឆៃ អះអាងជាថ្មីថា គណបក្សរបស់លោកប្រកាន់ជំហរធ្វើនយោបាយ មិនញុះញង់ និងមិនជេរប្រមាថគ្នា

លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានអះអាងជាថ្មីថា គណបក្សរបស់លោក ប្រកាន់ជំហរធ្វើនយោបាយ ដោយមិនញុះញង់គ្នា មិនជេរប្រមាថគ្នា និងមិនលាបពណ៌គ្នា ជាដើម។​ ការអះ​អាងជាថ្មីនេះ បន្ទាប់ពីគណបក្សរបស់លោក បានរួបរួមគ្នាជាមួយគណបក្សកម្ពុជានិយម ដែលបង្កើតឡើងដោយអតីតតំណាងរាស្រ្ដ នៃអតីតគណបក្សសង្រ្គោះជាតិ។

លោក ញឹក ប៊ុនឆៃ បានថ្លែងក្នុងកម្មវិធីវេទិកាសាធារណៈ ស្ដីពី ”ប្រជាធិបតេយ្យសេរីកណ្ដាលនិយម” នៅខេត្តបន្ទាយមានជ័យ កាលពីថ្ងៃទី ១ ខែមីនាថា​ គណបក្សខ្មែររួបរួមជាតិរបស់លោក ប្រកាន់យកគោលការណ៍បង្រួបបង្រួមផ្សះផ្សាជាតិ តាមស្មារតីកិច្ចព្រមព្រៀងសន្តិភាពទីក្រុងប៉ារីស ដោយអហិង្សា ដោយមិនញុះញង់គ្នា មិនជេរប្រមាថគ្នា និងមិនលាបពណ៌គ្នា ជាដើម។

នៅក្នុងឱកាសនោះដែរ លោក ញឹក ប៊ុនឆៃ ក៏បានជម្រាបជូនសកម្មជន និងអ្នកគាំទ្ររបស់លោកអំពីការរួបរួមគ្នា រវាងគណបក្សខ្មែររួបរួមជាតិ និងគណបក្សកម្ពុជានិយមរបស់លោក យ៉ែម បុញ្ញឬទ្ធិ ដែលបង្កើតឡើងដោយអតីតតំណាងរាស្រ្ដ នៃអតីតគណបក្សសង្រ្គោះជាតិ។

លោកថា កាលពីថ្ងៃទី ១០ ខែតុលា ឆ្នាំ ២០២២កន្លងទៅនេះ គណបក្សខ្មែររួបរួមជាតិ និងគណបក្សកម្ពុជានិយម បានចុះកិច្ចព្រមព្រៀងបង្រួបបង្រួមគ្នាជាគណបក្សតែមួយ ដើម្បីបង្កើតគោលនយោបាយប្រជា​ធិបតេយ្យសេរីកណ្ដាលនិយម។ លោក ញឹក ប៊ុនឆៃ បានឲ្យដឹងបន្តថា បន្ទាប់ពីគណបក្សទាំងពីរ បានបង្រួបបង្រួមគ្នាមក មានអតីតអ្នករាជានិយម និងអ្នកអតីតគណបក្សប្រឆាំង បានមកចូលរួមជាបន្តបន្ទាប់។

កាលពីថ្ងៃទី ២៨ ខែកុម្ភៈកន្លងទៅនេះ លោក ញឹក ប៊ុនឆៃ ប្រធានគណបក្សខ្មែររួបរួមជាតិ បានឲ្យដឹងថា លោក ង៉ោ​ គឹមជាង​ អតីតតំណាងរាស្ត្រខេត្តកំពង់ឆ្នាំង​ អាណត្តិទី ៥ (២០១៣) មកពីអតីតគណបក្សសង្គ្រោះជាតិ​មួយរូបទៀត បានចូលរួមជីវភាពនយោបាយ ជាមួយគណបក្សខ្មែររួបរួមជាតិ។

កាលពីពេលថ្មីៗនេះដែរ អតីតតំណាងរាស្ត្រខេត្តព្រៃវែង​ អាណត្តិទី ៥ (២០១៣) នៃអតីតគណបក្សសង្រ្គោះជាតិ ៣រូប រួមមាន៖ លោក យ៉ែម​ បុញ្ញឫទ្ធិ​, លោក ទួត​ ឃឿត​ និងលោក ឡាត់​ លិតេយ្យ​ ក៏បានចូលរួមជីវភាពនយោបាយ ជាមួយគណបក្សខ្មែររួបរួមជាតិ ផងដែរ៕