នយោបាយ

លោក ញឹក ប៊ុនឆៃ ថាបញ្ហាព្រំដែនចាប់ផ្ដើមមានបញ្ហាបន្ទាប់ពីថៃគូរព្រំដែនថ្មី

បានផុស

១១ ខែ មុន

នៅ

ថ្ងៃសុក្រ ៣០ ឧសភា ២០២៥

ដោយ

អតីតមេទ័ពលោក ញឹក ប៊ុនឆៃ បានលើកឡើងថាព្រំដែនកម្ពុជា-ថៃមានព្រំដែនច្បាស់លាស់ដែលធ្វើឡើងដោយបារាំង និងសៀម តាំងពីឆ្នាំ១៩០៤ ដែលធ្វើឱ្យប្រទេសទាំងពីរមិនមានបញ្ហាព្រំដែននោះទេ ទើបតែមានបញ្ហានៅឆ្នាំ២០០៨ ដោយសារគណៈរដ្ឋមន្ត្រីថៃពេលនោះគូរផែនទីថ្មីដែលបង្កឱ្យមានបញ្ហាដល់បច្ចុប្បន្នបូករួមជាមួយចលនាប្រឆាំងញុះញង់នៅប្រទេសថៃថែមទៀតបានអុជអាលឱ្យកើតបញ្ហាដល់បច្ចុប្បន្ន។

ប្រធានគណបក្សខ្មែររួបរួមជាតិលោក ញឹក ប៊ុនឆៃ បានលើកឡើងក្នុងសន្និសីទសារព័ត៌មាននៅវិមាន៧មករា រសៀលថ្ងៃទី៣០ ខែឧសភា ឆ្នាំ២០២៥នេះថា បញ្ហាដែលកើតឡើងរវាងថៃនិងកម្ពុជាកើតពីចលនានយោបាយជ្រុលនិយមដែលញុះញង់ឱ្យមានបញ្ហាទាំងអស់។

លោកថា៖ «ធាតុពិតបញ្ហាព្រំដែនកម្ពុជា-ថៃអត់ត្រូវមានរឿងទេ យើងមានព្រំដែនច្បាស់លាស់។ សន្និសញ្ញាបារាំង-សៀម ១៩០៤មកគឺមានច្បាស់។ តែក្រោយមកនៅពេលដែលថៃចាញ់ក្ដីរឿងប្រាសាទព្រះវិហារមកមានគណៈរដ្ឋមន្ត្រីថៃមួយគឺគូរផែនទីថ្មី។ [..] ចេះតែយកដោយសារពួកញុះញង់ពួកប្រឆាំងហ្នឹងដែលធ្វើឱ្យយើងចេះតែមានបញ្ហាគ្នារហូត»។

លោកក៏បង្ហាញពីជំហរគាំទ្រដល់ជំហររដ្ឋាភិបាលទាក់ទងនឹងការប៉ះទង្គិចតំបន់មុំបី និងការរក្សា ដាក់ទ័ពឈរជើងនៅទីតាំងប៉ះទង្គិចដដែលជាជំហរម៉ឺងម៉ាត់បង្ហាញពីការការពារបូរណភាពទឹកដីកម្ពុជា។

លោកថា៖ «យើងមិនអាចថយបានទេព្រោះយើងអត់មានចូលដីគេទេ។ គេថាឱ្យយើងថយព្រោះគេថយដែរ គេថយព្រោះគេចូលដីយើង! យើងអត់ថយទេព្រោះយើងនៅលើដីយើងៗអត់មានចូលដល់ដីថៃទេ»។

គួរឱ្យដឹងផងដែរថាតាមរយៈលទ្ធផលជំនួបរវាងមេទ័ពជើងគោកកម្ពុជា និងថៃកាលពីថ្ងៃទី២៩ ខែឧសភា ប្រទេសកម្ពុជាបានបញ្ជាក់ជំហរថាកម្ពុជានឹងមិនដកថយ ឬឈរជើងដោយគ្មានអាវុធនៅចំណុចប៉ះទង្គិចគ្នាត្រង់ព្រំដែនកម្ពុជា-ថៃតំបន់មុំបី ស្រុកជាំក្សាន្ត ខេត្តព្រះវិហារទេ។

ក្នុងជំនួបកាលពីព្រឹកមិញផងដែរប្រធានគណបក្សប្រជាជនកម្ពុជាដែលជាបក្សកាន់អំណាចក៏បញ្ជាក់ផងដែរថាកម្ពុជាមិនចង់ធ្វើសង្គ្រាមទេ តែបើគេចង់ គេឈ្លានពាន នោះកម្ពុជានឹងឆ្លើយតបវិញក្នុងកិច្ចការការពារជាតិបូរណភាពទឹកដី៕