ករណីឆេះរោងចក្រអេឡិចត្រូនិច នៅស្ទឹងស្លាគូ ស្រុកត្រាំកក់ កម្លាំងជំនាញគ្រប់គ្រងបានហើយ និងខូចខាតអស់មួយអគារ

គិតត្រឹមម៉ោង០៨និង១០នាទីព្រឹក ថ្ងៃទី២៨ ខែកុម្ភៈ ឆ្នាំ២០២៦នេះ អគ្គិភ័យដែលឆាបឆេះអគាររោងចក្រអេឡិចត្រូនិចនៅជិតស្ទឹងស្លាគូ ក្នុងភូមិចោមពុល ឃុំពពេល ស្រុកត្រាំកក់ ខេត្តតាកែវ ត្រូវបានកម្លាំងជំនាញគ្រប់គ្រងស្ថានការណ៍បានទាំងស្រុងហើយ ខណៈអគាររោងចក្រមួយខ្នងត្រូវបានអណ្ដាតភ្លើងឆាបឆេះអស់ទាំងស្រុង។

តាមការបញ្ជាក់ពីលោក​វរសេនីយ៍ឯក​ ហ៊ុន​ ហែម​ នាយ​ការិយាល័យ​បង្ការ​ពន្លត់​អគ្គិភ័យ​ និងសង្គ្រោះ​នៃ​ស្នង​ការ​ដ្ឋាន​នគរបាល​ខេត្ត​តាកែវ​ បាន​ឲ្យដឹងថា អគាររោងចក្រដែលត្រូវអណ្ដាតភ្លើងឆាបឆេះនេះ ជារោងចក្រអេឡិចត្រូនិច ផលិតអំពូល មានទំហ៊ុំ ៤០ គុណ ៨០ម៉ែត្រ ត្រូវបានអណ្ដាតភ្លើងឆាបឆេះអស់មួយអគារ និងសម្ភារៈក្នុងអគារទាំងស្រុង។ បើតាមលោកនាយការិយាល័យ ករណីនេះ កើតឡើងដោយសារ ឆ្លងចរន្ដអគ្គិសនី ហើយក៏មិនមានអ្នករងរបួសនោះដែរ។

សូមបញ្ជាក់ថា ករណីអគ្គិភ័យចេះរោងចក្រអេគិចត្រូនិចផលិតអំពូលនេះ បានកើតឡើងនាវេលាម៉ោង០៥និង២០នាទី​ ព្រឹក​ថ្ងៃ​ទី​២៨ ​ខែកុម្ភៈ ឆ្នាំ២០២៦៕