សម្តេចតេជោ ហ៊ុន សែន ព្រមានចាប់មេដឹកនាំគណបក្សភ្លើងទៀន​ដាក់ពន្ធធនាគារ បើហ៊ានបំផ្លាញ​សណ្តាប់ធ្នាប់សាធារណៈ

សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានព្រមានចាត់វិធានការចំពោះថ្នាក់ដឹកនាំគណបក្សភ្លើងទៀន ប្រសិនបើហ៊ានបង្កឱ្យមានផលប៉ះពាល់ដល់សណ្តាប់ធ្នាប់សាធារណៈ ខណៈដែលកម្ពុជា កំពុងតែរៀបចំព្រឹត្តិការណ៍​កីឡាស៊ីហ្គេម។ សម្តេចលើកឡើងបែបនេះ ឆ្លើយតបទៅនឹងសេចក្តីប្រកាសរបស់គណបក្សភ្លើងទៀន ដែលគ្រោងប្រមូល​ផ្តុំអ្នកគាំទ្ររបស់ខ្លួននៅទូទាំងប្រទេស ក្រោយពីត្រូវបាន គ ជ ប បដិសេធមិនចុះបញ្ជីឱ្យគណបក្សនេះ ឈរឈ្មោះ​សម្រាប់​ការបោះឆ្នោតជ្រើសតាំងតំណាងរាស្រ្ត អាណ្តិទី៧ ឆ្នាំ ២០២៣។

តាមរយៈសាសំឡេង បង្ហោះតាមបណ្តាញតេឡេក្រាម សម្តេចតេជោ បានអំពាវនាវដល់អ្នកគាំទ្រគណបក្សភ្លើងទៀន កុំចូលរួមសកម្មភាពណាមួយ ជាមួយមេដឹកនាំបក្សភ្លើងទៀនឱ្យសោះ និងបញ្ជាដល់អាជ្ញាធរមានសមត្ថកិច្ចទាំងអស់ មិនអនុញ្ញាតឱ្យក្រុមប្រឆាំង ធ្វើឱ្យខូចសណ្តាប់ធ្នាប់សាធារណៈ ខណៈដែលកម្ពុជា កំពុងធ្វើជាម្ចាស់ផ្ទះកីឡា​ស៊ីហ្គេមនោះឡើយ។

សម្តេច ក៏បានបញ្ជាឱ្យកម្លាំងមានសមត្ថកិច្ចគ្រប់លំដាប់ថ្នាក់ ជាពិសេសកម្លាំងប្រដាប់អាវុធ ត្រូវត្រៀមចាប់យកក្បាល​ម៉ាស៊ីនទាំងអស់ ទាំងថ្នាក់ជាតិ និងថ្នាក់ក្រោមជាតិ ដែលហ៊ានចេញមុខប្រឆាំងធ្វើឱ្យខូចសណ្តាប់ធ្នាប់សាធារណៈ ដោយមិនអត់ឱនឱ្យទង្វើដែលគ្មានទំនួលខុសត្រូវរបស់មេដឹកនាំគណបក្សភ្លើងទៀនឡើយ។

សម្តេចតេជោ បានផ្ញើសារទៅដល់មេដឹកនាំគណបក្សភ្លើងទៀនឱ្យប្រយ័ត្នរាល់ទង្វើទាំងឡាយដែលខ្លួនបានធ្វើ និងជូនដំណឹងទៅដល់បណ្តាពន្ធធនាគារឱ្យរៀបចំទទួលមេដឹកនាំគ្រប់ជាន់ថ្នាក់របស់បក្សភ្លើងទៀន ប្រសិនបើហ៊ានប្រព្រឹត្តិបទល្មើសទាំងឡាយ តាមរយៈបំផុសឱ្យមានចលនាទាមទារគាប​សង្កត់ទៅលើគណៈ​កម្មាធិការជាតិរៀបចំការបោះឆ្នោត។

តាមរយៈសារសំឡេងរបស់សម្តេចតេជោ ឆ្លើយតបទៅនឹងលិខិតគណបក្សភ្លើងទៀន ដែលប្រកាសប្រមូលផ្តុំថ្នាក់ដឹកនាំ សមាជិក សមាជិកា សកម្មជន និងអ្នកគាំទ្រគណបក្ស នៅទូទាំងប្រទេស ដើម្បីតស៊ូមតិដោយសន្តិវិធី ក្នុងករណីគណបក្ស ភ្លើងទៀន ត្រូវបាន គ.ជ.ប បដិសេធ មិនចុះបញ្ជី គណបក្សភ្លើងទៀន សម្រាប់ការបោះឆ្នោត​ជ្រើសតាំងតំណាងរាស្ត្រ អាណត្តិទី៧ ឆ្នាំ២០២៣៕