ជនដៃដល់ក្នុងករណីសម្លាប់បុគ្គលិកផ្ដល់ប្រាក់កម្ចីក្រៅប្រព័ន្ធត្រូវបានកម្លាំងជំនាញឃាត់ខ្លួនបានហើយ

ជនដៃដល់ក្នុងសំណុំរឿងរំលោភសម្លាប់បុគ្គលិកផ្ដល់ប្រាក់កម្ចីក្រៅប្រព័ន្ធ នៅឃុំស្វាយភ្លើង ស្រុកតាំងគោក ត្រូវបានកម្លាំងជំនាញស្រាវជា្រវឃាត់ខ្លួនបានហើយនៅល្ងាចថ្ងៃទី១៥ ខែវិច្ឆិកា ឆ្នាំ២០២៥ ចំណុចលើភ្នំទ្រប់ ស្ថិតភូមិខ្លុង សង្កាត់អូតាវៅ ក្រុងប៉ៃលិន ខេត្តប៉ៃលិន។

ជនដៃដល់មានឈ្មោះ ម៉ន សីហា ហៅឥណ្ឌា ភេទប្រុស អាយុ១៩ឆ្នាំ ជនជាតិខ្មែរ រស់នៅភូមិក្រូច ឃុំស្វាយភ្លើង ស្រុកតាំងគោក ខេត្តកំពង់ធំ។

តាមចម្លើយសារភាពរបស់ជនសង្ស័យបានឆ្លើយសារភាពថា កាលពីថ្ងៃទី១៣ ខែវិច្ឆិកា ឆ្នាំ២០២៥ ជនរងគ្រោះបានមកទារប្រាក់ពីម្តាយរបស់ខ្លួន ប៉ុន្តែម្តាយមិននៅ បន្ទាប់មកខ្លួនបានលួងលោមជនរងគ្រោះឲ្យចូលទៅខាងក្នុងផ្ទះ រួចខ្លួនបានធ្វើសកម្មភាពចាប់ខ្ទប់មុខ និងវាយសម្លាប់ ហើយក៏បានរំលោភជនរងគ្រោះ ក្រោយមកក៏បានយកសាកសពទៅកប់តែម្តង។

សូមជម្រាបថា ករណីឃាតកម្មលើបុគ្គលិក​ផ្តល់​ប្រាក់កម្ចីក្រៅប្រព័ន្ធនេះ ត្រូវបានសមត្ថកិច្ចរកឃើញសពជនរងគ្រោះនៅថ្ងៃទី១៤ ខែវិច្ឆិកា ឆ្នាំ២០២៥​ នៅចំណុចផ្ទះជនសង្ស័យឈ្មោះ ម៉ន សីហា ភេទប្រុស អាយុ២០ឆ្នាំ រស់នៅភូមិក្រូច ឃុំស្វាយភ្លើង ស្រុកតាំងគោក ខេត្តកំពង់ធំ។

តាមរបាយការណ៍របស់សមត្ថកិច្ច ជនរងគ្រោះឈ្មោះ ហ៊ឹម ទីណា ភេទស្រី អាយុ២២ឆ្នាំ មុខរបប បុគ្គលិកអង្គការ អង្ករគ្រួសារខ្មែរ រស់នៅភូមិឫស្សីលរ៍ ឃុំស្វាយភ្លើង ស្រុកតាំងគោក ខេត្តកំពង់ធំ។

តាមរបាយការណ៍ នៅវេលាម៉ោង១៥និង០០នាទី ថ្ងៃទី១៣ ខែវិច្ឆិកា ឆ្នាំ២០២៥ ជនរងគ្រោះបានបាត់ដំណឹងដោយឪពុកម្ដាយតេទូរស័ព្ទមិនចូល ពេលនោះឪពុកម្ដាយបានស្វែងរកតាមភូមិ និងបានប្ដឹងប៉ុស្តិ៍រដ្ឋបាលឃុំស្វាយភ្លើង ដើម្បីឱ្យជួយរក។ លុះដល់ម៉ោង១០និង០០នាទី ថ្ងៃទី១៤ ខែវិច្ឆិកា ឆ្នាំ២០២៥ ឪពុកជនរងគ្រោះបានមករកមើលនៅផ្ទះជនសង្ស័យឈ្មោះ ម៉ន សីហា ភេទប្រុស អាយុ២០ឆ្នាំ រស់នៅភូមិក្រូច ឃុំស្វាយភ្លើង ស្រុកតាំងគោក ស្រាប់តែឃើញស្នាមកាប់ដីដូចកប់ថ្មីៗ។ ពេលឃើញដូចនោះគាត់បានទៅប្ដឹងនគរបាលប៉ុស្ដិ៍ ដើម្បីជួយអន្តរាគមន៍ ទើបកម្លាំងប៉ុស្ដិ៍សហការជាមួយកម្លាំងនគរបាលជំនាញ ជីករកមើលក៏ឃើញសពជនរងគ្រោះពិតប្រាកដមែន៕