សិប្បកម្ម​ផលិតពាង​នៅស្ទឹងត្រែង​ស្វែង​រកការ​គាំទ្រ​ពីអតិថិជន

សិប្បកម្មផលិតពាងមួយកន្លែង នៅភូមិព្រៃចាស់សង្កាត់សាមគ្គី ក្រុងស្ទឹងត្រែង បានបង្កើនការផលិត ឱ្យមានគុណភាពដើម្បីស្វែងរក អតិថិជនគាំទ្រមកទិញយកទៅដាក់ទឹកប្រើប្រាស់។ 

លោក ភិន បូរី អាយុ ៣៤ឆ្នាំ រស់នៅភូមិព្រៃចាស់ សង្កាត់សាមគ្គី អ្នកផលិតពាងបានបញ្ជាក់ថា ការផលិតពាងជាមុខរបរមួយប្រកបដោយភាពសុចរិត គ្រាន់តែយើងចំណាយដើមទុន និងកម្លាំងធ្វើទៅដោយភាពយកចិត្តទុកដាក់ ទើបការផលិតនេះសម្រេចបានបរិមាណនិងគុណភាពល្អ។        

លោកចេះផលិតពាងតពីដូនតាមក ហើយលោកចង់អភិរក្សមុខរបរមួយនេះ ទើបនៅបន្តធ្វើជារៀងរហូតមក ព្រោះ​វា​​បាន​ផ្តល់ប្រាក់ចំណួលសម្រាប់ដោះស្រាយជីវភាពបានមួយផ្នែកបន្ទាប់ពីធ្វើស្រែចំការច្បារដំណាំ។  

លោកបញ្ចាក់ថា គ្រួសារគាត់មោទនភាពណាស់ ព្រោះមានរបរមួយប្រចាំគ្រួសារ បានធ្វើការនៅផ្ទះ ដោយមិនបាច់​ទៅស៊ីឈ្នួលលក់កម្លាំងពលកម្ម ឬធ្វើចំណាកស្រុកទៅរកការងារធ្វើឆ្ងាយពីក្រុមគ្រួសារ។ 

លោក អំពាវនាវឱ្យបងប្អូនយើងនៅក្នុងស្រុក ជួយគាំទ្រផលិតផលរបស់ពូកគាត់ផង ដើម្បីឱ្យការផលិតនេះ ស្ថិតនៅមាន​និរន្តរភាព និងបានបង្ហាត់បង្រៀនទៅដល់បងប្អូនយុវជនជំនាន់ក្រាយឱ្យចេះបន្ត។              

សូមបញ្ជាក់ថា ការផលិតពាងនេះអ្នកជំនាញធ្វើក្នុងមួយថ្ងៃផលិតបានចំនួន ២ លក់ក្នុងតម្លៃ មួយតែ៦ម៉ឺនរៀល ធំ​១២ម៉ឺនរៀល ទៅតាមពាងតូចឬធំ ហើយបច្ចុប្បន្ននេះអ្នកផលិត ធ្វើលក់ទៅតាមតែបងប្អូនបញ្ជាទិញតែប៉ុណ្ណោះ៕អត្ថបទ៖ ងិនលីម