នយោបាយ

អ្នកវិភាគ និងឃ្លាំមើល ៖ ភាពស្ងៀមស្ងាត់ជុំវិញបញ្ហាព្រំដែន មិនមែនជាការបណ្ដោយឱ្យថៃរំលោភបំពានតាមអំពើចិត្តទេ

បានផុស

១ year មុន

នៅ

ថ្ងៃពុធ ១២ មីនា ២០២៥

ដោយ

ភ្នំពេញ ៖ អ្នកវិភាគភូមិសាស្រ្តនយោបាយ និងអ្នកឃ្លាំមើលការអភិវឌ្ឍន៍សង្គមបានលើកឡើងថា ភាពស្ងៀមស្ងាត់របស់ប្រមុខរាជរដ្ឋាភិបាលជុំវិញបញ្ហាព្រំដែន កម្ពុជា-ថៃ មិនមែនជាការបណ្ដែតបណ្ដោយឱ្យភាគីថៃរំលោភលើដែនអធិបតេយ្យភាពរបស់កម្ពុជានោះទេ ប៉ុន្ដែជាការបង្ហាញពីយន្តការដោះស្រាយដោយសន្ដិវិធី និងជៀសវាងទំនាស់ប្រដាប់អាវុធ។

លោក ថុង ម៉េងដាវីត អ្នកវិភាគភូមិសាស្រ្តនយោបាយ និងសន្ដិសុខបានថ្លែងថា «ខ្ញុំបានមើលឃើញពីជំហររបស់ប្រមុខរាជរដ្ឋាភិបាលដឹកនាំដោយសម្ដេចបវរធិបតី ហ៊ុន ម៉ាណែត ទាក់ទងនឹងបញ្ហាព្រំដែនរវាងកម្ពុជា និងថៃ។ សម្ដេចបានបញ្ជាក់ម្ដងហើយម្ដងទៀតពីជំហររក្សាភាពស្ងៀមស្ងាត់ក្នុងការស្វែងរកដំណោះស្រាយដោយសន្ដិវិធី»។

លោកបន្តថា «ភាពស្ងៀមស្ងាត់នេះមិនមែនមានន័យថា រាជរដ្ឋាភិបាលបណ្ដែតបណ្ដោយឱ្យថៃរំលោភលើដែនអធិបតេយ្យភាពកម្ពុជាតាមអំពើចិត្តនោះទេ គឺបង្ហាញពីភាពចាស់ទុំនយោបាយរបស់រាជរដ្ឋាភិបាល ដែលមានយន្តការច្បាស់លាស់នៅក្នុងការដោះស្រាយ និងកំណត់ព្រំដែនគោក និងព្រំដែនទឹកជាមួយប្រទេសជិតខាង»។

លោកបានកត់សម្គាល់ឃើញថា ប្រមុខរាជរដ្ឋាភិបាលមានជំហរយ៉ាងម៉ឺងម៉ាត់ និងដាច់ខាតដែលជាការទទួលខុសត្រូវចំពោះជាតិ និងប្រជាជន ក្នុងការការពារបូរណភាពទឹកដី និងអធិបតេយ្យភាពជាតិ ពោលគឺមិនឱ្យបាត់បង់ទឹកដីរបស់ខ្លួនទៅប្រទេសណាក៏ដោយ សូម្បីតែមួយមីលីម៉ែត្រ។

អ្នកវិភាគរូបនេះបានគាំទ្រចំពោះការប្ដេជ្ញាចិត្តរបស់រាជរដ្ឋាភិបាលក្នុងការដោះស្រាយបញ្ហាព្រំដែនកម្ពុជា-ថៃតាមរយៈការចរចាគ្នាដោយសន្ដិវិធី និងអនុលោមទៅតាមច្បាប់។ ការណ៍នេះគឺអាចបញ្ចៀសការប្រឈមមុខដាក់គ្នាដោយប្រើប្រាស់អាវុធ និងហឹង្សានិយម ខណៈក្រុមជ្រុលនិយមនៃប្រទេសទាំងពីរនៅតែបន្តរុញករណីនេះកើនកម្ដៅរាល់ថ្ងៃ។

