នយោបាយ

សម្ដេចតេជោ៖ យើងពិតជាអាចយកឈ្នះបានលើរាល់ឧបសគ្គ និងការលំបាកនានាខាងមុខទៀត

បានផុស

៣ សប្តាហ៍ មុន

នៅ

ថ្ងៃសៅរ៍ ២៨ មិថុនា ២០២៥

ដោយ

ប្រធានបក្សប្រជាជនកម្ពុជា សម្ដេចតេជោ ហ៊ុន សែន បានលើកឡើងថាចាប់តាំងបានផ្ដួលរំលំរបបប្រល័យពូជសាសន៍ ប៉ុល ពត គណបក្សបានដឹកនាំប្រទេសសម្រេចបានជោគជ័យដល់សព្វថ្ងៃ ឆ្លងការនូវរាល់ឧបសគ្គលំបាកជាច្រើន ដែលជាការសាកល្បងរួចហើយ។ ការសាកល្បងនេះហើយសម្ដេចបានបញ្ជាក់ថា ទោះបីជាមានឧបសគ្គខាងមុខទៀតក៏គណបក្សនៅតែអាចយកឈ្នះបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងខួបកំណើតបក្សលើកទី៧៤ នៅស្នាក់ការកណ្ដាលគណបក្សក្នុងរាជធានីភ្នំពេញ សម្ដេចតេជោ មានប្រសាសន៍ថាពេលវេលាកន្លងបានសាកល្បងរួចហើយនូវកម្លាំអ ឆន្ទៈ ស្មារតី និងសមត្ថភាពរបស់គណបក្ស ហើយគណបក្សពិតជាអាចយកឈ្នះលើរាល់ឧបសគ្គ និងការលំបាកខាងមុខទៀតក្នុងការកសាង និងការពារមាតុភូមិ ផ្អែកលើកម្លាំងសាមគ្គីឯកភាពជាតិដ៏រឹងមាំ។

សម្ដេចបន្ដែមថា៖ «ខ្ញុំព្រះករុណាខ្ញុំ សូមសម្ដែងការគោរព និងដឹងគុណយ៉ាងជ្រាលជ្រៅបំផុតចំពោះ បងប្អូនជនរួមជាតិនៅគ្រប់ទិសទី បណ្ដាគណបក្សនយោបាយ និងគ្រប់មជ្ឈដ្ឋានផ្សេងៗទៀតក្នុងសង្គម ដែលមានការជឿជាក់ និងគាំទ្រដល់ការដឹកនាំរបស់គណបក្សប្រជាជនកម្ពុជា ធ្វើឱ្យគណបក្សមានលទ្ធភាពពេញលេញក្នុងការបម្រើជាតិ»។

គណបក្សប្រជាជនកម្ពុជាត្រូវបានបង្កើតឡើងនៅថ្ងៃទី២៨ ខែមិថុនា ឆ្នាំ១៩៥១ ដើម្បីរំដោះជាតិចេញពីអាណានិគមនិយមបារាំង។ ក្នុងថ្ងៃទី៧ ខែមករា ឆ្នាំ១៩៧៩ គណបក្សនេះបានដឹកនាំវាយផ្ដួលរំលំខ្មែរក្រហមចេញពីអំណាចនឹងបានដឹកនាំកម្ពុជារហូតបច្ចុប្បន្នយ៉ាងរឹងមាំ។ មេដឹកនាំគណបក្សនេះតែងតែបញ្ជាក់ថាទោះក្នុងស្ថានភាពបែបណាក៏មិនបោះបង់ប្រជាជនកម្ពុជាចោលនោះទេ។

ក្នុងឆ្នាំ២០២៣គណបក្សនេះទទួលបានគាំទ្រពីពលរដ្ឋដ៏លើសលប់រហូតកាន់កាប់១២០លើ១២៣អសនៈក្នុងសភាជាតិ៕