ព័ត៌មានអន្ដរជាតិ

កសិករភូមិខាំផាន់ស្នើមន្ត្រីកសិកម្មផ្តល់បច្ចេកទេសកម្ចាត់សត្វដង្កូវស៊ីបំផ្លាញដំណាំ

បានផុស

១ សប្តាហ៍ មុន

នៅ

ថ្ងៃព្រហស្បតិ៍ ១៦ មិថុនា ២០២២

ដោយ

កសិករនៅភូមិខាំផាន់ សង្កាត់សាមគ្គី ក្រុងខេត្តស្ទឹងត្រែងបានប្រកបរបរដាំពោតធ្វើជាភូមិមួយមានផលិតផលមួយ ខណៈដំណាំពោតឆ្នាំនេះត្រូវសត្វដង្កូវស៊ីបំផ្លាញធ្វើឱ្យពួកគាត់ខាតបង់ថវិកា និងស្នើសុំទៅមន្ត្រីជំនាញកសិកម្មឱ្យមកបង្ហាញបច្ចេកទេសកម្ចាត់សត្វចង្រៃទាំងនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កសិករដាំពោតអ្នកស្រី ឆៃ ចិត្រា បានឲ្យដឹងថា៖ សព្វថ្ងៃអ្នកស្រីដាំពោត និងបន្លែផ្សេងៗដែលនាំចេញពីភូមិខាំផាន់យកទៅលក់នៅទីផ្សារស្ទឹងត្រែងស្រួលលក់ដូរជាងបន្លែនាំចូលមកពីបណ្តាតំបន់នានា ដោយបានជួយកសិករឲ្យមានប្រាក់សម្រាប់ដោះស្រាយជីវភាព តែនៅដើមឆ្នាំនេះដំណាំពោត របស់កសិករមានសត្វដង្កូវស៊ីបំផ្លាញគ្មានវិធីសាស្ត្រអ្វីកម្ចាត់បានឡើយ។

លោក តាត យុត កសិករនៅភូមិខាំផាន់ដែរនោះ បានបញ្ជាក់ដែរថា៖ កសិករប្រមាណជាង៧០%នៅក្នុងភូមិនេះបានព្យាយាមដាំពោតជាប្រចាំដើម្បីផ្គត់ផ្គង់ទៅកាន់ទីផ្សារប្រយោជន៍រួមគ្នាថែរក្សាឱ្យបានកេរ្ត៍ឈ្មោះភូមិមួយមានផលិតផលមួយគឺពោតភូមិខាំផាន់។

លោកបន្ថែមថា៖ នៅដើមឆ្នាំនេះស្ទើរតែបាត់បង់ផលិតផលមួយនេះ ព្រោះដំណាំពោតរបស់ពួកគាត់ រងផលប៉ះពាល់ពីការប្រែប្រួលអាកាសធាតុមានភ្លៀងច្រើន កើតដង្កូវស៊ីចំផ្លាញងាប់ដើមទាំងចំការតែម្តង ធ្វើឲ្យកសិករខាតបង់ដើមទុននិងពេលវេលា។

លោក អន ជួន មេភូមិខាំផាន់បានទទួលស្គាល់ថា៖ ដំណាំពោតរបស់កសិករនៅដើមឆ្នាំនេះជួបប្រទះកើតរោគដង្កូវស៊ីបំផ្លាញមែន ហើយគ្រោះចង្រៃនេះអាជ្ញាធរមូលដ្ឋានបានជូនព័ត៌មានទៅមន្ត្រីកសិកម្មរួចមកហើយដែរ តែមិនទាន់ឃើញមានផ្នែកជំនាញណាមួយចុះមកពិនិត្យឡើយ។

លោកសង្ឃឹមថា ក្រោយពីមានការផ្សព្វផ្សាយ ព័ត៌មាននេះមន្ត្រីជំនាញ នឹងចុះមកពិនិត្យនិងផ្តល់បច្ចេកទេសពីការថែទាំនៅដំណាំពោតមួយនេះ ដើម្បីស្តានៅកេរ្ត៍ឈ្មោះភូមិមួយផលិតផលមួយឡើងវិញនៅចុងឆ្នាំនេះ។

សូមបញ្ជាក់ថា៖ នៅភូមិខាំផាន់សង្កាត់សាមគ្គីមានប្រជាពលរដ្ឋរស់នៅជាង២០០គ្រួសារ បានប្រកបមុខរបរដាំដំណាំរួមផ្សំ ជាពិសេសដំណាំពោត នៅតាមជួរដងទន្លេមេគង្គលើ ដែលមានផ្ទៃដីលាតសន្ធឹងជាង៨គីឡូម៉ែត្រចាប់ពីអូរ (ម៉មកើត) ទៅដល់អូរឈើទាល (កោះកី)៕