ចំណែកលោក សំ សឿន អ្នកឃ្លាំមើលការអភិវឌ្ឍន៍សង្គម និងនយោបាយបានថ្លែងថា «បញ្ហាព្រំដែនកម្ពុជា-ថៃ គឺជាអាវុធដ៏មុតស្រួចរបស់ក្រុមជ្រុលនិយមទាំងកម្ពុជា និងថៃ ហើយបើយើងចេះតែធ្វើទៅតាមការទាមទារទាំងកំហឹងរបស់ពួកគេគ្រប់តែរឿងនោះ គឺជារឿងដ៏គ្រោះថ្នាក់ ហើយសង្រ្គាមច្បាស់ជាផ្ទុះឡើងជាក់ជាមិនខាន»។

ក្នុងន័យនេះលោកថា «ខ្ញុំនៅតែគាំទ្រជំហរប្រមុខរាជរដ្ឋាភិបាលដែលមានការអត់ធ្មត់ខ្ពស់ចំពោះបញ្ហានេះ ព្រោះយើងនៅតែទទួលបានផលប្រយោជន៍ច្រើន គឺព្រំដែនរក្សាស្ថានភាពដើមដដែល គ្មានការច្បាំងគ្នា ហើយទំនាក់ទំនងផ្នែកសេដ្ឋកិច្ច និងការទូតនៅតែល្អប្រសើរ ពលរដ្ឋអាចចេញ-ចូលប្រកបរបរចិញ្ចឹមជីវិតជាធម្មតា ប៉ុន្ដែការចរចារឿងព្រំដែន គឺនៅតែដំណើរការដដែល»។

លោក សំ សឿន បានកត់សម្គាល់ឃើញថា មូលហេតុដែលជ្រុលនិយមនៅក្រៅប្រទេសនៅតែចិញ្ចឹមចិត្តលើកបញ្ហាព្រំដែនយកមកនិយាយដដែលៗនេះ គឺជាចេតនាអាក្រក់មួយចង់ឱ្យប្រទេសជាតិមានចលាចល មានទំនាស់ផ្ទៃក្នុង និងមានសង្គ្រាមជាមួយប្រទេសខាង ដើម្បីពួកគេមានឱកាសវិលចូលស្រុកធ្វើនយោបាយវិញដោយគ្មានឧបសគ្គ។

លោកបានចំអកជុំវិញក្ដីស្រមៃរបស់ក្រុមប្រឆាំងជ្រុលនិយមទាំងនោះថា ពួកគេនឹងមិនអាចសម្រេចក្ដីប្រាថ្នានោះទេ ដោយសាររាជរដ្ឋាភិបាលមិនបណ្ដែតបណ្ដោយឱ្យកលល្បិចរបស់ពួកគេទទួលបានជោគជ័យតាមរយៈការញុះញង់ និងអុចអាលពលរដ្ឋខ្មែរឱ្យមានការរើសអើងថ្នាក់ដឹកនាំសព្វថ្ងៃនេះទេ។

បន្ថែមលើនេះ លោក សំ សឿន មើលឃើញពីបរាជ័យរបស់ក្រុមឧទ្ទាមក្រៅច្បាប់ទាំងនោះ លែងមានការគាំទ្រពីប្រជាពលរដ្ឋដែរ ដោយសារនយោបាយទុច្ចរិតមួយដែលមិនបានជួយប្រជាពលរដ្ឋ ទើបធ្វើឱ្យពលរដ្ឋបាត់បង់ជំនឿទុកចិត្តកាន់តែខ្លាំង បាត់បង់ការគាំទ្រ និងធ្វើនយោបាយបោកប្រាស់ធ្វើប្រជាភិថុតិលើពលរដ្ឋ។

ដូច្នេះពួកគេគ្មានជម្រើសអ្វីក្រៅតែពីនិយាយបំភ្លៃ បំផ្លើស បំប៉ោងនិងបំភ័ន្តការពិតឡើយ។

គួររំឭកថា គោលដៅនៃការធ្វើវិទ្ធង្សនារបស់ក្រុមជ្រុលនិយម គឺការញុះញង់ប្រជាពលរដ្ឋ ឬកងកម្លាំងប្រដាប់អាវុធមិនឱ្យស្តាប់បទបញ្ជារាជរដ្ឋាភិបាល ព្យាយាមបង្កើតចលាចលក្នុងចំណោមប្រជាពលរដ្ឋ ដោយផ្សព្វផ្សាយព័ត៌មានមិនពិត និងញុះញង់ឱ្យសកម្មជនរបស់ខ្លួនក្នុងស្រុកតវ៉ាទាមទារផ្សេងៗ ដោយចេតនាបង្កភាពវឹកវរសង្គម ដើម្បីសម្រេចមហិច្ឆតាដណ្ដើមអំណាចដោយខុសច្បាប់៕